سەنبى, 15 تامىز 2020
COVID-19 قازاقستاندا. جۇقتىرعاندار — 102287. جازىلعاندار — 80716. قايتىس بولعاندار — 1269
46 - ءسوز 2060 5 پىكىر 9 شىلدە, 2020 ساعات 14:27

پرەزيدەنت ۇندەۋىنە بايلانىستى بىرەر پىكىر

قارالى كۇن تۋرالى:
13 شىلدەنى قارالى كۇن ەتىپ جاريالاۋ حالىقتىڭ 6 شىلدەدەگى وتشاشۋعا نارازىلىعىن باسۋ ارەكەتى ەكەنى انىق. بىراق بۇل ازا كۇنىنىڭ ءمان-مازمۇنى قانداي بولماق؟ ءبىر كۇنگە ويىن-ساۋىق حابارلارىن توقتاتىپ، ءبىر مينۋت ەسكە الۋ ما؟ قازىرگى حالىقتىڭ كوكەيىندەگى ماسەلە – كوۆيدتان قايتىپ جاتقان ادام سانى، ولاردىڭ ارقايسىسىنىڭ وقيعاسى، كىنالىلەردىڭ انىقتالۋى، قاتەمەن جۇمىس. قازىرگى رەسمي ستاتيستيكاعا سۇيەنسەك، قايتىس بولعان 264 ادام ءۇشىن ازا تۇتامىز. ال پنەۆمونيادان ون-ونداپ كەتىپ جاتقانداردىڭ سۇراۋى كىمگە؟ قايتىس بولعانداردىڭ بارلىعىنىڭ اتى-ءجونى اتالىپ، ولاردىڭ ومىرىنەن اقپارات بەرىلۋى كەرەك.

ديالوگ تۋرالى
توقاەۆتىڭ ەلدەگى نارازىلىقتىڭ اۋانىن ءتۇسىنىپ، جەدەل تۇردە ۇندەۋ ارناعانى الدىڭعى پرەزيدەنتتەن ەرەكشە باسقارۋ ءستيلىن بايقاتادى. بىراق، وكىنىشكە قاراي، كوممۋنيكاتسيا تۇرعىسىنان ورەسكەل قاتەلەر كەتتى، ول قاتەلەردى تۇزەۋ قيىن. ءار قاتەلىك سايىن بيلىككە دەگەن حالىقتىڭ سەنىمى ازايىپ بارادى. ونىڭ ۇستىنە، قازىرگى كوممۋنيكاتسيا دامىعان زاماندا حالىق الدىن-الا جازىلعان ءماتىندى مانەرلەپ وقىپ بەرگەننەن گورى وزىمەن تىكەلەي بايلانىسقا شىققاندى قالايدى. توقاەۆ بيلىككە كەلگەلى ءالى بىردە-ءبىر رەت تىكەلەي ەفير وتكىزگەن جوق. بۇعان قوسا، پرەزيدەنتتىڭ قازاقشا باياۋ، ورىسشا جىلدام سويلەۋى دە كوممۋنيكاتسيا تۇرعىسىنان جاقسى ەمەس. سپيچرايتەرلەردىڭ «ءار قازاق مەنىڭ جالعىزىم» دەگەن سياقتى جۇرەككە جىلى تيەتىن سوزدەردى قوسقانى دۇرىس تا شىعار. بىراق تىم ادەبيلەندىرۋدىڭ ارتىندا جاساندىلىق تۇراتىنىن اڭعارعان ءجون.

ەشبىر قازاقستاندىقتىڭ نازاردان تىس قالمايتىنى تۋرالى
الەۋمەتتىك جەلىنى بىلاي قويعاندا، جاقىندار مەن تۋعان-تۋىس اراسىندا ءدارى، اپپارات ىزدەپ سارسىلعان، اۋرۋحاناعا جاتا الماي قينالعان ادام وتە كوپ. جۇرتتىڭ كوبى دارىگەرگە جەتە المايدى، جەتسە دە جازىپ بەرگەن دارىلەرىن تابا المايدى. سوندىقتان پرەزيدەنتتىڭ بۇل سوزىنە سەنبەگەندەر كوپ بولعان شىعار.

كىنالىلەر تۋرالى
جۇيەلىك كەمشىلىكتەردىڭ بارلىعىنا ورنىنان كەتكەن مينيستر مەن ونىڭ كومانداسى كىنالى دەلىندى. بىراق بۇل پرەزيدەنتتەن باستاپ، بۇكىل ۇكىمەتتىڭ موينىنداعى جاۋاپكەرشىلىكتى الىپ تاستاي المايدى. پرەزيدەنت ناۋرىزداعى العاشقى ۇندەۋىندە دە «بارلىعى باقىلاۋدا» دەگەن، ارنايى ۆەدومستۆوارالىق كوميسسيا قۇرىلعان. ياعني شەشىمدەردىڭ كوبىن تەك دەنساۋلىق ساقتاۋ ءمينيسترى ەمەس، سول كوميسسيا ۇجىمدىق دەڭگەيدە قابىلداعان. پرەزيدەنتتىك رەسپۋبليكا بولعاندىقتان كادردىڭ تاڭدالۋىنا، ونىڭ جۇمىسىنىڭ جۇيەلى بولۋىنا، بارلىعىنا پرەزيدەنت جاۋاپ بەرەدى.

الەۋمەتتىك جاعداي تۋرالى
ۇندەۋدە الەۋمەتتىك ماسەلە، جۇمىسسىز قالعان ادامدار، جابىلعان بيزنەس تۋرالى ەشتەڭە ايتىلمادى. «سانانى تۇرمىس بيلەيدى». ىشەرگە اسى جوق بولىپ وتىرعان ادامدار بيلىكتەن كومەك كۇتەدى، بانككە نەسيەسىن وتەي الماي وتىرعاندار قورعانىش كۇتەدى. بۇل جاعىنان حالىق كوكەيىندەگى سۇراقتارىنا جاۋاپ الا المادى.

مۇحتار سەڭگىربايدىڭ جازباسى

Abai.kz

5 پىكىر