جەكسەنبى, 4 جەلتوقسان 2022
قاۋىپ ەتكەننەن ايتامىن 1636 2 پىكىر 3 قازان, 2022 ساعات 11:54

قازاققا قارسىلار تايراڭداي بەرە مە؟

قازىر تەك كوكىرەگى سوقىر ادام عانا «قازاقستاندا 130 ۇلت پەن ۇلىس بار» دەگەن ءوڭى اينالعان «كەڭەستىك ميفككە» سەنەدى. قازاقستاندا تەك ءناسىل مەن دىنگە، ۇلت پەن دىلگە بولىنبەيتىن ءبىر ءتىلدى، قوس ءتىلدى جانە ءۇش ءتىلدى الۋمەتتىك توپ قانا بار.

ۇيعىر، تاجىك جانە وزبەك اعايىندار عانا وزدەرىن سوڭعى ءۇش ءتىلدى الەۋمەتتىك توپقا جاتقىزادى. قازاقتان وزگە قالعان ۇلت پەن ۇلىستار عانا ءبىر ءتىلدى، ياعني، ورىس ءتىلدى قازاقستاندىقتاردى قۇرايدى. سوندا كۇندەلىكتى ومىردە ورىس ءتىلىن قولدانباي قازاقپەن قازاقشا سويلەسەتىن ۇيعىر، تاجىك جانە وزبەك اعايىندار اقىماق پا؟ الدە انا تىلىنەن وزگە ورىس ءتىلىن دە بىلەتىن قازاقتار جۇزقارا ما؟

ەل ىشىندە ۋكرايناداعى قاندى قاساپتان كەيىن ءبىر ءتىلدى الەۋمەتتىك توپ قاققا جارىلىپ، ءبىرجولاتا قازاق جانە ورىس بولىپ بۇلىنە باستاعان فاكتوردى جوعارىدا وتىرعاندار نەگە كورگىسى كەلمەيدى؟ قازاق ءوز تىلىندە ءجون سۇراسا ۇلتشىل، «ناتسيك»، ۋكرايناداعى جاعدايدى تۋىنداتۋشى ارانداتۋشى. ال، وسى ورىس ءتىلدى الەۋمەتتىك توپ رەسەيلىك ۇگىتتەن تۋىنداعان «رف ۋكراينامەن ەمەس، ناتو-مەن سوعىسىپ جاتىر» دەگەن ەرتەگىگە مالدانىپ، «مەملەكەتتىك تىلدە سويلەۋدى تالاپ ەتكەندەردى» «ناتسيك، كازاحوفاشيست» دەپ اعاش اتقا مىنىگىزە باستادى.

رەسمي ءتىلدى الەۋمەتتىك توپ «ورىس الەمىنەن» ەلىمىزگە اعىلعان رەسەيلىكتەردى  ارقا تۇتىپ، قازاقستاندا جۇرت ءبىر-بىرىمەن تۇسىنىسەتىن ءتىل - «ورىس ءتىلى» دەپ، اقپاراتتىق مايداندى باستاپ كەتتى. رەسەي بارلاۋى ەندى ەلىمىزدەگى ورىس تىلدىلەر اراسىنان مۇسىلمان تۇركىلەردى اللاسىن اۋىزعا العىزىپ، اقپاراتتىق ديۆەرسياعا كەڭىنەن تارتا باستاعانى جاسىرىن ەمەس. قازاق انا تىلىندە وزگە ۇلتپەن سويلەسسە ول قىلمىس ەكەن. جۇرتتىڭ ءبارى ءوزارا تەك ورىس تىلىندە قارىم-قاتىناس جاساماسا، تۋرا ۋكرايناداعىداي جاعداي ورىن الادى-مىس. قازاق جەرىنە ناتو تۋىن تىگەدى-ءمىس دەگەن جەل ءسوز گۋلەۋدە. بۇل ەرتەگىگە سەنەتىن ورىس ءتىلدى وتانداستارىمىز جەتىپ ارتىلادى.

سوندا قازاق ءوز ەلىندە، ءوز جەرىندە قازاقشا سويلەمەسە قاي جەردە سويلەۋى كەرەك دەگەن زاڭدى ساۋال تۋىندايدى. ءبىز تومەندە تيك-توكتا aneva77767 دەپ تىركەلگەن تۇركىمەنستاندىق وزبەكتىڭ قازاق پەن ۋكراين ۇلتىنا قانى قاس جاننىڭ اۋديوجازباسىنىڭ ءبىرىن Abai.kz وقىرماندارى نازارىنا ۇسىنىپ وتىرمىز.

ويلانايىق، اعايىن! سۋىڭدى ءىشىپ قۇدىعىڭا تۇكىرۋشىلەر ورىس تىلدىلەر اراسىندا تولىپ جاتىر. رەسمي ءتىل مەملەكەتتىك ءتىلدىڭ مىسىن باسىپ، اتا زاڭىمىزدا قالا بەرسە، ەلاراسى مۇلدەم بۇلىنەتىنىن ەستەن شىعارمايىق!

قازاقستانداعى تۇراقتىلىقتى وزگەلەرمەن ازىرشە ورىسشا سويلەسەتىن قازاقتار عانا ساقتاپ وتىر. ولاردىڭ ەندىگى جەردە وزگەلەرمەن تەك انا تىلىندە عانا قارىم-قاتىناس جاساعاسى كەلەتىنىنە ەشكىم توسقاۋىل بولا المايدى. بيلىك وسىنى ۇعىنسا، كوپ نارسەنىڭ الدىن الامىز. تىلدىك تاۋەلسىزدىك الماي، ءبىز ەل بولمايمىز!

ءابىل-سەرىك الىاكبار

Abai.kz

2 پىكىر

ۇزدىك ماتەريالدار

قۇيىلسىن كوشىڭ

قانداستار قازاققا، قازاقستانعا نە بەردى؟

رايىس ءارىپجانۇلى 2217
الاشوردا

تۇركىلىك تەك جانە تۇركى-موعول بىرلىگى

ءجادي شاكەنۇلى 1049
قاۋىپ ەتكەننەن ايتامىن

گازدىڭ گەوساياسي «گەموررويى»

ءامىرجان قوسان 1237