جۇما, 17 قىركۇيەك 2021
بيلىك 1926 4 پىكىر 21 ماۋسىم, 2021 ساعات 17:42

ءبىرتانوۆ: "سق-فارماتسيا" باسشىسى كىنالى ەمەس

ءبىرتانوۆ بۇگىن سوتقا تاعى قاتىستى. بۇل جولى ايىپتالۋشى ەمەس، كۋاگەر رەتىندە. سوت ءىسى "سق-فارماتسيا" جشس-نىڭ ەكس-باسشىسى بەرىك شارىپكە قاتىستى ءوتىپ جاتىر. سوت ونى وتكەن جىلعى ءدارى-دارمەكتىڭ جەتىسپەۋشىلىگى فاكتىلەرى بويىنشا قاراستىرۋدا. بۇل تۋرالى malim.kz-كە سىلتەمە جاساپ، Abai.kz حابارلايدى. 

"سق-فارماتسيا" مەن بەرىك ءشارىپ جەكە قورعانىش قۇرالدارىن جەتكىزۋ جوسپارىن بۇزعان جوق. بۇل اياق استىنان بولعان فورس-ماجور، قىتاي تاراپىنان بولعان نارسە. قىتاي تاراپى كەلىسىمشارت تالاپتارىن بۇزدى. ءسويتىپ، قازاقستان تاراپى "سق-فارماتسياعا" قورعانىش قۇرالدارىن مەرزىمىندە جەتكىزە المادى. باسقا كەلىسىمشارتتاردى قاراساق، بەرىك ءشارىپۇلى تاۋەكەلگە بارماي، رەگلامەنتكە سايكەس شەتەلدىك تاۋار وندىرۋشىلەرگە 90, ال وتاندىق تاۋار وندىرۋشىلەرگە 60 كۇن مەرزىمىن جەتكىزۋگە بەلگىلەۋىنە بولار ەدى. الايدا ول ۋاقىتتا بۇل قولايسىز بولاتىن. ءسويتىپ، ەلشىلەر ماسكا مەن قورعانىش قۇرالدارىن بۇكىل الەمنەن ىزدەدى", - دەدى ءبىرتانوۆ.

ەكس-ءمينيستردىڭ ويىنشا بىلتىرعى ءدارى تاپشىلىعىنا "سق-فارماتسيانىڭ" قاتىسى جوق. ول تۋرالى ويىن ءبىرتانوۆ بىلاي جەتكىزەدى.

"سق-فارماتسيانىڭ" ماقساتى مەن مىندەتى – اۋرۋحانالارعا ءدارى-دارمەك ساتىپ الۋ. اۋرۋحانالاردا ونكولوگيا، تۋبەركۋلەز، پسيحيكاتىق اۋىتقۋى بار ناۋقاستارعا تەگىن بەرىلەتىن ءدارى-دارمەكتى ساتىپ الادى. ال دارىحانالارعا كەلسەك، بۇل جەكەمەنشىك نارىق. دەنساۋلىق ساقتاۋ مينيسترلىگى ونى ەش ۋاقىتتا قاداعالاعان ەمەس. "سق-فارماتسيا" ەش ۋاقىتتا ءدارىنى دارىحانالارعا جەتكىزگەن ەمەس. "سق-فارماتسيا" جالعا الاتىن قويمالاردىڭ ءبىر جاعىندا اۋرۋحانالارعا ارنالعان دارىلەر تۇرسا، ەكىنشى جاعىندا دارىحانالارعا ارنالعان ءدارى-دارمەك تۇرۋى مۇمكىن. ۇلكەن سۇرانىس تۋىنداپ، حالىق دارىحانالارداعى دارىلەردى الىپ كەتكەندە، دارىلەردى كوتەرمە وتكىزەتىن جانە جەكمەنشىك كومپانيالار سول سۇرانىستى وتەي الماي قالدى. "سق-فارماتسيانىڭ" بۇعان قاتىسى جوق", - دەيدى ەكس-مينيستر.

وسىلايشا مينيستر بەرىك ءشارىپتى ءوز جۇمىسىن تياناقتى اتقارعان ازامات رەتىندە قاراستىرىپ وتىر. ءبىرتانوۆتىڭ ءوزى ءۇي قاماعىندا وتىر. وعان بيۋدجەت قارجىسىن نەگىزسىز پايدالاندى دەگەن ايىپ تاعىلۋدا.

Abai.kz

 

4 پىكىر