رەسەي ناعىز توتاليتارلىق ەلگە اينالدى. 2023 جىلى رەسەيدە مەملەكەتكە وپاسىزدىق جاساۋ جانە ساتقىندىق بابى بويىنشا قوزعالعان قىلمىستىق ءىستىڭ سانى سوڭعى 20 جىلدىقتا ءدال وسى باپ بويىنشا قوزعالعان قىلمىستىق ىستەردىڭ سانىنان كوپ بولماق.  «حولود» باسىلىمى سوڭعى جەتى ايداعى كورسەتكىشتى زەرتتەپ، ءدال وسىنداي قورىتىندىعا كەلدى. بۇل تۋرالى Mezgil.kz سايتى جازدى. 

2023 جىلدىڭ قاڭتار مەن شىلدە ارالىعىندا رەسەيدە وتانعا وپاسىزدىق جاسادى دەگەن ايىپپەن 82 ءىس قوزعالعان. 2022 جىلى بۇل باپ بويىنشا 20 ءىس قوزعالعان ەدى. الايدا شىنايى كورسەتكىش الدەقايدا جوعارى بولۋى مۇمكىن، سەبەبى باسىلىم اقپاراتتاردى اشىق دەرەككوزدەردەن العان، ال كوپ جاعدايدا قىلمىستىق ىستەر جايلى اقپارات جاريا ەتىلمەيدى.

باسىلىم ستالين داۋىرىندە ءدال وسىنداي ايىپپەن وتە كوپ ءىس قوزعالعانىن ايتادى. ال ستالين ولگەننەن كەيىن ءدال قازىرگى ماسشتابتاعىداي «وتانعا وپاسىزدىق جاساۋ» بابى بويىنشا ءتىپتى كسرو-نىڭ وزىندە دە ءىس قوزعالماعان كورىنەدى. «حولود» باسىلىمىنىڭ زەرتتەۋىنشە بۇرىن بۇل باپ بويىنشا كوبىنە اسكەري سالا قىزمەتكەرلەرى، عالىمدار مەن ساياساتكەرلەر ايىپتالسا، بۇگىندە بۇل ايىپتى كەز كەلگەن ازامات ارقالاپ كەتۋى مۇمكىن. ءتىپتى مەملەكەتتىك قىزمەتتە بولماعان قاراپايىم ازاماتتارعا دا الەۋمەتتىك جەلىدەگى پىكىرى ءۇشىن «وتانعا وپاسىزدىق پەن ساتقىندىق جاسادى» دەپ ءىس قوزعاپ، ۇزاق جىلعا سوتتاپ جىبەرۋى ىقتيمال.

1997-2017 جىلدار ارالىعىندا رەسەيدە «مەملەكەتكە ساتقىندىق جاسادى» دەگەن ايىپپەن 101 ءىس قوزعالعان. ياعني ورتا ەسەپپەن جىلىنا 5 ءىس قوزعالىپ وتىرعان. ال بۇگىندە رەسەيدە ايىنا ورتا ەسەپپەن 20 ءىس قوزعالۋدا. كوبىنە بۇل الەۋمەتتىك جەلىدەگى جازبالارعا قاتىستى بولىپ وتىر. تۇتقىنعا بەرىلۋ، سوعىسقا بارماۋعا ۇندەۋ مەن ۇرىس دالاسىنداعى شىعىنعا قاتىستى اقپارات جازۋ رەسەيدە «وتانعا وپاسىزدىق جاساۋ» دەپ سانالۋدا. ساراپشىلار رەسەي ءبىر جىل ىشىندە تولىق توتاليتارلىق ەلگە اينىلىپ كەتكەنىن جازۋدا.

Abai.kz