قازاقستاننىڭ ەكس-پرەزيدەنتى نۇرسۇلتان نازارباەۆ شۇعىل تۇردە اۋرۋحاناعا جەتكىزىلدى. ونىڭ جۇرەگىنە وتا جاسالۋى مۇمكىن.

بۇل تۋرالى پرەزيدەنت «پۋلىندا» كوپ جىلدان جۇمىس جاساعان، «حاباردىڭ» بۇرىنعى باسشىسى، جۋرناليست الەكساندر اكسيۋتيتس جازدى.

نۇرسۇلتان نازارباەۆ قازىر استاناداعى اۋرۋحانالاردىڭ بىرىنە جەتكىزىلگەن. ونىڭ جاعدايىن كارديوحيرۋگتار باقىلاۋدا.

جاقىندا عانا «تۇڭعىش پرەزيدەنت – ەلباسى زاڭىنىڭ» كۇشى جويىلعانى، نازارباەۆتىڭ «قۇرمەتتى سەناتور» مانداتىنان ايىرىلعانى بەلگىلى. سونى مەڭزەگەن كەي جۋرناليستەر وسىلاردىڭ ءبارى بيىل 6-شىلدەدە 83-كە تولاتىن نازازارباەۆتىڭ جۇرەگىنە سالماق سالعان بولۋى مۇمكىن دەپ ءوز دولبارلارىن ايتۋدا. دەنساۋلىق مينيترلىگى ەشقانداي اقپارات تاراتپادى.

«قاسىرەتتى قاڭتار» وقيعاسىنان كەيىن ەل الدىنا شىعىپ، ءوزىنىڭ ەشقايدا كەتپەگەنىن، زەينەتتە ەكەنىن ايتىپ، ۆيدەو مالىمدەمە جولداعان ەكس-پرەزيدەنت كوپ كوزىنە ءجيى كورىنە قويعان جوق.

ەرتە كوكتەمدە تۇركياعا، كەيىن ماسكەۋگە بارىپ پۋتينمەن كەزدەسكەنى ءبىرتالاي ءسوز بولدى. استاناداعى ورتا ازياداعى ەڭ ۇلكەن مەشىتتىڭ اشىلۋ سالتاناتىنا قاتىناسقانى دا «ديۆان ساراپشىلارىنىڭ» نازارىن اۋداردى. ودان كەيىن توقاەۆتىڭ سالتاناتتى انت بەرۋ مۇراسىمىندە بوي كورسەتتى. سوڭعى كەزدە اللا ءۇيى - مەشىتكە ءجيى بارىپ جۇرگەنى ءسوز بولىپ ءجۇردى.

وتكەن بارىس جىلى قوعام جاپپاي قازاقستاننىڭ نازارباەۆ باسقارعان وتىز جىلدىق بەلەسىنە قايتا باعا بەرگەن وزگەرىس جىلى بولدى. سونىڭ ءبارىن كوزىمەن كورىپ وتىرعان ادامعا ونى قابىلداۋ، وتكەنىنەن قورتىندى شىعارۋ، جاقسى-جامانىن تارازىلاۋ وڭايعا سوقپاسى انىق.

قوسىمشا:

ەكس-پرەزيدەنت نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي جوعارىداعى اقپاراتقا قاتىستى تۇسىنىكتەمە بەردى.

«وتا ويداعىداي ءوتتى. تۇڭعىش پرەزيدەنتتىڭ ومىرىنە قاۋىپ ءتونىپ تۇرعان جوق. قازىر ول دارىگەرلەردىڭ قاداعالاۋىندا. وپەراتسيا ۇلتتىق عىلىمي كارديوحيرۋرگيا ورتالىعىندا تانىمال كارديوحيرۋرگ يۋ.پيانىڭ جەتەكشىلىگىمەن جاسالدى»، - دەدى ۇكىباي.

Abai.kz