ءبارىمىز بىلەتىندەي 2019 جىلدىڭ 27 تامىزىندا قازاقستان رەسپۋبليكاسىنىڭ مەملەكەت باسشىسى قاسىم-جومارت كەمەلۇلى توقاەۆ 2020 جىلدى ەرىكتىلەر جىلى (ۆولونتەرلەر جىلى) دەپ رەسمي تۇردە جاريالعان بولاتىن. بۇعان سەبەپ ەرىكتىلەر ەڭبەگى الەمدىك دەڭگەيدە مويىندالعان، ەل ومىرىنە، حالىق تۇرمىسىنا وراسان پايدالى قوعامدىق قوزعالىس رەتىندە مويىندالعان.

سول ءۇشىن دە ەلىمىزدە دە ەرىكتىلەر قوسىنىنىڭ قاتارىن كوبەيتىپ، قوعامدىق قوزعاۋشى كۇشكە اينالدىرۋ كەزەك كۇتتىرمەيتىن ماڭىزدى شارۋا بولاتىن. سول ءۇشىن دە مەملەكەت باسشىسى بيىلعى جىلدى ەرىكتىلەر جىلى بولادى دەپ بەكىتى. ءسويتىپ 2020 جىل قازاقستان رەسپۋبليكاسىنىڭ وتىز جىلعا جۋىق تاريحىنداعى ەرەكشە ەستە قالارلىق ەلەۋلى جىلنامالار قاتارىنا قوسىلدى.

قازاقستان رەسپۋبليكاسىنىڭ پرەزيدەنتى 2020 جىلدى ەرىكتىلەر جىلى دەپ جاريالاعاندا كەزدە ءوز سوزىندە «بيىلعى جىل ءبىزدىڭ ەلدە قايىرىمدى ىستەر ۋاقىتى» دەگەن بولاتىن. پرەزيدەنت ەرىكتىلەر ەڭبەگىنىڭ ماڭىزدىلىعىن، قوعامدىق قوزعاۋشى كۇش رەتىندەگى الەۋەتىن ءتۇسىندىرىپ بەرگەن. مەملەكەت باسشىسىنىڭ ايتۋىنشا، ەركىتى بولۋ ەرىككەندەردىڭ ەرمەگى ەمەس، قايتا زامان تالابىنىڭ ۇددەسىنەن شىققان ۇزدىك جانداردىڭ ارەكەتى سانالادى. ەرىكتىلەردىڭ قوعامداعى وزگەشە قوزعاۋشى كۇش ەكەنىن جوعارىدا ايتتىق. ەندەشە سوزمىزگە سۇيىق شىقپاس ءۇشىن ەلدەگى ەرىكتىلەر قوسىنىنىڭ اتقارىپ جاتقان يگىلىكتى ىستەرىنەن بىرەر مىسال كەلتىرە كەتەيىك.

مەملەكەت باسشىسى ەرىكتىلەر جىلىن جاريالاي سالا، ەلدىڭ ءار ايماعى پرەزيدەنت ۇندەۋىنە ءۇن قوسىپ، ايماقتىق ەرىكتىلەر قوسىنىن جاساقتاي باستادى. ماسەلەن 2020 جىلدىڭ باسىندا رەسپۋبليكا بويىنشا العاشقىلاردىڭ ءبىرى بولىپ قىزىلوردا وبلىسىندا «سىر ەرىكتىلەرى شتابى» ەرىكتىلەر قوسىنى قۇرىلدى. وبلىستاعى ازاماتتىق قوعام وكىلدەرىنىڭ باستاماسىمەن قۇرىلعان اتالعان قوسىننىڭ قاناتىنىڭ استىنا ارال وڭىرىندەگى بارلىق ەرىكتىلەر باس قوسىپ، بىرىكتى دەۋگە تولىق نەگىز بار.

بيىلعى جىلدىڭ اقپان ايىندا ەل پرەزيدەنتى قاسىم-جومارت كەمەلۇلى توقاەۆتىڭ قاتىسۋىمەن جالاۋى جەلبىرەگەن «BIRGEMIZ» ۆولونتەرلەردىڭ رەسپۋبليكالىق فرونت-ءوفيسىن ىسكە قوسۋ راسىمىنە قىزىلوردا وبلىسىندا قۇرىلعان «سىر ەرىكتىلەرى شتابى» ارنايى بارىپ قاتىسىپ قايتتى. مۇنداي مۇمكىندىككە ايماقتىڭ جاس ەرىكتىلەرى ەلدەگى ۆولونتەرلىك قوزعالىستى بارىنشا دامىتۋ ىسىندەگى بەلسەندىلىگى ءۇشى قاتىسقانىن ەرەكشە ايتا كەتەيىك.

بۇگىنگى تاڭدا ءبىز ءسوز ەتىپ وتىرعان «سىر ەرىكتىلەرى شتابى» ەرىكتىلەر قوسىنىنىنداعى ەرىكتىلەردىڭ قىزمەت اياسى بارىنشا كەڭەيىپ، قوعامدىق كۇش رەتىندە قارقىندى تۇردە دامىپ كەلەدى. ايماقتاعى ەرىكتىلەردىڭ فرونت-وفيسىندە 695 ۆولونتەر تىركەلىپ، جۇمىس ىستەۋدە. وبلىستىق ەرىكتىلەر بيىل جىل باسىنان بەرى جۇزدەن استام جاقسى ىستەردى قولعا الىپ، جۇزەگە اسىردى. بۇدان بولەك ەرىكتىلەر تۇتاس الەمدى تابانىنان تىك تۇرعىزعان كوروناۆيرۋس پاندەمياسى كەزىندە دە ەل ءۇشىن وتە كوپ يگىلىكتى ىستەردىڭ باسىن قايىردى. ەرىكتىلەر قوسىنى اتقارعان يگى ىستەر وبلىس كولەمىندەگى ەپيدەميولوگيالىق جاعدايدىڭ جاقسارۋىنا ۇلكەن پايداسىن تيگىزدى.

كوروناۆيرۋس پاندەمياسى كەزىندە «سىر ەرىكتىلەرى شتابى» ەرىكتىلەر قوسىنىنىنىڭ قاتىسۋىمەن ايماقتاعى سەگىز مىڭ بەس ءجۇز وتباسىنا الەۋمەتتىك كومەك كورسەتىلگەنىن اتاپ ايتۋعا بولادى. تولىقتىرىپ ايتار بولساق، جاس ەرىكتىلەردىڭ تىنباي جۇمىس ىستەۋىنىڭ ارقاسىندا وڭىردەگى بەس مىڭعا جۋىق مۇقتاج وتباسىلار مەن كوپبالالى وتباسىلارعا قاجەتتى كومەك كورسەتىلىپ، ولاردىڭ بالالارىنا ءبىلىم الۋعا قاجەتتى وقۋ قۇرالدارى جەتكىزىلىپ بەرىلدى. بۇدان بولەك وبلىستاعى ەكى ءجۇز ەلۋ بەس مەديتسينا قىزمەتكەرلەرىنە دە دەر كەزدىندە قولداۋ كورسەتىلدى. ولاردىڭ وتباسىنا قاجەتتى ازىق-تۇلىك سەبەتتەرى جەتكىزىلىپ قانا قويماي، «الدىڭعى شەپتە» ايانباي ەڭبەك ەتىپ جاتقان مىڭ جەتى ءجۇز دارىگەر قاۋىمى ۋاقىتىلى ىستىق تاماقپەن قامتاماسىز ەتىلىپ وتىردى.

سونىمەن قاتار قازىرگى تاڭدا مەملەكەت باسشىسى قاسىم-جومارت توقاەۆتىڭ جەتەكشىلىك ەتۋىمەن جەتى بىردەي جالپىمەملەكەتتىك ارنايى باعدارلاما اياسىندا جەتى جۇزدەن اسا ناقتى ءىس-شارا ۇيىمداستىرىلعانىن ايتا كەتۋ كەرەك. بۇل جوبالار قاتارىندا ءبىلىم بەرۋ سالاسىنا قولداۋ ءبىلدىرۋ، قارتتار مەن ارنايى قامقورلىقتى قاجەت ەتەتىن ادامدارعا كومەكتەسۋ، تەحنوگەندىك اپاتتاردى تازالاۋ، ەكولوگيا ماسەلەلەرىن رەتتەۋ، مەديتسينا سالاسىن قولداۋ جانە مادەني رۋحاني تاريحي قۇندىلىقتاردى ۇلىقتاۋ جۇمىستارى قامتىلدى.

ەڭ ماڭىزدىسى قىزىلوردا وبلىسىنداعى كاسىپكەرلەر مەن ەرىكتى جاستاردىڭ كوپتەپ كۇش سالۋىمەن جىل باسىنان بەرى ون ءبىر تۇرعىن ءۇش كەشەنى سالىندى. بۇل تۇرعىن ۇيلەر سىرداريا، جاڭقورعان، قارماقشى جانە قازالى اۋداندارىندا بوي كوتەردى. تۇرعىن ۇيلەر اتالعان اۋداندارداعى تۇرمىسى تومەن وتباسىلارعا جانە جالعىز باستى قارت كىسىلەرگە كومەك رەتىندە بەرىلدى. قازىرگى تاڭدا از قامتىلعان وتباسىلار ءۇشىن باسپانا ماسەلەسى وتە وزەكتى بولىپ تۇرعانى بەلگىلى. ەندەشە قىزىلوردالىق بەلسىندى جاستاردىڭ بۇل ىزگى ءىسى كوپ كوڭىلىنەن شىقتى دەگەن ءسوز.

سونىمەن قاتار «سىر ەرىكتىلەرى شتابى» ەرىكتىلەر قوسىنىنى قولعا الىپ اتقارعان يگىلىكتى ىستەردىڭ ءبىرى كوكتەمدەگى سۋ تاسقىنىنان زارداپ شەككەن ايماقتاعى تۇرعىندارعا كومەك قولىن سوزۋ بولدى. اتاپ ايتقاندا سۋ تاسقىنى جۇرگەن تۇركىستان وبلىسى ماقتاارال اۋدانىنىڭ تۇرعىندارىنا قاجەتتى تۇرمىستىق كەرەك-جاراقتار، كيىم-كەشەك جانە ازىق-تۇلىك ونىمدەرىن جەتكىزىپ بەردى. بۇل جۇمىستار قىزىلوردا وبلىسىنىڭ ەرىكتى جاستارى بەلسەنە ەڭبەك ەتتى.

ءسوز سوڭىندا ايتارىمىز، ەرىكتىلىك قىزمەت ەرىكتىلەر جىلىمەن اياقتالماسى ءسوزسىز. ستاتيستيكاعا سۇيەنسەك، تۇتاس الەم حالقىنىڭ جەتىدەن ءبىرى ەرىكتى بولىپ ءجۇر ەكەن. ەندەشە مەملەكەتتىك كوركەيۋى ءۇشىن، حالىق تۇرمىسىنىڭ جاقسارۋى ءۇشىن تىنباي ەڭبەك ەتىپ جۇرگەن ۆولونتەرلەر قوسىنى قىزمەت اياسىنان بۇرىنعىدان دا كەڭەيتىپ، كەلەسى جىلداردا دا جالعاستىراتىنى ءسوزسىز. سەبەبى ەرىكتىلەر قوسىنىنىڭ قىزمەتى قاشان دا وتە ۇلكەن ماڭىزعا يە. مۇنى مەملەكەت باسشىسى دا اتاپ ايتقان بولاتىن.

ەل پرەزيدەنتى قاسىم-جومارت توقاەۆ 2020 جىلدى «ەرىكتىلەر جىلى» دەپ جاريالاعانىن ايتتىق. بىراق بۇل ەرىكتىلەر قوزعالىسىنىڭ قىزمەتى بيىلعى جىلدىڭ سوڭىندا اياقتالادى دەگەن ءسوز ەمەس. مەمەلكەت باسشىسىنىڭ ءبىر جىلدى ارنايى ەرىكتىلەرگە ارناۋ سەبەبى ەرىكتىلەر قوسىنىنا قولداۋ ءبىلدىرۋ، تۇتاس الەمدە كەڭ ەتەك جايعان ۆولونتەرلىك قىزمەتتى قازاقستاندا دامىتۋ ءۇشىن ەكەنى ءسوزسىز. دەمەك، وزگەگە كومەكتەسۋدى قۋانىش سانايتىن ەرىكتىلەر سانى جىلدان-جىلعا كوبەيە بەرەدى دەپ سەنەمىز.

Abai.kz