ءۇندىستان بيلىگى مەملەكەت اتاۋىن بحارات دەپ وزگەرتۋدى كوزدەپ وتىر. مەملەكەت اتاۋىن وزگەرتۋگە قاتىستى قاۋلى قىركۇيەك ايىنىڭ سوڭىندا پارلامەنت قاراۋىنا ۇسىنىلماق.

وسىلايشا ءۇندىستان ۇكىمەتى ەلدىڭ رەسمي اتاۋىن «بحارات» دەپ وزگەرتپەككە قادام جاسادى. The Economic Times باسىلىمى «اتالعان قارار 18-22 قىركۇيەككە جوسپارلانعان پارلامەنتتىڭ كەزەكتەن تىس سەسسياسىندا ۇسىنلۋى مۇمكىن»،- دەپ حابارلايدى. وسى ورايدا كونگرەسس جەتەكشىسى دجايرام رامەش G 20 رەسمي تۇسكى اسقا شاقىرۋلارىنا «ءۇندىستان پرەزيدەنتى» ەمەس، «بحارات پرەزيدەنتى» قول قويعانىن جۇرت الدىندا راستادى.

ءۇندى پارلامەنتىندەگى جەتەكشى ەكى ۇلتتىق پارتيانىڭ ءبىرى بولاتىن بحاراتيا دجاناتا پارتياسىنىڭ دەپۋتاتى رادجيا سابحا نارەش بانسال جوعارى پالاتانىڭ جاقىندا اياقتالعان سەسسياسىندا اتاۋدى وزگەرتۋ تۋرالى ۇسىنىستى ەنگىزدى. نەگە بۇل قادامعا بارىپ وتىرعاندارىن: «بريتاندىقتار بحارات ءۇندىستان اتاۋىن وزگەرتتى. ءبىزدىڭ ەلىمىز مىڭداعان جىلدار بويى بحارات ەسىمىمەن بەلگىلى. بۇل ەجەلگى سانسكريت ماتىندەرىندە كەزدەسەتىن ەلدىڭ ەجەلگى اتاۋى.

ءۇندىستان اتاۋى وتارشىل بولدى، سوندىقتان قۇلدىقتىڭ سيمۆولى بولدى. ءۇندىستان اتاۋىن كونستيتۋتسيادان الىپ تاستاۋ كەرەك»، - دەپ ءتۇسىندىردى.

ۇندىستانداعى رەسمي تىلدەر - حيندي جانە اعىلشىن تىلدەرى ەكەنىن بىلەمىز. اعىلشىن تىلىندە بۇل ەل - ينديا، ال حيندي تىلىندە - بحارات دەپ اتالادى.

ەستەرىڭىزگە سالا كەتەتىن بولساق، «بحارات» قازىرگى ءۇندىستاننىڭ وتە ەرتە زامانداعى اتاۋى، كەيىن مۇسىلماندار بەل الىپ، «بحارات»  مۇسىلمان يمپەريالارىنىڭ قۇرامىنا كىرگەن سوڭ، ءۇندىستان ءسوزى بارشاعا تانىمال بولدى.

سونىمەن بۇل اتاۋدى وزگەرتۋگە دەگەن ۇمتىلىس – ەلدى مۇسىلمان يمپەراتورلارى باسقارعان تاريح كەزەڭىن سىزىپ تاستاۋ ارەكەتى دەپ ۇعىنامىز. مۇسىلمانداردى بيلىكتەن تايدىرۋ ءۇشىن تۇرعىلىقتى حالىقتى ءبىر دىندىك تاعانتاسقا بىرىكتىرەتىن قانداي دا ءبىر يدەولوگيانى تابۋعا تالپىنىس جاسالىپ، بحاراتا اتاۋى تۋ ەتىپ ۇستانىلدى.

بۇعان دەيىن ءۇندىستاندا بىرنەشە ءىرى قالالاردىڭ اتاۋلارى ۇلتتىق داستۇرلەرگە سايكەس كەلەتىندەي ەتىپ وزگەرتىلگەن بولاتىن. اتاپ ايتساق، 1995 جىلى يندۋستار مەن مۇسىلماندار اراسىنداعى قاقتىعىستان كەيىن بومبەي ءتاڭىريا مۋمبا دەۆيدىڭ قۇرمەتىنە مۋمباي بولسا، 1996 جىلى مادراس چەننايعا اينالىپ شىعا كەلسە، ال كالكۋتتا 2001 جىلى كولكۋتا دەپ وزگەرتىلدى.

كەڭەس زامانىندا NB - ناۆا بحارات ۇندىلىك تەمەكىلەرى ساتىلعانىن ءالى ەسىمدە. الەمدەگى ەڭ كونە ەلدەردىڭ بىرىنە وتارشىلدىقتىڭ ورنىنا ءوزىنىڭ تاريحي اتاۋى قايتارىلادى. بحارات - بۇل باعزىلىق اتاۋى ەجەلگى مادەني جادىگەرلەر ۆەدا جانە پۋراننىڭ ماتىندەرىندە كەزدەسەدى. ەگەر ءۇندى پارلامەنتى بۇنى قۇپتاسا، ءبىز اتاقتى بحارات شايىن ءىشىپ، بحاراتيان دجونستى تاماشالايتىن بولامىز.

كەرىمسال جۇباتقانوۆ

Abai.kz