جالپى، ءبىزدىڭ ەلدە نەشە ءتۇرلى، ادام تاڭ قالارلىقتاي جاعدايلار بولىپ جاتادى. سەنەيىن دەسەڭ، ەشبىر قيسىنعا سىيمايدى، سەنبەيىن دەسەڭ كوز الدىڭدا باقىرايىپ تۇر.

ماسەلەن، ءبىزدىڭ ەلدىڭ شەتەلدەرمەن ءوزارا تاۋار ساۋدا اينالىمىنا كوز جىبەرىپ كورەلىك. قاي نارسەنىڭ دە تىگىسىن جاتقىزىپ جىبەرەتىن ستاتيستيكا كوميتەتىنىڭ حابارلاۋىنشا، ءبىز كۇندەلىكتى قاجەتتى دۇنيەلەردىڭ 40 پايىزىن رەسەيدەن الادى ەكەنبىز. ىشىندە ءتىپتى، ءسۇت تە، ماي دا، ەت تە بار. تۇرمىستىق تەحنيكا دەگەنى تاعى بار. اناۋ-مىناۋ كيىم كەشەكتى قىرعىز اعايىندار تىگىپ بەرەدى. قاجەتتى اياق كيىمدى تاجىك تۋىستار جەتكىزەدى. قالعانىن الىپ كورشىمىز قىتاي جارىلقايدى. ەندى قايتەمىز، ءوزىمىزدىڭ تاۋار شىعارۋعا دارمەنىمىز جەتپەسە؟.. سوسىن بىرەۋگە كوز سۇزەمىز داعى.

جارايدى، بۇعان دا كوندىك. الايدا، ماسقارا بولعاندا حالىققا تيەسىلى تابيعي بايلىقتان تۇسكەن مول اقشانى قازىرگى تاڭدا اسا قاجەتى جوق، جۇرتتىڭ سۇرانىسىنا جارامايتىن دەليكاتەس تاۋارلارعا شىعىنداعانىن كورگەندە وسى ەلدە دەنى دۇرىس ەكونوميست قالدى ما ەكەن دەگەن جامان ويعا كەلەسىڭ.

ەندى وعان مىناداي جاعا ۇستارلىق فاكتى دالەل: ەلىمىزدەگى اناۋ-مىناۋ، ۇساق-تۇيەك مامان ەمەس، قازاقستان پرەزيدەنتى جانىنداعى ستراتەگيالىق زەرتتەۋ ينستيتۋتىنىڭ جەتەكشى ۇلتتىق قىزمەتكەرى، ءوزىن اسا بىلىكتى ساراپشى (ديۆاندىق ەمەس) سانايتىن مۇحيت اسانباەۆ مىرزا ەلىمىزدەگى ساناۋلى ءورىستىلدى پورتالداردىڭ بىرىنە بەرگەن اۋقىمدى سۇحباتىندا ەلىمىزدىڭ يران مەملەكەتىمەن ارامىزداعى ساۋدا 1 ميلليارد دوللاردان 300 ميلليون دوللارعا ءتۇسىپ قالعانىن ايتىپ، زار جىلايدى. بۇل يراننىڭ رەسەيدىڭ ۋكرايناعا قارسى سوعىسىن قولداپ، ولارعا قاجەتتى سوعىس تەحنيكاسىن بەرگەنى ءۇشىن سالىنعان سانكتسيانىڭ اسەرى ەكەن.

ال ەندى الگى 1 ميلليارد دوللارعا نە الىپ كەلىپپىز دەيسىزدەر عوي؟ ءبىزدىڭ تىرشىلىگىمىزگە اسا قاجەتتى، ونسىز كۇنىمىز قاراڭ بولاتىن ەرەكشە دۇنيە دەپ ويلاساڭىزدار، قاتتى قاتەلەسىزدەر. ءبىز بۇل مول اقشاعا جاڭعاق، فينيكتەر جانە پلاستاماسسالاردى ساتىپ الادى ەكەنبىز. ءسىرا، قازاقتار ەت جەۋدى قويىپ، جاڭعاق شاعىپ، فينيكپەن راحاتتانىپ شاي ىشۋگە عانا جاپپاي كوشكەن سەكىلدى.

بەۋ، قايدا شاشىلماي جاتقان قازاق اقشاسى دەسەيشى!

جايبەرگەن بولاتوۆ

Abai.kz