رەسەي استاناسىنىڭ «دوم جۋرناليستا» عيماراتىندا قازاقتىڭ داڭقتى جازۋشىسى، دراماتۋرگ راحىمجان وتارباەۆتىڭ ورىس تىلىنە اۋدارىلعان ەكى كىتابىنىڭ پرەزەنتاتسياسى ءوتتى.

«شىڭعىس-حاننىڭ كوز جاسى» جانە «باس» اتتى روماندارى «حۋدوجەستۆەننايا ليتەراتۋرا» باسپاسىنىڭ باس رەداكتورى ۆلاديمير ءپرياحيننىڭ اۋدارماسىمەن ورىس تىلىندە جارىق كوردى. بۇل شاراعا ماسكەۋلىك جازۋشىلار، تىلشىلەر مەن قاتار قازاقستاننىڭ رەسەيدەگى ەلشىلىگىنىڭ وكىلدەرى جانە جازۋشىنىڭ ۇلى ەرمەرەي وتارباەۆ قاتىستى.

ۆلاديمير پرياحين جينالعان قاۋىمعا بۇل جوبانى قازاقستان رەسپۋبليكاسىنىڭ رەسەي فەدەراتسياسىنىڭ ەلشىلىگىنىڭ قولداۋىمەن ىسكە اسىرعانىن جەتكىزىپ، العىسىن ءبىلدىردى. ايتا كەتەلىك، وتارباەۆتىڭ شىعارمالارى تەك قازاق جانە ورىس تىلىندە عانا ەمەس، سونىمەن قاتار فرانتسۋز، قىتاي، اراب، تۇرىك، قىرعىز جانە اعىلشىن تىلدەرىنە اۋدارىلدى. ءوز كەزەگىندە، العى ءسوز العان قازاقستاننىڭ رەسەيدەگى ەلشىلىگىنىڭ كەڭەسشى-ۋاكىلى جانار كولباچاەۆا «ءبىز ەكى بولەك، تاۋەلسىز مەملەكەتتە تۇرعانىمىزبەن ەكى ەل اراسىنداعى رۋحاني بايلانىس نىق، ءارى بۇزىلماستاي» دەدى.

- ءبىر-ءبىرىمىزدىڭ ادەبي شىعارمالارىمىزبەن تانىسۋ، ءوزارا تۇسىنىستىك پەن دوستىعىمىزدى جاقىنداتا تۇسەدى. وزگە حالىقتىڭ مادەنيەتىمەن تانىسۋ - ول ادامي قۇندىلىقتىڭ ەڭ جوعارى دەڭگەيىندەگى بايلانىس. راحىمجان وتارباەۆ ءبىراز حالىقتىڭ مادەني قوسۋشىسى، ادەبي كوپىرى بولا ءبىلدى، - دەپ تۇيىندەدى جانار كولباچاەۆا.

ءىس-شارا وسى كەشتە جينالعان راحىمجان وتارباەۆتىڭ دوستارى، ارىپتەستەرىنىڭ جازۋشى تۋرالى ەستەلىكتەرىمەن، جىلى لەبىزدەرىمەن جالعاستى. وقىرماندى شەشەندىككە تاربيەلەپ، حالقىمىزدىڭ اسىل مۇرالارىن يگەرىپ، رۋحاني تۇرعىدان دامي تۇسۋلەرىنە قىزمەت ەتەتىن قۇندى دۇنيەلەرى ءدۇيىم جۇرتقا تارايدى دەگەن سەنىم سوزدەرى ەستىلدى. بۇل جوبا جاڭاشا نەگىزىندە ۇسىنعان ەڭبەكتىڭ يدەيالاردى تاۋەلسىز ەلىمىزدىڭ جارقىن ادەبيەتىن بارشا كوركەمدىكپەن شەت ەلدەردىڭ وقىرماندارىنا تانىستىرۋ جانە قازاق مادەنيەتىنىڭ بولاشاعىنا قىزمەت ەتكىزۋ ورايىندا جاسالعان.

ەسمۇحان وباەۆ ايتقانداي، «راحىمجان وتارباەۆ – شاعىن اڭگىمەلەرىندە ۇلكەن وي ايتا الاتىن كەسەك جازۋشى». قازاق ادەبيەتىنەن وزىندىك ورنىن العان جازۋشىنىڭ جارقىن بەينەسى بارشا وقىرمان قاۋىمنىڭ جۇرەگىندە ساقتالاتىنىنا سەنىمدىمىز.

راحىمجان وتارباەۆ قازاقستان جازۋشىلار وداعى باسقارماسىنىڭ مۇشەسى، رەسپۋبليكالىق ماحامبەت وتەمىسۇلى اتىنداعى سىيلىقتىڭ، حالىقارالىق ايتماتوۆ اتىنداعى سىيلىقتىڭ يەگەرى، حالىقارالىق ايتماتوۆ اتىنداعى اكادەميانىڭ اكادەميگى، حالەل دوسمۇحامەدوۆ اتىنداعى اتىراۋ ۋنيۆەرسيتەتىنىڭ قۇرمەتتى پروفەسسورى، اتىراۋ وبلىسى، قۇرمانعازى اۋدانىنىڭ قۇرمەتتى ازاماتى. قازاقستاننىڭ ەڭبەك سىڭىرگەن قايراتكەرى، «قۇرمەت» جانە «پاراسات» وردەنىمەن ماراپاتتالعان.

Abai.kz