مەملەكەت باسشىسى قاسىم-جومارت توقاەۆ ليۆان رەسپۋبليكاسىنىڭ پرەزيدەنتى ميشەل اۋنمەن تەلەفون ارقىلى سويلەستى.

قاسىم-جومارت توقاەۆ بەيرۋت پورتىنداعى جارىلىس سالدارىنان قازا تاپقان ادامداردىڭ جاقىندارى مەن تۋىستارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.

جارىلىس كەزىندە قازاقستاننىڭ ديپلوماتيالىق وكىلدىگىنىڭ عيماراتى ءبۇلىنىپ، ءبىر قىزمەتكەردىڭ جەڭىل جاراقات الۋىنا بايلانىستى قاسىم-جومارت توقاەۆ ميشەل اۋنعا بەيرۋتتە جۇرگەن قازاقستان ازاماتتارىنىڭ (200-دەن استام) قاۋىپسىزدىگىن قامتاماسىز ەتۋدى سۇرادى.

مەملەكەت باسشىسى ليۆاننىڭ وڭتۇستىگىندە بۇۇ ۋاقىتشا كۇشتەرىنىڭ قۇرامىندا قازاقستاندىق 120 بىتىمگەر ساربازدىڭ ءوز مىندەتتەرىن لايىقتى ءارى جوعارى دەڭگەيدە اتقارىپ جاتقانىن اتاپ ءوتتى. وسى ورايدا قاسىم-جومارت توقاەۆ ليۆان ۇكىمەتى قازاقستاندىق اسكەري قىزمەتشىلەردىڭ اۋىسۋى كەزىندە ولاردىڭ قاۋىپسىزدىگىن ساقتاۋ ءۇشىن قاجەتتى كومەك كورسەتەتىنىنە سەنىم ءبىلدىردى.

اڭگىمەلەسۋ بارىسىندا تاراپتار قازاقستان مەن ليۆان اراسىنداعى قارىم-قاتىناستاردى ودان ءارى كەڭەيتۋ ماسەلەلەرى بويىنشا پىكىر الماستى. قاسىم-جومارت توقاەۆتىڭ پىكىرىنشە، ليۆان قازاقستاننىڭ تاياۋ شىعىستاعى ماڭىزدى سەرىكتەسى جانە ەكى ەلدىڭ ىنتىماقتاستىعىنا باسا ءمان بەرىلەدى.

ءوز كەزەگىندە ميشەل اۋن قاسىم-جومارت توقاەۆقا وسىنداي قيىن-قىستاۋ كەزەڭدە تەلەفون شالىپ، قولداۋ كورسەتكەنى ءۇشىن ريزاشىلىعىن ءبىلدىرىپ، ونىڭ جىلى لەبىزىن ليۆان حالقىنا جەتكىزەتىنىن ايتتى. سونداي-اق ليۆان بيلىگى قازاقستان ازاماتتارى مەن ديپلوماتتارىنىڭ قاۋىپسىزدىگىن قامتاماسىز ەتۋ ءۇشىن بارلىق قاجەتتى شارالاردى قابىلدايتىنىن جەتكىزدى.

ليۆان پرەزيدەنتى قازاقستانمەن اراداعى ەكىجاقتى جانە كوپجاقتى فورماتتاعى ءىس-قيمىلداردى ودان ءارى نىعايتۋ ماقساتىندا بىرلەسە تىعىز جۇمىس ىستەۋگە مۇددەلى ەكەنىن ناقتىلادى.

سونىمەن قاتار ميشەل اۋن قازاقستاننىڭ بۇۇ مانداتى اياسىنداعى بىتىمگەرشىلىك قىزمەتىن جوعارى باعالاپ، ەلىمىزدىڭ وڭىرلىك جانە جاھاندىق قاۋىپسىزدىكتى قامتاماسىز ەتۋدەگى ءرولىن اتاپ ءوتتى.

Abai.kz