قازاقستان پرەزيدەنتى قاسىم-جومارت توقاەۆقا!

مەن، قازاقستان رەسپۋبليكاسى پرەزيدەنتىنىڭ جانىنداعى ۇلتتىق قۇرىلتايدىڭ مۇشەسى رەتىندە، مەملەكەت باسشىسى، ۇلتتىق قۇرىلتايدىڭ توراعاسى قاسىم-جومارت كەمەلەۇلى توقاەۆتان 2023 جىلدىڭ 11-ءشى شىلدەسىندە قاڭتار وقيعاسى كەزىندە «اۋەجايدى باسىپ الۋ ءىسى» بويىنشا سوتتالعان جۋرناليست ايگەرىم تىلەۋجانعا، بەلسەندى قالاس نۇرپەيىسوۆكە، نۇرلان دالىباەۆقا، ەرمۇحامەت شيلىباەۆقا جانە جانايدار كارمەنوۆكە شىعارىلعان ۇكىمدى ەگجەي-تەگجەيلى زەرتتەپ، وسى ىسكە ەرەكشە نازار اۋدارۋىن سۇرايمىن.

جانە دە اتا زاڭىمىزدا بەلگىلەنگەن «حالىق پەن مەملەكەتتىك بيلىك بىرلىگىنىڭ، كونستيتۋتسيانىڭ مىزعىماستىعىنىڭ، ادام جانە ازاماتتىڭ قۇقىقتارى مەن بوستاندىقتارىنىڭ نىشانى جانە كەپىلى» رەتىندە پرەزيدەنتىمىزدەن جوعارىدا اتالعان ازاماتتارعا اراشا ءتۇسۋىن جانە راقىمشىلىق جاساۋىن سۇرايمىن.

سونىمەن قاتار، ەلگە جاناشىر قوعام بەلسەندىلەرىنە ەمەس، كەرىسىنشە ادىلەتتى قازاقستان قۇرۋ يدەياسىنا، ونى ۇسىنعان پرەزيدەنتكە قارسى استىرتىن ارەكەتتەر جاساپ وتىرعان مىسىقتىلەۋ تۇلعالار مەن كۇشتەردى ءادىل انىقتاپ، ولارعا قولدانىستاعى زاڭ اياسىندا قاتاڭ جازا قولدانۋىن سۇرايمىن.

قۇرمەتپەن،

اقبەرەن ەلگەزەك

Abai.kz