بۇعان دەيىن قازاقستاننان تۇركياعا ۇشىپ بارعان قايرات ەرلىبەك ءوزىن اۋەجايدان ءارى قاراي وتكىزبەي تۇرعانىن حابارلاپ، كومەك سۇراعان ەدى.

اينا شورمانباەۆانىڭ ايتۋىنشا، قايرات تۇرلىبەك بۇۇ-نىڭ ارالاسۋىمەن شەكارادان امان-ەسەن وتكەن.

– قازىر ول قولىنداعى قۇجاتىنا شتامپ باسقىزىپ، شەكارادان ءوتتى. ەندى وعان تۇركيادان بوسقىن مارتەبەسىن الىپ بەرۋگە كومەكتەسەتىن ادۆوكات ىزدەپ جاتىرمىن. بۇل ءىس مەنىڭ تىكەلەي ارالاسۋىممەن شەشىلدى، – دەدى 14 ماۋسىمدا تۇستە اينا شورمانباەۆا ازاتتىق تىلشىسىنە.

ءبىر كۇن بۇرىن الەۋمەتتىك جەلىدە جاريالانعان ۆيدەودا قايرات ەرلىبەك "مەن قىتايدان كەلگەن قازاقپىن. ۇلتىم دا – قازاق. پرەزيدەنتىم دە – قازاق. بىراق قازاقستاننان ەشقانداي مارتەبە الا المادىم. پانا ىزدەپ تۇركياعا كەلىپ ەدىم، ارى قاراي كەتىپ قالۋعا مۇمكىندىك بولمادى" دەپ مالىمدەگەن ەدى. ول قازاقستان بيلىگىنەن بوسقىن مارتەبەسىن سۇراعانىن قۇقىق قورعاۋشىلار دا راستاعان.

قايرات ەرلىبەكتىڭ الماتى وبلىسىندا تۇراتىن اپكەسى ماقپال تۇرلىبەكتىڭ ايتۋىنشا، ءىنىسى تۇركيا ارقىلى كاناداعا بارىپ، سول جەردەن بوسقىن مارتەبەسىن الماق بولعان.

قايرات ەرلىبەك 1989 جىلى قىتايدىڭ شىڭجاڭ ولكەسىندە دۇنيەگە كەلگەن. 2009 جىلى قازاقستانعا كوشىپ كەلگەن.

ول بىلتىر كۇزدە ازاتتىققا حابارلاسىپ، "2009 جىلى قۇجاتتارىن جوعالتىپ العانىن، قولىندا قىتايدىڭ الماتىداعى كونسۋلدىعى بەرگەن جول ءجۇرۋ بيلەتى مەن الماتى وبلىستىق جۇمىسپەن قامتۋ جانە الەۋمەتتىك باعدارلامالار باسقارماسى بەرگەن "پانا ىزدەۋشى تۇلعا" كۋالىگىنىڭ عانا بار ەكەنىن، سوڭعى قۇجاتتى ەكى مارتە ۇزارتقانىن ايتقان" بولاتىن. ونىڭ "پانا ىزدەۋشى تۇلعا" كۋالىگىنىڭ مەرزىمى بيىل شىلدەنىڭ اياعىندا بىتەدى.

ازاتتىق قايرات ەرلىبەككە قاتىستى اقپاراتتى قازاقستان ىشكى ىستەر مينيسترلىگىنەن الۋعا تىرىسىپ جاتىر.

2016 جىلدان بەرى شىڭجاڭداعى از ۇلتتارعا قىسىم كورسەتىلە باستاعانى حابارلانعان. سول كەزدە بىرنەشە قازاق قازاقستانعا باس ساۋعالاپ قاشىپ كەلگەن بولاتىن. سولاردىڭ اراسىنان سايراگۇل ساۋىتباي شۆەتسيادان بوسقىن مارتەبەسىن السا، قازاقستان بيلىگى قايشا اقان، قاستەر مۇساحان، مۇراگەر ءالىم مەن باعاشار مالىكۇلىنا بوسقىن مارتەبەسىن بەرگەن.

Abai.kz