قازىر قازاق قوعامى، قازاقستان قوعامى كۇزدە بولاتىن پرەزيدەنتتىك سايلاۋدىڭ تالقىسىن جاساپ جاتقانى بەلگىلى. ساراپشىلار مەن قوعامنىڭ سەرگەك سانالى ازاماتتارى سايلاۋعا ءتۇسۋى مۇمكىن ىقتيمال ۇمىتكەرلەردىڭ ءتۇر-ءتۇسىن انىقتاۋعا دا بەلسەنە كىرىسىپ كەتكەن.

ازىرگە پرەزيدەنت توقاەۆتىڭ بۇل سايلاۋعا قاي پارتيا نەمەسە قوعامدىق ۇيىم اتىنان ۇسىنىلاتىنى بەلگىسىز. پرەزيدەنت توقاەۆ ەكس-پرەزيدەنت نازارباەۆتان مۇراعا قالعان، بيلىكتەگى بومينانت پارتيا سانالاتىن – بۇرىنعى نۇر وتاننىڭ، قازىرگى اماناتتىڭ قۇرامىنان شىعۋ تۋرالى شەشىم قابىلداعان ەدى.

ال بۇگىن وتكەن پارلامەنت سايلاۋىنا «قازاقستان حالىق پارتياسى» دەپ، پارتيا اتاۋىنا رەبرەندينگ جاساپ كىرگەن بۇرىنعى كوممۋنيستەر بۇگىنگى جولداۋدان كەيىن ەدەل-جەدەل مالىمدەمە جاساپ، پورتالىمىزدىڭ ەلەكتروندىق پوشتاسىنا جولداپتى.

بۇيدەيدى:

قازاقستان حالىق پارتياسىنىڭ مالىمدەمەسى

قازاقستان حالىق پارتياسى مەملەكەت باسشىسىنىڭ قازاقستان حالقىنا بۇگىن جولداعان جولداۋىندا جاريالانعان ساياسي وزگەرىستەردى تولىق قولدايدى.

بۇل - جاڭا ادىلەتتى قازاقستان قۇرۋدىڭ بەرىك ىرگەتاسىن قالايتىنىنا شىن جۇرەكتەن سەنەمىز.

رەفەرەندۋمنان كەيىن پارتيا مەرزىمىنەن بۇرىن پارلامەنت ءماجىلىسىنىڭ سايلاۋىن وتكىزۋدى قولدادى. ءبىز ساياسي باسەكەلەستىكتىڭ كۇشەيگەنىن جانە ساياسي پارتيالار سانىنىڭ ارتقانىن قۇپتايمىز.

قازاقستان حالىق پارتياسى سايلاۋعا دايىن، جەڭىسكە جەتۋدى جانە حالىق سەنىم ارتاتىن ۇكىمەت قالىپتاستىرۋدى جوسپارلاپ وتىر. حالىقتىڭ قولداۋىنا يە باسقارۋشىلاردىڭ جاڭا تولقىنى پرەزيدەنت جولداۋىندا ايتىلعان الەۋمەتتىك-ەكونوميكالىق رەفورمالاردى ءتيىمدى جۇزەگە اسىراتىنىنا سەنىمدىمىز.

كەزەكتەن تىس پرەزيدەنت سايلاۋىندا، ءبىز بۇرىن مالىمدەگەندەي، قازىرگى مەملەكەت باسشىسى قاسىم-جومارت توقاەۆتىڭ كانديداتۋراسىن قولدايمىز.

Abai.kz