كەزەكتى پرەزيدەنت سايلاۋىنا توقاەۆتەن باسقا قازىرگى كۇنگە دەيىن ءۇش ۇمىتكەر انىقتالدى. "اۋىل" پارتياسىنان جيگۋلي دايراباەۆ (67 جاس), جسدپ-دان نۇرلان اۋەسباەۆ (63 جاس), "امانات" كاسىپوداق دوستاستىعى قوعامدىق ۇيىمىنان مەيرام قاجىكەن (61 جاس). ايتىپ-ايتپاي الپىستاعىلار كوش باستاپ تۇر. پرەزيدەنتتىكتەن دامەلىلەر قاتارىنا قوسىلاتىندارعا ساۋەگەيلىك جاساۋدان بۇرىن، تاۋەلسىز مەملەكەتىمىز تاريحىندا كىمدەردىڭ ەل باسقارۋعا ءوتىنىش بىلدىرگەنىن شولىپ وتسەك.

تاۋەلسىزدىكتىڭ العاشقى جىلدارى ايدىك ولجاس اقىن نازارباەۆپەن باسەكەلەس بولام دەپ "گۋر" ەتتى دە، ارتىنان باسىلدى. كەڭەس كەزىندە-اق، تاۋەلسىزدىك كۇرەسىنە اتتانعان قاسەن قوجاحمەت كوكەمىز دە پرەزيدەنتتىكتەن دامەسىن ءالى ۇزبەي كەلەدى.

ودان كەيىن ەل ەسىندە قالعاندار: مارقۇم سەرىكبولسىن ءابدىلدين، جارماقان تۇياقباەۆ، ءاليحان بايمەنوۆ، مەلس ەلەۋسىزوۆ، عاني قاسىموۆ، ەنگەلس عابباسوۆ، ەكس-مينيستر مادينا ابىلقاسىموۆانىڭ اكەسى ەراسىل ابىلقاسىموۆ، كوممۋنيستەر جامبىل احمەتبەكوۆ، تۇرعىن سىزدىقوۆ، ابىلعازى قۇسايىنوۆ، 2019 جىلعى سايلاۋدىڭ كوركىن قىزدىرعان ءامىرجان قوسانوۆ، نازىك جاندى دانيا ەسپاەۆا، سادىبەك تۇگەل، تولەۋتاي رايىمبەكوۆتار بار. "جىعىلعان كۇرەسكە تويمايدى" دەمەكشى ءار جىلدارى تىركەۋدەن وتپەي قالعان جاسارال قۋانىشالين، ۋاليقان قايسارلار بيىل دا ۇمتىلىپ كوردى.

ساياسي اتموسفەراسى اۋمالى-توكپەلى دەموكراتيالى ەلدەرمەن سالىستىرعاندا 32 جىلداعى كانديداتتار سانى كوپ تە ەمەس. ماسەلە سان دا ەمەس، ساياسي امبيتسيادا. ەكى-اق، پارتيا (رەسپۋبليكاشىلدار مەن دەموكراتياشىلدار) سايلاۋ كورىگىن قىزدىراتىن اقش-تان پارتيا سانىمەن وزىپ تۇرمىز.

وكىنىشكە وراي كوبىنىڭ اتى بار دا ناقتى ارەكەتى جوق. سايلاۋ كەزىندە عانا ەل مۇدەسى، تاعدىرى ەستەرىنە تۇسەدى. بيىلعى الپىستىقتاردىڭ ەلگە ۇسىنار باعدارلامالارى ءالى بەلگىسىز. بىلە-بىلسە قازىرگى الما عايىپ گەوساياسي جاعدايدان تۋىنداعان ەكونوميكالىق، الەۋمەتتىك جاعداي، ونى شەشۋ جولى كىم-كىمگە دە ءوزىن كورسەتۋگە جاقسى وراي بولىپ تۇر.

حالىق ەلدەگى قۇردەلى ماسەلەلەر تۋرالى ءار قايسى ۇمىتكەرگە سۇراق قويعىسى، جاۋابىن ەستىگىسى كەلەدى. ولاردىڭ سايلاۋ باعدارلامالارىندا كوپتىڭ كوكەيىندەگى ماسەلەلەر قامتىلۋى كەرەك. قازىر قاتىسقانىن جەڭىس كورەتىن ۋاقىت ەمەس. حالىقتىڭ سەنىمىنە سەلكەۋ تۇسىرسە جاڭا قازاقستاننىڭ ەمەس، نازارباەۆتىڭ زامانىنداعى كوپ سايلاۋدىڭ ءبىرى بولىپ تاريحتا قالارى انىق.

Abai.kz