وبلىس اكىمى قالا جانە اۋدان اكىمدەرىنىڭ، باسقارما باستىقتارىنىڭ قاتىسۋىمەن سەلەكتورلىق رەجيمدە وبلىستاعى قوسىمشا ءبىلىم بەرۋ جۇيەسىنىڭ ماسەلەلەرى جانە ولاردى شەشۋ جولدارى بويىنشا كەڭەيتىلگەن كەڭەس وتكىزدى.

وبلىس اكىمى قالا جانە اۋدان اكىمدەرىنىڭ، باسقارما باستىقتارىنىڭ قاتىسۋىمەن سەلەكتورلىق رەجيمدە وبلىستاعى قوسىمشا ءبىلىم بەرۋ جۇيەسىنىڭ ماسەلەلەرى جانە ولاردى شەشۋ جولدارى بويىنشا كەڭەيتىلگەن كەڭەس وتكىزدى.

- شىعىس قازاقستان وبلىسىندا قوسىمشا ءبىلىم بەرۋ جۇيەسى ءتيىستى دەڭگەيدە ەمەس. ءبىلىم بەرۋ باسقارماسى وسى رەتتە ەشقانداي ءتيىستى ءىس-شارالار وتكىزبەيدى، تۋىنداعان ماسەلەلەردى شەشۋ جونىندە ارنايى شەشىم قابىلدامايدى، - دەدى ايماق باسشىسى بەردىبەك ساپارباەۆ جيىن باسىندا. 2011 جىلى قوسىمشا ءبىلىم بەرۋ جۇيەسىن قارجىلاندىرۋ ماقساتىنا 1,053 ملن تەڭگە قارجى ءبولىندى. وبلىستا جالپى سانى 97 ۇيىرمە، كلۋبتار، وداقتار قىزمەت اتقارادى. - بۇنىڭ بارلىعى قاعاز جۇزىندە عانا. ولاردىڭ ناقتى سانى بۇدان دا از - دەدى بەردىبەك ساپارباەۆ. جيىن بارىسىندا قوسىمشا ءبىلىم جانە تاربيە بەرەتىن وشاقتاردىڭ سانىن ارتتىرۋ، ءاربىر اۋدان جانە قالا اكىمدىكتەرىنىڭ بۇل جونىندە ءتيىستى جۇمىس جۇرگىزۋ، مەكتەپ وقۋشىلارىنا ارنالعان ۇيىرمەلەردىڭ جىل بويى قىزمەت كورسەتۋ قاجەتتىلىگى ايتىلدى. كەڭەستە وسكەمەن جانە سەمەي قالالارىندا بالالاردىڭ دەمالىس وشاقتارىنا ارنالعان بيولوگيالىق ورتالىق، جاس ناتۋراليستەر ۇيىرمەسىنىڭ بۇگىنگى تىنىس-تىرشىلىگى ءسوز بولدى. وبلىس اكىمى سەمەيدەگى بيولوگيالىق ورتالىق ۇلگىسىندە بارلىق اۋدانداردا ءتيىستى مەكەمەلەر اشۋ قاجەتتىلىگىن، كاتونقاراعاي، زىريان، شەمونايحا اۋداندارىنىڭ كورىكتى تابيعاتىن پايدالانا وتىرىپ، تۋريستىك كلۋبتار اشۋدى جۇكتەدى. وسكەمەن قالاسىنداعى جاس تەحنيكتەر ستانتسياسىنىڭ اۋقىمىن كەڭەيتىپ، ءار سالا بويىنشا وقىتۋدى تاپسىردى. سونىمەن قاتار اۋدان مەكتەپتەرىندە قوسىمشا ءبىلىم بەرۋ جۇيەسىن ءتيىستى قولدانىپ، ۇيىرمەلەر اشۋدى ءبىلىم بەرۋ باسقارماسىنا جۇكتەدى.
مادەنيەتىمەن، تابيعاتىمەن، دارىندى تۋمالارىمەن دارالانعان ەلىمىزدىڭ شىعىسىندا اقىندار جانە شىعارماشىلىق مەكتەپتەرىنىڭ، تابيعات ۇيىرمەلەرىنىڭ ازدىعى، تابيعي-لاندشافتىق بازالاردىڭ جۇتاپ قالعاندىعى ەش سىن كوتەرمەيدى. وسى رەتتە ايماق باسشىسى ەل تاۋەلسىزدىگىنىڭ 20 جىلدىعىنا قوسىمشا ءبىلىم بەرۋ جۇيەسىندە 20 جارقان ءىس اتقارۋدى تاپسىردى.

وبلىس اكىمىنىڭ ءباسپاسوز قىزمەتى

akimvko.gov.kz