قازاقستاننىڭ بۇرىنعى پرەمەر-ءمينيسترى اسقار مامين ەلورداداعى دۇنيە-مۇلكىن ساۋداعا شىعارىپ جاتىر دەگەن اقپارات شىقتى. اقپاراتتىڭ يەسى – «Abzhan news» تەلەگرام ارناسى. بۇيدەيدى:

ەكس-پرەمەر اسقار ۇزاقبايۇلى قازىر استانادا ەكەن. ەشقايدا كەتپەپتى. قازىر ەلورداداعى ءبىرشاما دۇنيە-مۇلكىن ساتۋ بويىنشا كەلىسسوزدەر جۇرگىزىپ جاتىر-مىس.

ساتىلىمعا شىعارىلعان مۇلىكتەرى: «ەۋرازيا» ساۋدا ورتالىعى، قالا سىرتىنداعى 5 ءۇي، «كوكتالداعى» ءۇي جانە ەلوردا ماڭىنداعى جالپى كولەمى 100 گەكتارعا جۋىقتايتىن جەر تەلىمدەرى.

اقپارات رەسمي تۇردە راستالماعان، نە تەرىستەلمەگەن. ەدەل-جەدەل دۇنيە-مۇلىكتەرىن ساۋداعا شىعارعانعا قاراعاندا، اسەكەڭ اسىعىس سەكىلدى...

اسقار مامين جايلى از-كەم ءسوز...

اسەكەڭ قازىر 56-دا. ۆيكيدەرەكتەگى اقپارات بويىنشا، كسرو-دا تۋعان (بۇرىنعى تسەلينوگراد). رەسەيدە ءبىلىم العان. 1991 جىلدان باستاپ باستىق بولا باستاعان. 1996 جىلدان باستاپ ساياسي قىزمەتتەردە تاسى ورگە دومالاعان. قاراپ وتىرىپ، «كەرقۇلا اتتى كەندەبايدىڭ» كەسكەنىن كوز الدىڭىزعا كەلتىرۋگە بولادى. «التى كۇندە كۇلىپتى، الپىس كۇندە ءجۇرىپتى»، - دەگەندەي، بۇل كىسىنىڭ «باسپاعان جەرى، كورمەگەن ەلى جوق».

استانا اكىمدىگىندە اكىم ورىنباسارى، اكىم بولىپ كورگەن. قر ترانسپورت جانە كوممۋنيكاتسيا مينيسترلىگىندە ۆيتسە-مينيستر، سوسىن مينيستر بولعان. قر يندۋستريا جانە ساۋدا ءمينيسترىلىنىڭ دە كرەسلوسىن كورگەن. 2008-دەن 2016 جىلعا دەيىن قتج-نى (قازاقستان تەمىر جولى) باسقارعان. ءسويتىپ، 2016 جىلدىڭ قىركۇيەگىندە ۇكىمەتكە بارعان. باقىتجان ساعىنتاەۆ ۇكىمەتتى باسقارعان كەزدە، ورىنباسارلىق جاساپ جۇرگەن. 2019 جىلدىڭ اقپانىندا جۇلدىزى جانىپ، ۇكىمەتتى تىزگىندەگەن. بىراق، ول تاۋەلسىز قازاقستان تاريحىنداعى ەڭ دارىنسىز، ەڭ جولى بولماعان ۇكىمەت باسشىسى رەتىندە قالدى.

اسقار مامين 2019 جىلدىڭ 25 اقپانىندا تاعايىندالدى. ارتىنشا پرەزيدەنت سايلاۋى ءوتىپ، بيلىك تىزگىنى قاسىم-جومارت توقاەۆقا وتكەن ساتتە دە، ۇكىمەتتى مامين باسقارىپ قالا بەردى. مامين ۇكىمەتى ۇنەمى قيىندىقتار مەن كەلەڭسىزدىكتەرگە تاپ بولدى. وتىرىك ەسەپ پەن كوزالداۋشىلىق جاساۋعا ابدەن ماشىقتانعان مامين ۇكىمەتىنىڭ سانسىز ولقىلىقتارىنىڭ از بولىگىن وسىعان دەيىن ەگجەي-تەگجەيلى جازدىق.

ءماميندى كەتىرگەن – «قاڭتار كوتەرىلىسى». بيىل 5 قاڭتاردا پرەزيدەنت توقاەۆ قىزمەتىنەن بوساتقان ەكى ادامنىڭ ءبىرى – قاماۋداعى كارىم ءماسىموۆ بولسا، ەكىنشىسى وسى اسقار مامين ەدى.

ۇكىمەت پەن پارلامەنتتەگى ءداۋ دالىزدەردە جۋرناليستەردەن ۇركىپ قاشىپ، ءۇنسىز بەزەتىن ءماميننىڭ ەل ەزۋ تارتىپ، ەسكە الاتىن مالىمدەمەلەرى كوپ-اق. سولاردىڭ ءبىرلى-جارىمى مىنەكەي...

قايسىبىر جىلى، «اسقار مامين تاڭعى ساعات تورتتە تۇرىپ قىتاي ءتىلىن ۇيرەنەدى ەكەن. قازاقشانى قاتىرماسا دا، قىتاي تىلىنە دەگەن بەيمالىم الاڭداۋشىلىق ونى تاڭعى ۇيقىسىنان شوشىپ وياتاتىن كورىنەدى»، - دەگەن اقپارات شىقتى. «تاعايىندالعانىنا نەبارى ءۇش اپتا بولعان مامين مىرزادان ەل جاڭاشىلدىق كۇتىپ وتىرعاندا، ونىڭ جاڭاشىلدىعى نەبارى قىتاي ءتىلىن ناسيحاتتاۋ ءھام ۇيرەتۋ بولىپ جۇرمەي مە»، - دەپ جازدىق ءبىز.

ونان سوڭ، بىلتىر رەسەي پرەمەرى ميشۋستين قازاقستاندىق ارىپتەسىن ناۋرىز مەيرامىمەن قازاق تىلىندە قۇتتىقتاعاندا، ءبىزدىڭ اسەكەڭ، قازاق تىلىندە قۇتتىقتاعان ميشۋستينگە ورىسشا: «سپاسيبو» دەپ جاۋاپ قايتاردى.

«قازاقستان حالقىنىڭ 99 پايىزى ينتەرنەتپەن قامتىلعان»، - دەپ سالدى ءبىر جولدا. اسەكەڭنىڭ بۇل سوزدەرى قىز-قىزىل وتىرىك ەكەنىن باسقا-باسقا ەمەس، قر تسيفرلىق دامۋ، يننوۆاتسيا جانە اەروعارىش ونەركاسىبى ءمينيسترى باعدات مۋسين ايتقان.

كەيىن ءبىر جيىندا، اسقار مامين: «سبەرمەن» مەموراندۋم «قاجەتتىلىك»، - دەپ جاۋاپ بەرگەن. بۇل دا سونداي ءبىر قاجەتتىلىك ەمەس ەكەنىن، وتكەندە كوردىك. قازاقستان «سبەر كەلىسىمىنەن» تولىقتاي باس تارتقان.

مامين ماڭعىستاۋدا ءجۇرىپ، قينالعان شارۋالارعا بارماي كەتتى. ماڭعىستاۋداعى جۇرتتىڭ گاز باعاسىنىڭ نەگىزسىز كوتەرىلگەنىنە بايلانىستى تالابىن دا ەلەۋسىز قالدىردى.

بىلتىر رەسەي پرەمەرى ميشۋستين: «ءبىز قازاقستان ءۇشىن شەتەل ەمەسپىز»، - دەگەندە دە، ءبىزدىڭ مامين ءۇنسىز ماقۇلداعان.

ەسەسىنە، مامين رەسەي پرەزيدەنىنەن «دوستىق وردەنىن» العان. ايتپاقشى، بۇل اسقار ۇزاقبايۇلىنىڭ ماسكەۋدەن العان العاشقى وردەنى ەمەس. 2010 جىلى ورىس پراۆوسلاۆ شىركەۋىنىڭ نەمەسە ماسكەۋ پاتريارحاتىنىڭ «وردەن سۆياتوگو بلاگوۆەرنوگو كنيازيا دانيلا موسكوۆسكوگو» دەيتۇعىن وردەنىن تاققان. ونان سوڭ، 2019 جىلى ەاەو-نىڭ «ەۋرازيالىق ەكونوميكالىق وداقتىڭ دامۋىنا قوسقان ۇلەسى ءۇشىن» دەگەن مەدال تاققان.

جازا بەرسەڭ كوپ. وسىمەن ءتامام. اسەكەڭنىڭ اسىعىس-ۇسىگىس دۇنيە-مۇلىكتەرىن ساۋداعا شىعارعانى تەگىن بولماسا كەرەك. اسەكەڭ، قايدا اسىقتى ەكەن؟..

نۇرگەلدى ابدىعانيۇلى

Abai.kz