وزبەكستان پرەزيدەنتى شاۆكات ميرزيەەۆ قازاقستان باسشىسى قاسىم-جومارت توقاەۆپەن تەلەفون ارقىلى سويلەستى. اڭگىمە بارىسىندا ميرزيەەۆ قوستاناي وبلىسىنداعى ورمان ورتىنە بايلانىستى قازاقستان باسشىسىنىڭ ارەكەتتەرىن قولدايتىنىن، سونداي-اق توتەنشە جاعدايدىڭ سالدارىن جويۋعا قاجەتتى كومەك كورسەتۋگە دايىن ەكەنىن جەتكىزدى.

ەكى ەل پرەزيدەنتتەرى وزبەك-قازاق اراسىنداعى تاتۋ كورشىلىك، ستراتەگيالىق سەرىكتەستىك پەن وداقتاستىق قاتىناستارىن نىعايتۋ، ەكىجاقتى ىنتىماقتاستىقتىڭ باسىم باعىتتارى بويىنشا پراكتيكالىق ءوزارا ءىس-قيمىلدى كەڭەيتۋ ماسەلەلەرىن تالقىلادى.

ساۋدا، ونەركاسىپ، ەنەرگەتيكا، كولىك-لوگيستيكا، اۋىل شارۋاشىلىعى جانە ەكونوميكانىڭ باسقا دا سالالارىنداعى ىنتىماقتاستىق جوبالارىن جۇزەگە اسىرۋعا ەرەكشە نازار اۋدارىلدى.

سونداي-اق ايماقتىق ماسەلەلەر بويىنشا پىكىر الماسۋ بولدى. وسى ايدا سامارقاندتا وتەتىن شانحاي ىنتىماقتاستىق ۇيىمىنىڭ الداعى ءسامميتىنىڭ كۇن ءتارتىبى تالقىلاندى.

Abai.kz