بۇگىن قىزىلوردا وبلىسى اكىمى، «Nur Otan» پارتياسىنىڭ قىزىلوردا وبلىستىق فيليالىنىڭ توراعاسى قۋانىشبەك ىسقاقوۆتىڭ توراعالىعىمەن «يندۋستريالدى دامۋ» باعىتىنداعى پارتيالىق تىڭداۋ ءوتتى.

ماجىلىستە جالاعاش، سىرداريا اۋداندارىنىڭ اكىمدەرى مەن وبلىستىق كاسىپكەرلىك جانە تۋريزم، اۋىلشارۋاشىلىعى باسقارمالارىنىڭ باسشىلارى يندۋستريالاندىرۋ كارتاسىنىڭ ءبىرىنشى جانە ەكىنشى بەسجىلدىعى اياسىندا قولعا الىنعان جوبالار تۋرالى باياندادى.

قازاقستان رەسپۋبليكاسىنىڭ يندۋستريالىق-يننوۆاتسيالىق دامىتۋ جونىندەگى مەملەكەتتىك باعدارلاماسىنىڭ ءبىرىنشى بەسجىلدىعىندا سىرداريا اۋدانى بويىنشا قۇنى 41 ملرد 520 ملن تەڭگەنى قۇرايتىن 4 جوبا جۇزەگە اسىرىلىپ،ناتيجەسىندە 206 ادام جۇمىسپەن قامتىلعان. بيىل كاسىپكەرلەر تاراپىنان جۇزەگە اسىرىلاتىن 2 جوبا ۇسىنىلعان.

ولار: «شاعان» شارۋا قوجالىعىنىڭ قۇنى 150 ملن.تەڭگە بولاتىن «كۇرىش اقتاۋ زاۋىتىنىڭ قۇرىلىسىن سالۋ جانە زاۋىتتى ىسكە قوسۋ» جوباسى. ءوندىرىس ورنىن اشۋ ارقىلى 25 ادامدى تۇراقتى جۇمىسپەن قامتىلادى دەپ كۇتىلۋدە. زاۋىتتىڭ قۋاتى كۇنىنە 60 توننا كۇرىش اقتاي الادى. جوبا كاسىپكەردىڭ ءوز قارجىسىمەن ىسكە اسىرىلادى.

ەكىنشىسى «اقجارما 2» شارۋا قوجالىعىنىڭ كۇرىش اقتاۋ زاۋىتىن، كىشى پاستەرلەنگەن ءسۇت تسەحىن ىسكە قوسۋ، جىلىجاي جانە باۋ – باقشا ونىمدەرىن ساقتايتىن قويما سالۋ جوباسى. جۇمىسپەن قامتىلاتىن ادام سانى 33, جوبا قۇنى 200 ملن.تەڭگەنى قۇراپ وتىر.

سونىمەن قاتار سىرداريا اۋدانىنىڭ اكىمى اۋدان بويىنشا 2019 جىلدىڭ 1 قىركۇيەگىندە نەگىزگى كاپيتالعا تارتىلعان ينۆەستيتسيالار كولەمى 43 ملرد.866 ملن. تەڭگەنى قۇراپ، بىلتىرعى جىلدىڭ ءتيىستى كەزەڭىمەن سالىستىرعاندا 2 ەسەگە وسكەندىگىن اتاپ ءوتتى.

ال جالاعاش اۋدانىنىڭ اكىمى، يندۋستريالاندىرۋ باعدارلاماسىنىڭ ءبىرىنشى بەسجىلدىعى اياسىندا «بيس گرۋپپ» جشس-ءنىڭ جالپى قۇنى 1,8 ملرد. تەڭگەنى قۇرايتىن «قىزىل ميا تامىرىن وڭدەۋ زاۋىتى» جۇزەگە اسىرىلعاندىعىن ايتتى.

اتالعان جوبا 2013 جىلى وڭىرلەر كاسىپكەرلىگىن قولداۋ كارتاسىنا ەنگىزىلىپ، 2014 جىلدىڭ جەلتوقسان ايىندا پايدالانۋعا بەرىلگەن. مەملەكەتتىك قولداۋ شاراسى رەتىندە زاۋىتتى اشۋ ءۇشىن 8,75 گەكتار جەر تەلىمى بەرىلگەن. 2017 جىلى زاۋىتقا قۇنى 115 مىڭ اقش دوللارىن قۇرايتىن قوندىرعىلار ورناتىلىپ، العاشقى 20 توننا جانە 2018 جىلى 13,6 توننا ءونىمىن (قارا ۇنتاق گليتسيرريزين قىشقىلى) قىتاي مەملەكەتىنە ەكسپورتتالدى.

وبلىس اكىمى بۇگىن قارالعان جوبالارعا قاتىستى ءوز پىكىرىن ءبىلدىرىپ، جۇزەگە اسىرىلۋى ءتيىس جوبالاردىڭ اياقسىز قالماۋىن قاتاڭ تاپسىردى.

- بۇگىن ماجىلىسكە ەكىنشى دەڭگەيلى بانك وكىلدەرىنىڭ قاتىسىپ وتىرعانىن پايدالانا وتىرىپ، سىزدەردى دە باعدارلامالارعا بولىنگەن قاراجاتتى يگەرۋدە بەلسەندىلىك تانىتىپ، بىرگە جۇمىس ىستەۋگە شاقىرامىن. الداعى ۋاقىتتا پارتيالىق تىنداۋلاردا بانكتەردىڭ ءوڭىر ەكونوميكاسىنا قوسقان ۇلەسىن قارايتىن بولامىز. سوندىقتان بۇل باعىتتاعى جۇمىستاردى قاتاڭ باقىلاۋعا الۋ قاجەت،-دەدى ايماق باسشىسى.

Abai.kz