دۇيسەنبى, 18 قازان 2021
1261 0 پىكىر 1 مامىر, 2020 ساعات 11:31

رەسەي پرەمەر-ءمينيسترى ميشۋستين كوروناۆيرۋس جۇقتىرىپ الدى

رەسەيدىڭ ۇكىمەت باسشىسى ميحايل ميشۋستين كوروناۆيرۋس جۇقتىرىپ الدى. ۇكىمەتتى باسقارۋ مىندەتى ءبىرىنشى ۆيتسە-پرەمەر اندرەي بەلوۋسوۆقا جۇكتەلدى. بۇل تۋرالى ميشۋستين بەيسەنبىدە «روسسيا 24» تەلەارناسىنىڭ ەفيرىندە حابارلادى.

پرەمەر-مينيستر ۆيرۋستى باسقا ادامدارعا تاراتپاس ءۇشىن ەشكىممەن ۋاقىتشا ارالاسپايتىنىن، بىراق ۇكىمەت مۇشەلەرىمەن بايلانىسىن ۇزبەيتىنىن مالىمدەدى. ميشۋستين وتانداستارىن ەلدەگى شەكتەۋ شارالارىنا جاۋاپكەرشىلىكپەن قاراۋعا شاقىردى.

رەسەيدە بەيسەنبىدە جەتى مىڭنان استام ادامنىڭ كوروناۆيرۋس جۇقتىرعانى انىقتالدى. 101 ادام قايتىس بولدى. پاندەميا باستالعالى ەلدە 106 498 ادام كوروناۆيرۋس جۇقتىرعان. 1073 ادام كوز جۇمعان، 11 619 ادام اۋرۋدان جازىلعان.

ماسكەۋ قالاسىندا كوروناۆيرۋستان اۋىرعاندار كوپ – ءبىر تاۋلىكتە استانانىڭ 3093 تۇرعىنىنا وسىنداي دياگنوز قويىلدى.

بيلىك ەپيدەميا مامىر ايىنىڭ باسىندا كۇشەيۋى مۇمكىن دەپ بولجايدى. رەسەي پرەزيدەنتى ۆلاديمير پۋتين دەمالىس كۇندەرىن 11 مامىرعا دەيىن سوزدى. پۋتين ۇكىمەتكە شەكتەۋ شارالارىنان بىرتىندەپ باس تارتۋ جوسپارىن ازىرلەۋدى ۇكىمەتكە تاپسىردى.

Abai.kz

0 پىكىر