"نۇروتاننىڭ" كەڭەيتىلگەن جيىنىندا ەكس-پرەزيدەنت نازارباەۆ ۇلتتىق جانە مەملەكەتتىك ۋنيۆەرسيتەت رەكتورلارى تۋرالى دۇرىس ايتتى. نەگىزى، ولاردىڭ ءبارىن بۇرىن ءوزى تاعايىنداعان ەدى عوي. بىراق، سوعان قاراماستان ايتقان سىنى دا، سوگىسى دە وتە ورىندى.

جۇرتتىڭ ءبارى "ەكى سيىردى" جىرلاي بەرمەي رەكتورلار ماسەلەسىنە دە نازار اۋدارعاندارى ءجون. سەبەبى، شىنىمەن دە مەملەكەتتىك بيۋدجەتتەن قارجىلاندىرىلىپ وتىرعان ۇلتتىق ۋنيۆەرسيتەتتەردى الدى ون، سوڭى جيىرما جىل باسقارىپ وتىرعان رەكتورلار بىلىققا باتىردى. نازارباەۆ ايتسا ايتقانداي. ولار ماڭايىنا ساپالى ءبىلىم بەرەتىن پروفەسسورلاردان گورى اقشا جاساۋعا شەبەر، پىسىقاي كوممەرسانتتاردى جيناپ الىپ، جاعىمپازدىقتىڭ تۋىن كوتەرىپ سىبايلاس جەمقورلىقتىڭ كورىگىن قىزدىرىپ وتىر.

رەكتور دەگەندەر قازىر قاپتاعان وققاعارلارى بار، ەسىگىن اڭدىعان بىرنەشە كومەكشىلەرى بار ءبىلىم بەرەتىندەردەن گورى كۇشەنىپ تۇك بىتىرمەيتىن اباجاداي اپپاراتى بار، سۇمدىق كىرپياز پاتشاعا اينالعان. بيۋروكراتتىقتارى سۇمدىق. عىلىمي كەڭەستى قول استىنداعى قۇل-قۇتانعا اينالدىرىپ جىبەرگەن. كوممەرتسيالىق بولىمدەردىڭ وقۋ اقىسىن ميلليونعا اپارىپ تىرەپ قويعان. بىراق، بەرىپ جاتقان ءبىلىمىنىڭ ساپاسى سىن كوتەرمەيدى.

ءبىزدىڭ ۇلتتىق ۋنيۆەرسيتەتتەردىڭ ديپلومدارى الەم ەلدەرىنىڭ ەشبىرىندە مويىندالمايدى. سەبەبى، بەرگەن بىلىمدەرىنىڭ پراكتيكادا ءوزىن اقتامايتىندىعىن ءبارى بىلەدى. وقىتۋشىلاردى كونكۋرس ارقىلى قابىلدايمىز دەيدى. ونىسى وتىرىك. رەكتور ءوز جەرلەستەرى مەن اقشا جاسايتىن سىبايلاستارىن عانا ماڭايىنا توپتاستىرادى. وقۋ پروتسەسىنە باقىلاۋ جاسالمايدى. سونىڭ سالدارىنان جاس عالىمدار، بىلىكتى ماماندار شەتەلگە كەتىپ جاتىر. دايىنداپ جاتقان "ونىمدەرى" - باكالاۆريات - پولۋفابريكات، ماگيستراتۋرا - حالتۋرا، دوكتورانتۋرا - دالباسا!

قىسقاسى، نازارباەۆ ايتقانداي ۇلتتىق جانە مەملەكەتتىك ۋنيۆەرسيتەتتەردىڭ بارلىق رەكتورلارىن جاڭا وقۋ جىلى باستالماي تۇرىپ، لاۋازىمدارىنان بوساتۋ كەرەك.

قۋاندىق شاماحايۇلىنىڭ facebook پاراقشاسىنان

Abai.kz