پرەزيدەنت توقاەۆتىڭ پەتەربۋرگ ەكونوميكالىق فورۋمىندا ايتقان ءسوزى رەسەي ساياساتكەرلەرى مەن شەنەۋنىكتەرىن تۋلاتىپ قويدى. ءتۇرلى اقپاراتتىق شابۋىل سانى ارتتى.

مىسالى رامزان قادىروۆ: "قازاقستاندى رەسەي قۇتقارىپ قالدى. قازاقستان سۋۆەرەنيتەتىن جوعالتۋ الدىندا تۇرعان ساتتە كومەكتەسكەن كىم ەدى. رەسەي. ول ەش جاسقانباستان كومەك قولىن سوزدى", - دەپ مالىمدەدى.

قادىروۆتىڭ قاڭقۋ سوزىنە ءتۇرلى تۇلعالار جاۋاپ بەرۋدە. مىسالى بەلگىلى تەلەجۇرگىزۋشى، جۋرناليست سەرگەي پونومارەۆ بىلاي دەيدى:

"رامزان قادىروۆ ءوزىنىڭ اتىشۋلى روليگىندە قازاقستاندى رەسەي قۇتقارىپ قالدى، ول سۋۆەرەنيتەتىن جوعالتۋ الدىندا تۇرعان ەدى دەيدى. اتالمىش روليكتى ماعان جان جاقتان 33 مارتە جىبەرگەن شىعار. سۋۆەرەنيتەت جايلى سوزىمەن تالاس جۇرگىزۋگە بولادى، بىراق ونىڭ ءمانىسى جوق. نە جايلى ايتقىم كەلەدى؟ ۆايناحتاردىڭ ءۇشىنشى ۇرپاعى وسىنداي ارەكەتكە بارىپ، ەستە ساقتاۋ قابىلەتىنىڭ ناشار ەكەنىن كورسەتەدى دەپ ويلاماپپىن.  1944 جىلدىڭ ىزعارلى اقپانىندا 500 مىڭ شەشەندى گيتلەر جاعىنا ءوتىپ كەتۋى مۇمكىن سەنىمسىز حالىق دەپ كەڭەستىك بيلىك ۆاگوندارعا تيەپ، تاماقسىز، كيىمسىز قازاقستانعا اتتاندىرعان ەدى.

ادامدارعا ءتىپتى تاماق الۋعا دا رۇقسات بەرمەدى، قولدارىندا نە بولدى، سول زاتىمەن قازاق دالاسىنا جونەلتىلدى. لاۆرەنتي بەريا مۇنداي وپەراتسيالاردى مەرەكە قارساڭىندا جاساۋدى جاقسى كورەتىن. حالىقتى اقپاننىڭ 23 كۇنى ۆاگونعا تيەپ، "چەچەۆيتسا" وپەراتسياسىن 9 ناۋرىزدا اياقتادى. مەن 90-جىلدارى ءبىرىنشى شەشەن سوعىسى قارساڭىندا، گروزنىيدا بولىپ، دەپورتاتسيا كۇنىندە سول جاقتان رەپورتاج جاسادىم، جەرگىلىكتى حالىقپەن سويلەستىم. دەپورتاتسيادان ءتىرى قالعان، كەيىن ەلىنە ورالعان شەشەن حالقىنىڭ بارلىعى دەرلىك قازاقتارعا العىس ايتىپ، سونداي قۇرمەتپەن قارايتىنىن ايتتى. قازاقتار دالادا قالعان شەشەن حالقىنا ءبىر ءۇزىم نانىن ءبولىپ بەرىپ، وزدەرى اشقۇرساق بولسا دا قۇتقارىپ قالدى", - دەيدى جۋرناليست.

ول شەشەنستاننىڭ ءبىرىنشى پرەزيدەنتى، گەنەرال-مايور دجوحار دۋداەۆ قازاقستان "شەشەندەردىڭ ەكىنشى وتانى" دەپ ايتقانىن ەسكە الادى.

"قازاقستان شەشەن حالقىنا باسپانا بەرىپ، نانىن ءبولىسىپ، قۇتقارىپ قالدى. تۇتاس ۇلتتى قۇتقاردى. بارلىق شەشەننىڭ قازاقستاندا اتا-باباسىنىڭ، جاقىندارىنىڭ زيراتى بار. دۋداەۆتىڭ اكەسى جەرلەنگەن. شەشەن حالقى جاقسىلىقتى ەسكە ساقتاپ، قازاق حالقىنا العىس ايتۋمەن كەلەدى. رامزان احماتۇلىنىڭ ەسىنە سونى سالىپ جىبەرسەڭىزدەر، مۇمكىن ۇياتى ويانار", - دەيدى پونومارەۆ.

Abai.kz