جۇما, 29 ناۋرىز 2024
ساڭلاق 6233 8 پىكىر 12 ناۋرىز, 2020 ساعات 13:40

وزبەكستان ءبىرىنشى، قازاقستان ەكىنشى ورىن الدى...

4-11 ناۋرىز ارالىعىندا اممان قالاسىندا (يوردانيا) بوكستان توكيو وليمپياداسىنا ايماقتىق ىرىكتەۋ ءتۋرنيرى ءوتتى. باسىنان داۋى ارىلماعان AIBA-عا ابدەن وكپەلەگەن حالىقارالىق وليمپيادا كوميتەتى ارنايى ىرىكتەۋ ءتۋرنيرىن وتكىزىپ، وليمپيادا ليتسەنزياسىن وزدەرى تاراتتى.

بيىل توكيودا وتەتىن وليمپيادا ويىندارىندا بوكسشىلار 8 سالماق ساناتىندا عانا باق سىنايدى. بۇعان دا اۋەسقوي بوكستىڭ بەدەلى تومەندەۋى سەبەپ بولىپ وتىر.

تورەشىلەردىڭ بۇرا تارتۋى مەن بارماق باستى - كوز قىستىلىق الەمدىك ارەناداعى بوكستىڭ بەدەلىن تىم تومەندەتىپ جىبەردى. ءتىپتى حالىقارالىق وليمپيادا كوميتەتى بوكستى 2020 جىلعى وليمپيادا ويىندارىنىڭ باعدارلاماسىنان الىپ تاستاۋى دا مۇمكىن ەدى. ابىروي بولعاندا، حوك بۇل قادامعا بارعان جوق. تەك وليمپياداعا قاتىساتىن بوكسشىلار سانىن قىسقارتىپ، ىرىكتەۋ قۇقىعىن ءوز قولدارىنا الدى.

بوكستان قازاقستان قۇراماسىنىڭ باس باپكەرى عالىمبەك كەنجەباەۆ اممانعا تومەندەگى 8 بوكسشىنى ەرتىپ باردى:

52 كەلى: ساكەن بيبوسىنوۆ
57 كەلى: سەرىك تەمىرجانوۆ
63 كەلى: زاكىر سافيۋللين
69 كەلى: ابىلايحان ءجۇسىپوۆ
75 كەلى: ءابىلحان امانقۇل
81 كەلى: بەكزات نۇرداۋلەتوۆ
91 كەلى: ۆاسيلي لەۆيت
+91 كەلى: قامشىبەك قوڭقاباەۆ

يوردانيادا باق سىناعان 8 ساڭلاقتىڭ جەتەۋى جارتىلاي فينالعا شىعىپ، بىردەن وليمپيادا جولداماسىنا قول جەتكىزدى. 52 كەلىگە دەيىنگى سالماق ساناتىندا ونەر كورسەتكەن ساكەن بيبوسىنوۆ عانا شيرەك فينالدا ءسۇرىندى. ول قىتاي بوكسشىسى حۋ جينحۋاعا ەسە جىبەردى. بىراق جۇبانىش جەكپە-جەگىندە فيليپپين وكىلى كارلو پاالامدى جەڭىپ، وليمپياداعا جولداما الدى. وسىلايشا، قازاقستان قۇراماسى توكيو وليمپياداسىنا تولىق قۇراممەن بارۋعا مۇمكىندىك الدى.

جارتىلاي فينالعا جەتكەن جەتى بوكسشىمىزدىڭ تورتەۋى اقتىق سىنعا جولداما الدى. بۇل كەزەڭدە ءابىلحان امانقۇل، ابىلايحان ءجۇسىپوۆ جانە قامشىبەك قوڭقاباەۆ قاتاردان شىعىپ قالدى. سوڭعىسى جاراقاتىنا بايلانىستى شارشى الاڭعا شىققان جوق.

جارتىلاي فينالدىق كەزدەسۋلەر:

57 كەلى: سەرىك تەمىرجانوۆ - ميرازيزبەك ميرزاحاليلوۆ (وزبەكستان)
63 كەلى: زاكير سافيۋللين - وبادا موحاممەد مۋستافا الكاسبەح (يوردانيا)
69 كەلى: ابىلايحان ءجۇسىپوۆ - ۆيكاش كيرشان ء(ۇندىستان)
75 كەلى: ءابىلحان امانقۇل - تاڭاتحان توقتاربەك (قىتاي، ۇلتى قازاق)
81 كەلى: بەكزات نۇرداۋلەتوۆ - وداي الحينداۆي (يوردانيا)
91 كەلى: ۆاسيلي لەۆيت - حۋسەين يشايش (يوردانيا)
+91 كەلى: قامشىبەك قوڭقاباەۆ - حۋني ادىلەت (اۆستراليا). 

اقتىق سىنعا شىققان ءتورت قازاقستاندىقتىڭ ەكەۋى جەڭىسكە جەتتى. 81 كەلىدە جۇدىرىقتاسقان الەم چەمپيونى بەكزات نۇرداۋلەتوۆ اۆستراليا وكىلىن تازا جەڭدى. ال ۆاسيلي لەۆيت (91 كەلى) جاڭا زەلانديا بوكسشىسىنان باسىم ءتۇستى. زاكىر سافيۋللين (63 كەلى) مەن ءابىلحان امانقۇل (75 كەلى) كۇمىس مەدالدى قاناعات تۇتتى.

فينالدىق كەزدەسۋلەر:

63 كەلى: زاكير سافيۋللين - ەلنۋر ابدۋرايموۆ (وزبەكستان، ۇلتى قازاق)
75 كەلى: ءابىلحان امانقۇل (قازاقستان) - ەۋمير مارسيال (فيليپپين)
81 كەلى: بەكزات نۇرداۋلەتوۆ - پاۋلو اوكۋسو (اۆستراليا)
91 كەلى: ۆاسيلي لەۆيت (قازاقستان) - دەۆيد نيكا (جاڭا زەلانديا).

ال قىزدار قۇراماسى ىرىكتەۋ تۋرنيرىنە مىنا قۇراممەن بارعان:

51 كەلى: انگەلينا لۋكاس
57 كەلى: دامەتكەن كەلىمبەت
60 كەلى: ريمما ۆولوسەنكو
69 كەلى: ۆالەنتينا حالزوۆا
75 كەلى: نادەجدا ريابەتس.

بۇرىمدى بوكسشىلارىمىزدىڭ اراسىنان 75 كەلىگە دەيىنگى سالماق دارەجەسىندە باق سىناعان نادەجدا ريابەتس عانا وليمپيادا جولداماسىنا يە بولدى. وتانداسىمىز جارتىلاي فينالدا كەيتلين پاركەردەن (اۆستراليا) جەڭىلىپ، ءتۋرنيردىڭ قولا جۇلدەگەرى اتاندى.

سونىمەن، قازاقستان قۇراماسى ىرىكتەۋ ءتۋرنيرىن 2 التىن، 2 كۇمىس، 4 قولا مەدالمەن قورىتىندىلادى. ءسويتىپ جالپى كوماندالىق ەسەپتە ەكىنشى ورىنعا جايعاستى. باستىسى قورجىندا 9 وليمپيادا جولداماسى بار. ەندى بوكسشىلارىمىز توكيو تورىندە تولاعاي تابىستارعا جەتەدى دەپ ۇمىتتەنەمىز.

وليمپياداعا ىرىكتەۋ ءتۋرنيرى. كوماندالىق ەسەپ:

1, وزبەكستان – 6 (3 التىن + 3 قولا مەدال).
2, قازاقستان – 7 (2+2+3)
3, يوردانيا – 5 (1+1+3)
4, قىتاي – 3 (1+0+2)
5, فيليپپين – 1 (1+0+0)

وليمپيادا جولداماسىن جەڭىپ العان بوكسشىلار

52 كەلى

ساكەن بيبوسىنوۆ بىلتىر قىزىلوردادا وتكەن قازاقستان رەسپۋبليكاسىنىڭ V سپارتاكياداسىندا جانە ەلوردادا وتكەن قر پرەزيدەنتى كۋبوگىندا توپ جارىپ، ەكاتەرينبۋرگتە وتكەن الەم چەمپيوناتىندا قولا مەدالگە قول جەتكىزدى.

1997 جىلى دۇنيەگە كەلگەن تۇركىستاندىق بوكسشىنىڭ ناتيجەسى جامان ەمەس. يوردانيا جەرىندە جۇلدەگە ىلىكپەگەنىمەن، وليمپيادا جولداماسىنا قول جەتكىزە الدى. جاپونيادا ەل ءۇمىتىن اقتايدى دەگەن سەنىم بار.

57 كەلى

بۇل سالماقتىڭ تىزگىنىن قايرات ەراليەۆ ۇزاق ۋاقىت بويى ەشكىمگە بەرمەگەن ەدى. الايدا باپكەرلەر القاسى وسى جولى سەرىك تەمىرجانوۆقا سەنىم ارتقان ەكەن. وعان سەبەپ، ەراليەۆتىڭ جاسى ۇلعايا باستادى. ونىڭ ۇستىنە ۇلتتىق قۇراما ءۇشىن كوپ ەڭبەك سىڭىرگەن قايرات سوڭعى كەزدەرى ءىرى تۋرنيرلەردە ناشار ناتيجە كورسەتىپ ءجۇر. وتكەن جىلى ازيا چەمپيوناتى مەن الەم بىرىنشىلىگىندە دە شيرەك فينالدا ءسۇرىندى.

63 كەلى 

بۇرىنعى 64 كەلى مەن 60 كەلىنىڭ اراسىنان پايدا بولعان جاڭا سالماق دارەجەسى. بۇل ەكى سالماقتا دا بىرقاتار جاقسى بوكسشىلارىمىز بار ەدى. 2019 جىلى تايلاندتا وتكەن ازيا چەمپيوناتىندا 60 كەلىدە زاكىر سافيۋللين كۇمىس، 64 كەلىدە ءساناتالى تولتاەۆ قولا مەدال العان. باپكەرلەر القاسى جاڭا سالماقتا 33 جاستاعى زاكىر سافيۋللينگە سەنىم ارتىپ ءجۇر.

بۇل بوكسشى ەكاتەرينبۋرگتە وتكەن الەم چەمپيوناتىندا 1/8 فينالدا سۇرىنگەن. ال ەلوردادا وتكەن  قر پرەزيدەنتى كۋبوگىندا كۇمىس مەدال الدى. امماندا تاعى التىن مەدال بۇيىرعان جوق. دەمەك، قۇراما باپكەرلەرى جاسى ۇلعايعان ءسافيۋلليندى جاس بوكسشىلارمەن الماستىرۋدى قازىردەن باستاپ ويلاعانى ءجون سەكىلدى. بۇل سالماقتا 1999 جىلى دۇنيەگە كەلگەن ەگىز بوكسشى ءساماتالى، ءساناتالى تولتاەۆتار جاقسى ءوسىپ كەلەدى.

69 كەلى

«قازاقتىڭ سالماعى» اتانعان 69 كەلىدە سوڭعى كەزدەرى قازاقتىڭ جولى بولماي ءجۇر. بۇل سالماقتا ۇزدىكتەر از ەمەس. ابىلايحان ءجۇسىپوۆ پەن اسلانبەك شىمبەرگەنوۆ ەكەۋى دە مىقتى بوكسشىلار. بىراق، ءىرى تۋرنيرلەردە «التىن» الماعاندارىنا كوپ بولدى. شىمبەرگەنوۆ 2018 جىلى ازيا ويىندارىندا، 2019 جىلى ازيا چەمپيوناتىندا وزبەك بوبو ۋسمان باتۋروۆتان جەڭىلدى. ال ابىلايحان وتكەن جىلى الەم چەمپيوناتىندا قولا مەدالدى قاناعات تۇتتى. توكيو تورىندە ءجۇسىپوۆتىڭ جۇگى اۋىر بولايىن دەپ تۇر. 69 كەلىدە قاتارىنان 4 وليمپيادادا قازاقستاندىق بوكسشىلار التىن مەدال العان. وسى ءساتتى سەريانى جالعاۋ ابىلايحاننىڭ قولىنان كەلەر مە ەكەن؟

75 كەلى

بۇل سالماقتا وتكەن جىلى تۇرسىنباي قۇلاحمەت اتوي سالدى. الدىمەن ازيا چەمپيوناتىندا، كەيىن قر پرەزيدەنتى كۋبوگىندا دا قارسىلاس شىداتقان جوق. بىراق الەم چەمپيوناتىندا جارتىلاي فينالدا جەڭىلىپ قالدى. ءسويتىپ، 75 كەلىنىڭ تىزگىنىن بۇرىنعى كوشباسشى ءابىلحان امانقۇل قايتادان ءوز قولىنا الدى.

بىراق ەكەۋى دە فيليپيندىك ەۋمير ءمارسيالدىڭ مىقتىلىعىن مويىنداۋعا ءماجبۇر. تۇرسىنباي ەكاتەرينبۋرگتە جارتىلاي فينالدا جەڭىلسە، ءابىلحان امماندا اقتىق سىندا ەسە جىبەردى. بىراق توكيوعا تۇرسىنبايدان ءۇش جاس كىشى ءابىلحان امانقۇل (1997 جىل) بارادى.

81 كەلى

بۇل سالماقتىڭ مىقتىسى بەك نۇرماعانبەت بولاتىن. 1998 جىلى دۇنيەگە كەلگەن بەك ازيا چەمپيوناتىندا ەش قيىندىقسىز جەڭىسكە جەتكەن. بىراق، بەك جاراقات الىپ قالعاندىقتان بىلتىر ەكاتەرينبۋرگتە وتكەن الەم چەمپيوناتىنا بەكزات نۇرداۋلەتوۆ بارعان.

نۇرداۋلەتوۆ رەسەي جەرىندە قۇرداسىنان اسىپ ءتۇستى. جاس بوكسشى 1/2 فينالدا 2016 جىلعى وليمپيادا چەمپيونى، ءتورت مارتە الەم بىرىنشىلىگىنىڭ جەڭىمپازى حۋليو لا كرۋزدى جەڭدى. ال اقتىق سىندا وزبەكستاندىق ديولشودبەك رۋزمەتوۆتى ايقىن ۇتىپ، الەم چەمپيوناتىنداعى جالعىز التىن مەدالدى العان.

باپكەرلەر القاسى اممانعا جاس الەم چەمپيونىن الىپ باردى. بەكزات باپكەرلەر ءۇمىتىن اقتاپ، وليمپيادا جولداماسىمەن قاتار، ىرىكتەۋ ءتۋرنيرىنىڭ التىن مەدالىن دە جەڭىپ قايتتى.

ايتا كەتەرلىگى، بەكزات 2019 مامىردا قازاقستان سپارتاكياداسىنا 91 كەلىدە قاتىسىپ، قولا مەدال العان. ال شىلدەدە پرەزيدەنت كۋبوگىندا 81 كەلىدە ونەر كورسەتىپ، كۇمىس مەدالگە قول جەتكىزگەن بولاتى.

91 كەلى

91 كەلىدە ءبىرىنشى نومەرلى بوكسشى ۆاسيلي لەۆيت. جاسى 32-گە كەلگەن لەۆيت مانسابىنداعى سوڭعى وليمپياداعا قاتىساتىن شىعار وسى جولى. سەبەبى بۇل سالماقتا مىقتى جاس بوكسشىلار ءوسىپ كەلەدى. اسىرەسە 2000 جىلى دۇنيەگە كەلگەن ايبەك ورالبايدىڭ قارقىنى جاقسى. 2019 جىلى وتكەن پرەزيدەنت كۋبوگىنىڭ فينالىندا ەكى بوكسشىنىڭ جولدارى ءتۇيىستى. سول كەزدە ورالباي ۆاسيليگە قارىمدى قارسىلاس ەكەنىن اڭعارتقان.

ۆاسيلي لەۆيت تە ءىرى تۋرنيرلەردە جەڭىسكە جەتپەگەلى كوپ بولدى. 2019 جىلى ازيا چەمپيوناتىندا دا، الەم بىرىنشىلىگىندە دە قولا مەدال الدى. ءتىپتى تايلاندتا وتكەن ازيا چەمپيوناتىندا كارىس بوكسشىسى نوكاۋتقا ءتۇسىرىپ كەتتى. بىراق باپكەرلەر بۇل جولى دا لەۆيتكە ءۇمىت ارتىپ وتىر. ىرىكتەۋ تۋرنيرىندەگى التىن مەدال ەشتەڭەنى دالەلدەي المايدى. اسا تاجىريبەلى ۆاسيلي ءوز مىقتىلىعىن تەك توكيودا دالەلدەۋى كەرەك.

+ 91 كەلى

بۇل سالماقتا ءبىزدىڭ ەلدە قامشىبەك قوڭقاباەۆ كوشباسشى. بىراق الەمدە ەكىنشى ورىننان اسار ەمەس. ازيا چەمپيوناتىندا ەكى رەت (2017, 2019), الەم چەمپيوناتىندا ەكى رەت (2017, 2019) كۇمىس الدى. وسى ءتورت فينالدىڭ ۇشەۋىندە وزبەكستاندىق باحودير جالولوۆتان جەڭىلدى. قامشىبەك وسى جولى جاراقاتىنا بايلانىستى جارتىلاي فينالدىق جەكپە-جەككە شىقپاعاندىقتان، جالولوۆپەن جانە ءبىر سىناسىپ كورۋدىڭ ءساتى تۇسپەدى.

بويى 2 مەتر (198 سم) جالولوۆ اۋەسقويدان گورى، كاسىپقويعا جاقىنداۋ. كاسىپقوي بوكستا بىرنەشە جەكپە-جەك وتكىزىپ ۇلگەرگەن. 25 جاستاعى جالولوۆتى جەڭۋ قازىرشە قوڭقاباەۆقا مۇمكىن بولماي تۇر. مۇمكىن وزبەكستاندىقتى توكيودا جەڭەتىن شىعار...

قۋانىش قاپپاس

Abai.kz

8 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2264
عيبىرات

قايسار رۋحتى عازيز جان

مۇحتار قۇل-مۇحاممەد 3555