اۋدارماشىدان:

وشو حح عاسىردىڭ ويشىلى، كەمەڭگەرى اتانعان ادام. ميستيك، فيلوسوف، ۇستاز. ءبىزدىڭ زامانداسىمىز. ول شىعىستىڭ دانالىعىمەن بۇگىنگى باتىستىڭ تەحنولوگيالىق قۋاتىن ۇندەستىرىپ ءومىر تۋرالى پايىمداۋلارعا ىزگىلىكتى ويلار سىڭىرۋگە بەل بۋعان  تۇلعا. قاتىگەزدەنىپ العان ادامزات قوعامىنا وشو جاراتىلىستىڭ جاۋھار ارالدارىن اشىپ، باۋىرمالدىققا شاقىرادى. وشونىڭ ويلارى ءبىزدىڭ وقىرماننىڭ جاندۇنيەسىن دە نۇرلاندىرار دەگەن نيەتپەن انا تىلىمىزگە اۋدارىپ بەرىپ وتىرمىز.

اۋدارماشىدان:

وشو حح عاسىردىڭ ويشىلى، كەمەڭگەرى اتانعان ادام. ميستيك، فيلوسوف، ۇستاز. ءبىزدىڭ زامانداسىمىز. ول شىعىستىڭ دانالىعىمەن بۇگىنگى باتىستىڭ تەحنولوگيالىق قۋاتىن ۇندەستىرىپ ءومىر تۋرالى پايىمداۋلارعا ىزگىلىكتى ويلار سىڭىرۋگە بەل بۋعان  تۇلعا. قاتىگەزدەنىپ العان ادامزات قوعامىنا وشو جاراتىلىستىڭ جاۋھار ارالدارىن اشىپ، باۋىرمالدىققا شاقىرادى. وشونىڭ ويلارى ءبىزدىڭ وقىرماننىڭ جاندۇنيەسىن دە نۇرلاندىرار دەگەن نيەتپەن انا تىلىمىزگە اۋدارىپ بەرىپ وتىرمىز.

شىعىس كۇللى تىرشىلىكتى ورمەكشىنىڭ تورىنا ۇقساتادى. ەگەر نازىك ءبىر قىلىنا قولىڭ تيسە بولدى، ءبۇتىن تور سەتىنەپ كەتۋگە بار. جاسىل القاپتى كومكەرگەن وسكىننىڭ بىرەۋىنە، تەك بىرەۋىنە جۇعىششى، ۇلى جۇلدىزعا، ەڭ الىس تۇكپىردەگى تۇڭعيىق جۇلدىزعا سامعاپ بارىپ قول جەتكىزەسىڭ، ويتكەنى ءبۇتىن دۇنيە تۇتاس ءبىر اعزادان تۇرادى، وندا شەتىن نارسە جوق. تەك ادام بالاسىنداعى كىساپىرلىك قانا مەنمەندىك دەگەن بىتىمسىزدىككە بوي الدىرعان. ادام ءوزى جاساپ العان، ءوزىن ءوزى باسى ءبۇتىن بايلاپ  بەرگەن ايداۋدا ءومىر سۇرەدى. ءسىز ماڭايىڭىزعا تاس قامالدار سوعىپ، تار ءام تۇيىق كەڭىستىكتە بارىنەن الاستالعانداي تىرشىلىك كەشىپ كەلەسىز.  سوندىقتان ءسىز جاپا شەگۋدەسىز، سوندىقتان ءسىز ءوزىڭىزدى باقىتسىز بەيباق سەزىنەسىز. ومىردەن ءمان اڭعارىپ، تىرلىكتەن ماعىنا تۇيە المايسىز. قازىر ءسىز تامىرىنان ءۇزىلىپ، جەر بەتىنەن كوشكەن سۇلدەرىڭىزدى سۇيرەتىپ جۇرگەن كۇيدەسىز. بەيۋاقتا سالاڭ ەتىپ كەلە سالعاندايسىز، قادىرى كەم قاجەتسىز جاندايسىز، ءسىزسىز دە مىناۋ دۇنيە جالعاسىپ، ءسىزدىڭ بار جوعىڭىزعا قاراماي سىرعي بەرەتىن سياقتى. وسىنىڭ ءبارى جانىڭىزعا ايىقپاس جارا سالعان. ءسىز بار ۇمىتتەن اقتالىپ، كۇش قايراتىڭىزدى كۇدەرمەن كۇرمەپ قويدىڭىز. وزىڭىزگە دەگەن سەنىمنەن جۇردايسىز. ءسويتىپ جارىق دۇنيەدەگى ەڭ كەرەكسىز، قاجەتسىز، وڭعاق زاتقا اينالىپ تىنعانسىز. ال بار عوي، وسىنىڭ ءبارى ءسىزدىڭ ىشىڭىزدەگى مەنمەندىكتەن عانا ورىن تاۋىپ جانىڭىزدان جاعالاسىپ قالماي ءجۇر. ەگو - بۇل تۇتاستىقتان  ىرگەنى اۋلاق سالۋ، مۇمكىن بولماسا دا بۇتىننەن كوشۋ، اقىرىندا  بايانى اۋعان دۇنيەدە عۇمىر كەشۋدىڭ سىباعاسى. وسى سەبەپتەردەن بولىپ، ءسىز ءوزىڭىزدى  تامۇق ءومىردىڭ تۇتقىنى ەتىپ قويعانسىز. تامۇقتىڭ تۇرعىنى ەكەندىگىڭىزگە يلانىپ تا قويعانسىز.  مەنمەندىكتەن قۇتىلىڭىز، سول زاماتتا ءسىز ءبۇتىن دۇنيەنىڭ سىزگە ءبىتۋاجا ايتىپ تۇرعانىن، ءسىز بەن  كۇللى جاراتىلىستىڭ بىرلىگىن ايگىلەيتىن ىزگى حابارلاردىڭ كوپتىگىن، ول حابارلاردىڭ كۇن سايىن، ءسات سايىن ەسەلەنە تۇسەتىنىن اڭعاراسىز. بال كومەي قۇستار سىزگە دانالىقتى، تۇنگى تۇنىق جۇلدىزدار سىزگە ءىلىمدى ۇيرەتەدى. جاراتىلىس كەمەڭگەر كىتاپقا، ناعىز كيەلى كىتاپقا اينالادى. مەنمەندىكتى تارىك ەتىڭىز، سول ۋاقىتتا سىزگە سارعايعان، كەمىتىلگەن جازبالارعا شارت جۇگىنۋدىڭ قاجەتتىلىگى ازايىپ، جارىق دۇنيە كىتاپ بەتىندەي سۋدىرلاپ اشىلا تۇسەدى. راسىمدەر مەن جورالعىلار بار ماڭدا ورىندالىپ، بار ماڭنان ءسىز كەلەلى اڭگىمە، كەلىسىمىن تاپقان ءان ەستيسىز.

جاراتىلىسقا ءۇنسىز سىڭگەن ءجون; كۇبىرلەۋگە دە بولمايدى. الدەنە ايتۋدىڭ دا قاجەتى شامالى. سيىنۋ مەن جالبارىنۋ - تىڭداپ ۇيرەنۋ. ەگەر ءسىز سويلەي باستاساڭىز، ءسىزدى كىم تىڭدايدى؟ ەگەر ءسىز سويلەي جونەلسەڭىز، سوزگە اۋەيلەنسەڭىز، ءسىزدى كىم تىڭدايدى؟ ويتكەنى راحمان نۇرىنداي ساۋلاعان ىزگى تىلەكتەر ۇزىلمەي كەلىپ جاتىر.

ءاربىر ءسات ءسىز ءۇشىن ساۋلەسىن شاشسىن دەسەڭىز، ءاربىر ءسات گاۋحارلانا ءتۇسسىن دەسەڭىز، عۇمىرىڭىز ساتتىلىكتەردىڭ التىن ارناسىنا اينالىپ ءوتسىن  دەسەڭىز، شاتتىقپەن ءومىر ءسۇرىڭىز، شات-شادىمان جايدارى كۇندەر كەشىڭىز.

ونداي ادام ولمەك ەمەس. ونىڭ قولى تيگەن دۇنيەگە ماڭگىلىك  داريدى.

حح حح حح

ءتايىرى، ادام وزىنە بەرىلگەن كەلتە ومىردەن  جۇماقتىڭ ءتورىن جاساپ السا بولادى. سەبەبى ءبىزدىڭ جەر-انا - جۇماقتىڭ ءوزى عوي.

حح حح حح

اينىماستىق  ءىشىڭدى اقتارىپ، قاجىرىڭ مەن قايراتىڭدى قاتار جۇمساپ، اقىل تۇيسىگىڭدى دامىتىپ سايكەستەندىرگەندە بەكي تۇسەدى.

حح حح حح

ءسىز داراق ەمەس، ءدان بولىپ جاراتىلعانسىز. سىزگە ءونىپ-ءوسۋدىڭ مۇمكىندىگى بەرىلگەن، وسى مۇمكىندىك ءسىزدىڭ كوسەگەڭىزدى كوگەرتەدى، سول عانا ءسىزدىڭ مەيماناڭىزدى تاسىتىپ، جانىڭىزدى راحاتقا بولەيدى. جايقالىپ جاپىراق جايۋدىڭ بيلىككە، دۇلەي كۇشكە، اقشا مەن ساياساتقا ەش قاتىسى جوق. ول ءسىزدىڭ ىشكى الەمىڭىزدە جاڭعىرادى، ول سىزگە عانا ءتان دامۋدىڭ ولشەمى. ءسىز ءوز جانىڭىزدان قۋانىش تابا ءبىلۋىڭىز كەرەك.

حح حح حح

قاندايدا ءبىر قاتەلىك - ساباق الۋدىڭ مۇمكىندىگى. تەك ءبىر ىستەگەن قاتەڭدى قايتالاي بەرمە - ول اقىماقتىق. الايدا جاڭا قاتەلىككە ۇرىنساڭ، وڭباي ۇرىن، قورىقپا، سەبەبى تابيعاتتان ۇيرەنۋدىڭ بىزگە بەرىلگەن جالعىز امالى وسى.

حح حح حح

عالامنىڭ ءىلىمىن مەڭگەرۋ - ىشكى الەمىڭنىڭ قۇپياسىن تانىپ جەتىلۋدىڭ قاسىندا تۇكتە ەمەس.

(جالعاسى بار)

وشو، «زولوتىە سامورودكي».

ورىس تىلىنەن اۋدارعان داۋرەن قۋات

"Abai.kz"