گۋتەرريشتىڭ ايتۋىنشا، اتالعان ينستيتۋتتار 1945 جىلى قۇرىلعان كەزدەگى الەم قۇرىلىمىنا سايكەس ۇيىمداستىرىلعان. سودان بەرى ولار ەسكىرىپ، ءتيىمسىز جۇمىس ىستەي باستاعان.

"عالامدىق قارجى ارحيتەكتۋراسى ەسكىردى، مىندەتىن ورىنداۋدان قالدى جانە ادىلەتسىز. كوروناۆيرۋس پاندەمياسىنان كەيىنگى ەكونوميكا داعدارىسى مەن رەسەيدىڭ ۋكرايناعا باسقىنشىلىعىنا تاپ بولعان ۇيىمدار ءوزىنىڭ نەگىزگى مىندەتىن ورىنداي المادى" دەدى بۇۇ باس حاتشىسى.

گۋتەرريش بۇعان دەيىن دە ءوزى باسقاراتىن ۇيىمنىڭ قۇرىلىمىن سىناعان.

"قاۋىپسىزدىك كەڭەسى سوعىستىڭ الدىن الۋ ءۇشىن جانە اياقتاۋ ءۇشىن قولىنان كەلگەن بار نارسەنى جاسادى دەپ ايتا المايمىن. بۇعان قاتتى كوڭىلىمىز تولمايدى، ءتىپتى اشۋ شاقىرادى" دەگەن ەدى ول 2022 جىلى كيەۆكە ساپارىندا.

بۇۇ قاۋىپسىزدىك كەڭەسى 1945 جىلى قۇرىلعان. بۇۇ جارعىسىنا سايكەس، ونداعى شەشىمدەردىڭ بارلىعى وعان مۇشە ەلدەردىڭ كەلىسىمىمەن قابىلدانادى. ونىڭ تۇراقتى بەس مۇشەسى بار: اقش، ۇلىبريتانيا، فرانتسيا، رەسەي جانە قىتاي. بۇعان قوسا، 10 تۇراقتى ەمەس مۇشەسى بار.

كەيىنگى كەزدە رەسەي ۆەتو قويۋ مۇمكىندىگىن پايدالانىپ، حالىقارالىق قاۋىمداستىقتىڭ وزىنە ءتيىمسىز ۇسىنىستارىن كەرى قايتارىپ كەلەدى.

2022 جىلى جەلتوقساندا ۋكراينا رەسەيدى بۇۇ قاۋىپسىزدىك كەڭەسىنىڭ تۇراقتى مۇشەلەرى قاتارىنان الىپ تاستاۋعا جانە ونى بۇۇ قۇرامىنان شىعارۋعا ۇندەگەن. الايدا بۇۇ جارعىسى بويىنشا ونى رەسەيدىڭ كەلىسىمىنسىز جاساۋ مۇمكىن ەمەس.

برەتتون-ۆۋد جۇيەسى – 1944 جىلى قابىلدانعان اقشا قاتىناسى مەن ساۋدا ەسەبىن ۇيىمداستىرۋ بويىنشا قۇرىلعان حالىقارالىق جۇيە. ول الەم ەلدەرىنىڭ قارجىلىق قاۋىپسىزدىگى مەن ۆاليۋتا بويىنشا ارىپتەستىگىن قامتاماسىز ەتۋگە باعىتتالعان حالىقارالىق قايتا قۇرۋ جانە دامۋ بانكى جانە حالىقارالىق ۆاليۋتا قورى سياقتى ۇيىمداردىڭ قۇرىلۋىنا مۇرىندىق بولعان.

Abai.kz