ەستەرىڭىزدە بولسا، 5 قىركۇيەك كۇنى «Abai.kz» ۇلتتىق پورتالى ارقىلى «دەپۋتات ەرمۇرات باپيعا حات» اتتى «اشىق حات» جازىپ، حالىق قالاۋلىسى ەرمۇرات باپيدان قۇلىباەۆتۆردىڭ قۇرعان جەمقورلىق قاقپانىنان قۇتقاراتىن بىردەن-ءبىر جول – اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتە وتىرىپ، «الەۋمەتتىك-كاسىپكەرلىك كورپوراتسيالار تۋرالى» زاڭدى جويىپ، ونداعى الەۋمەتتىك-كاسىپكەرلىك كورپوراتسيالاردىڭ قىزمەتىن اۋىلدىق وكرۋگ اكىمدەرى مەن الدا حالىقتىق سايلاۋ ارقىلى قۇرىلاتىن «اۋىلدىق كەڭەستىڭ» قۇزارەتىنە بەرۋ ەكەنىن ايتىپ، وسى جوبانىڭ ىسكە اساۋىنا ءماجىلىس دەپۋتاتى رەتىندە ىقپال ەتۋىن وتىنگەءنبىز.

سونداي-اق، اتالعان «اشىق حاتتى» E-otinish ارقىلى 6 قىركۇيەك كۇنى ماجىلىسكە دە جولداعان بولاتىنبىز.

كوپ كۇتتىرگەن جوق، اراعا ەكى-اق كۇن سالىپ، 8 قىركۇيەك كۇنى دەپۋتات اعامىز سول حاتىمىزعا العاشقى جاۋابىن بەرىپ: «قۇرمەتتى مۇقيبەك اۋىت! ماعان ارناپ جازعان حاتىڭىزدى وقىدىم. حاتتا قوزعالعان تاقىرىپتىڭ كوپشىلىككە ارنالعان الەۋمەتتىك-قوعامدىق ءمانىن ەسكەرە وتىرىپ، سىزگە جاۋاپتى «دات» گازەتى ارقىلى بەرەمىن دەپ شەشتىم»، - دەپتى.

قۋانا-قۋانا قابىلدادىق بۇل جاۋاپتى. ەندى «نە دەر ەكەن؟» دەپ، ەلەڭدەپ وتىرعان جايمىز بار.

ءبىر قىزىعى، سول «اشىق حات» قۇرعىردى جازۋىن جازىپ الىپ، كەشەدەن بەرى ەسىمە پرەزيدەنتىمىز قاسىم-جومارت توقاەۆتىڭ «قاندى قاڭتار» كوتەرىلىسىنەن كەيىن – 2022 جىلعى 16 ناۋرىزدا جاساعان «جاڭا قازاقستان: جاڭارۋ مەن جاڭعىرۋ جولى» اتتى تاريحي جولداۋىنداعى «سوڭعى جىلدارى ءبىز قازاقستاندى تۇبەگەيلى جاڭعىرتۋعا، ترانسفورماتسيالاۋعا كوشتىك. ءتۇرلى سالادا اۋقىمدى وزگەرىستەر باستالدى. بۇل كەيبىر ىقپالدى ادامدارعا ۇنامادى. ولار جىلدار بويعى زاڭسىز ارەكەتتەرىن ودان ءارى جالعاستىرا بەرۋدى كوزدەدى...»، - دەگەن ءسوزى ءتۇسىپ، ەرمۇرات اعامدى قاتتى اياپ وتىرمىن.

وتىز جىل بويى دەسەك ارتىق بولار، ارسىرەسە 2007 جىلدان كەيىن قازاقستان ات توبەلىندەي توپتىڭ مايشەلپەگىنە اينالدى. ەكونومياكاعا قاتىستى زاڭدار مەن نورماتيۆتىك قۇجاتتاردىڭ ءبارى تيمۋر قۇلىباەۆ پەن كارىم ءماسىموۆتىڭ ىقپالىمەن جاسالدى.

قاسىم-جومارت كەمەلۇلى پرەزيدەنت بولىپ كەلگەن سوڭ، بار بولعانى سول جىلدار بويعى زاڭسىز ارەكەتتەرىن ودان ءارى جالعاستىرا بەرۋدى كوزدەگەندەردىڭ «ءبىر باقايشىعىن» باسىپ كەتىپ ەدى، سول-اق ەكەن، پرەزيدەنتىمىزدىڭ ءوز سوزىمەن ايتساق، [اتالعان] قاسكويلەر مۇقيات ويلاستىرىلعان اۋقىمدى وپەراتسيا ۇيىمداستىردى. ولار حالقىمىزدىڭ جانە شەتەل قوعامداستىعىنىڭ الدىندا مەملەكەتتىڭ جوعارى باسشىلىعىنىڭ ابىرويىن توگىپ، بيلىكتەن تايدىرۋدى كوكسەدى. كاسىبي دايىندىقتان وتكەن سودىرلاردى ءوز ماقساتىنا جەتۋ ءۇشىن ەش تارتىنباستان پايدالاندى. ولارعا ەلىمىزدىڭ ەڭ ءىرى شاھارى – الماتىنى كۇل تالقان ەتۋدى، جۇرتتى ابدەن ۇرەيلەندىرىپ، دۇنيەدەن ءبىرجولا ءتۇڭىلدىرۋدى، ەلدەگى احۋالدىڭ بىت-شىتىن شىعارىپ، بەي-بەرەكەت قىلۋدى تاپسىردى...

تولىق سەنىممەن ايتايىن، ءبىز ۇسىنىپ وتىرعان اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتە وتىرىپ، «الەۋمەتتىك-كاسىپكەرلىك كورپوراتسيالار تۋرالى» زاڭدى جويىپ، ونداعى الەۋمەتتىك-كاسىپكەرلىك كورپوراتسيالاردىڭ قىزمەتىن اۋىلدىق وكرۋگ اكىمدەرى مەن الدا حالىقتىق سايلاۋ ارقىلى قۇرىلاتىن «اۋىلدىق كەڭەستىڭ» قۇزارەتىنە بەرۋ – قازاقستاندى ناعىز تۇبەگەيلى جاڭعىرتۋعا، ترانسفورماتسيالاۋعا الىپ باراتىن بىرەگەي جوبا!

مەن بۇل جوبا تۋرالى از تەر توككەم جوق. تاعى قايتالاپ ايتايىن، پرەزيدەنت اكىمشىلىگىنە الپىس ءتورت بەتتەن تۇراتىن حات جازدىم. «ەندىگى شەشىم بەكتەنوۆ مىرزانىڭ دارگەيىندە قالدى» (https://abai.kz/post/170138 ) دەپ، پرەزيدەنت اكىمشىلىگىنىڭ باسشىسى ولجاس بەكتەنوۆتىڭ اتىنا، «تاعى ءبىر ءۇمىتىم ەرلان قاريندە...» (https://abai.kz/post/170615 ) دەگەن اتپەن مەملەكەتتىك كەڭەسشى ەرلان قاريننىڭ اتىنا جەكە-جەكە «اشىق حات» جازىپ، ونى اتالعان تۇلعالاردىڭ وزدەرىنە E-otinish ارقىلى جولدادىم.

ەكەۋىنىڭ دە قولىنا ءتيدى.

بىراق، وزدەرى جاۋاپ بەرگەن جوق، باسقا مينيسترلىكتەرگە باعىتتادى دا وتىردى. ولجاس ابايۇلىنا ءبىر ەمەس، بىرنەشە مارتە حات جازىپ، قابىلداۋىن سۇرادىم. سول ءۇشىن عوي، «ءسۇيىنشى، بەسىنشى حاتىم دا بەكتەنوۆتىڭ قولىنا ءتيدى!» (https://abai.kz/post/171567 ) دەپ، الاقايلاپ جۇرگەنىم.

قابىلداعان جوق!

وسى قارساڭدا، ولجاس بەكتەنوۆتىڭ اتىنا جازعان حاتىما اۋىل شارۋاشىلىعى ۆيتسە-ءمينيستى ەربول تاسجۇرەكوۆ جاۋاپ بەرىپ، «قولدانىستاعى سۋبسيديالاۋ جۇيەسىن رەفورمالاۋدىڭ بىرنەشە نۇسقالارى دايىندالدى، ولار جۇمىس توبىنىڭ وتىرىستارىندا بىرنەشە رەت تالقىلاندى. تۇبەگەيلى رەفورمالاۋدىڭ بارلىق ۇسىنىلعان نۇسقالارىن اگروبيزنەس وكىلدەرى قولدامادى، فەرمەرلەر قاۋىمداستىعى قولدانىستاعى سۋبسيديالاۋ جۇيەسىن ساقتاۋدى تالاپ ەتتى»، - دەدى.

ەگەر، اۋىلدىق وكرۋگ اكىمىنىڭ قۇزىرەتى ءماجىلىس قاراۋىندا جاتقان «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭىنىڭ جوباسىنداعىدان تىس، ءبىز ۇسىنعان ءۇش باعىت بويىنشا كەڭەيتىلسە، وندا سۋبسيديالاۋ جۇيەسى مۇلدە وزگەرەدى.

اگروبيزنەس وكىلدەرى مەن فەرمەرلەر قاۋىمداستىعىنىڭ قارسى شىعاتىن سەبەبى - وسى!

قىسقاسى، اتالعان ۇسىنىس بيىلعى پرەزيدەنت جولداۋىندا ەسكەرىلەتىن شىعار دەگەن ءۇمىتىمىز اقتالمادى.

«ەندى كەلىپ، سول بۇكىل پرەزيدەنت اكىمشىلىگىنىڭ ءتىسى باتپاعان ۇسىنىستى دەپۋتات ەرمۇرات باپيعا زاڭداستىرىپ بەر دەگەنىم قالاي بولادى؟!» - دەگەن وي، شىنى كەرەك، مازامدى قاشىرا باستادى.

ول از بولعانداي، «الەۋمەتتىك-كاسىپكەرلىك كورپوراتسيالار تۋرالى» زاڭدى جويىپ، ونداعى الەۋمەتتىك-كاسىپكەرلىك كورپوراتسيالاردىڭ قىزمەتىن اۋىلدىق وكرۋگ اكىمدەرى مەن الدا حالىقتىق سايلاۋ ارقىلى قۇرىلاتىن «اۋىلدىق كەڭەستىڭ» قۇزارەتىنە بەرۋدى تاعى قوسىپ وتىرمىن.

ال، بۇل ۇسىنىستى ەرمۇرات اعاما بەرمەسەم، ماجىلىستە ەرمۋرات باپي مەن باقىتجان بازاربەكتەن وزگە جىلىگى تاتيتىن دەپۋتات جوق!

ەراعام بۇل جوبانى ءماجىلىس تورىنەن ورتاعا قويسا، زاڭدىق جاعىنا باقىتجان جۇمابەكۇلى كومەكتەسسە، ارى قاراي رينات زايتوۆ پەن ماقسات تولىقباي باستاعان جاس بورىلەر قيقۋلاپ بەرسە، ىسكە اسىپ كەتەر دەگەن زور ۇمىتپەن جاسالعان ۇسىنىس – بۇل.

كارىم ءماسىموۆ سوتتالىپ، تيمۋر قۇلىباەۆ بيلىكتەن شەتتەتىلگەنىمەن، ولار قۇرىپ كەتكەن سحەمادان پايدالانىپ، جىلدار بويعى زاڭسىز ارەكەتتەرىن ودان ءارى جالعاستىرا بەرۋدى كوزدەگەن ىقپالدى توپ باياعى كۇيىندە ءالى وتىر.

انە، بۇگىن «جەتىسۋ وڭىرىندە بيىل اۋىل شارۋاشىلىعىن قولداۋعا 29,9 ملرد تەڭگە ءبولىندى، ونىڭ 23,3 ملرد تەڭگەسى – سۋبسيديا. جىل سوڭىنا قاراي وڭىردەگى اۋىل شارۋاشىلىعىنىڭ جالپى ءونىمىنىڭ كولەمى 544 ملرد تەڭگەدەن اسادى دەپ كۇتىلۋدە»، – دەپ، Dalanews.kz جەتىسۋ وبلىسى اكىمىنىڭ ءباسپاسوز قىزمەتىنە سىلتەمە جاساپ جازىپ شىقتى.

بۇل ءبىر عانا وبلىستاعى جاعداي. قازاقستاندا ون سەگىز وبلىس، ءۇش مەگاپوليس بار ەكەنىن ەسكەرسەك، ولاردىڭ مەملەكەتتەن قانشا قاراجات الاتىنىن ءوزىڭىز باعامداي بەرىڭىز.

پرەزيدەنتىمىز قاسىم-جومارت توقاەۆ بولسا، جۇرتتىڭ اي سايىن جۇمسايتىن قارجىسىنىڭ تەڭ جارتىسىنان كوبى ازىق-تۇلىك الۋعا كەتەدى. ۇكىمەتتىڭ ارەكەتى جەتكىلىكسىز بولىپ وتىر; اۋىل شارۋاشىلىعى جانە ءوندىرىس سالاسىنىڭ دامۋىندا ناقتى ناتيجە جوق; ەلىمىزدە وندىرىلەتىن تاۋاردىڭ كولەمى ىشكى سۇرانىستى قامتاماسىز ەتۋگە جەتپەيدى. يمپورتقا تاۋەلدىمىز; 2019-2021 جىلدارى ءونىم وڭدەۋگە بەرىلگەن سۋبسيديانى الايىق. بۇل قاراجاتتىڭ تەڭ جارتىسى سۋبسيديا الام دەۋ¬شىلەردىڭ 10 پايىزىنىڭ عانا قولىنا تيگەن; سۋبسيديا العان كەيبىر پىسىقايلار ءوندىرىستى وركەندەتۋدىڭ ورنىنا بيۋدجەت قارجىسىن قالتاسىنا باسىپ، شالقىپ ءومىر سۇرگەن. ال قاراپايىم شارۋالار ءۇشىن سۋبسيديا الۋ – قيامەتتىڭ قيىنى; ينفلياتسيا وسكەن سايىن حالىقتىڭ ناقتى تابىسى قۇنسىزدانىپ جاتىر; تۇتىنۋ نەسيەلەرىنىڭ كولەمى ارتىپ بارادى. بۇل ارەكەت – ينفلياتسيا كەزىندە جان باعۋدىڭ امالى; تاۋار نارىعىنىڭ مونوپوليالىق قۇرىلىمى ءالى دە وزگەرە قويعان جوق. ونىڭ ۇستىنە بيزنەس، اسىرەسە، ورتا بيزنەس قارقىندى دامىماي وتىر... () دەپ، قاقساۋمەن كەلەدى.

ارينە، ءبىز ۇسىنعان بۇل جوبا پرەزيدەنت اكىمشىلىگىنىڭ دەڭگەيىندە قارالىپ، الدىن-الا شەشىم جاسالىپ، وسى جولعى جولداۋدا ورتاعا قويىلۋى كەرەك ەدى.

ەرلان قارين مەن ولجاس بەكتەنوۆ تاعى ءبىر «قاڭتار وقيعاسى» تۋىپ كەتە مە دەپ قورىقتى ما، جوق اگروبيزنەس وكىلدەرى مەن فەرمەرلەر قاۋىمداستىعىنان قايمىقتى ما، الدە «بىزگە ءبارىبىر، توناسا توناي بەرسىن!!!» - دەدى مە، جوق مۇنداي رەفورما جاساۋعا ولاردىڭ دەڭگەيلەرى جەتپەدى مە، – ول جاعى بىزگە مۇلدە بەلگىسىز!

قۇداي الدىنداعى شىندىعىم – بۇل، مەن دەپۋتات ەرمۇرات باپيدىڭ جىگەرىن جانيىن، نامىسىن قايرايىن دەپ وتىرعان جوقپىن. ول – ونسىزدا ەسكى بيلىكتە ەشكىمنەن سەسكەنبەگەن كوكجال! ماحامبەتتىڭ بۇگىنگى ەگەۋلى نايزاسى!!

بىراق، «الەۋمەتتىك-كاسىپكەرلىك كورپوراتسيالار تۋرالى» زاڭى سەكىلدى زاڭداردى پايدالانىپ اقشاعا قۇنىققان توپتاردىڭ پرەزيدەنتىمىز قاسىم-جومارت توقاەۆتىڭ تاعىن شايقالتىپ جىبەرگەنىن ويلاسام، شىنىمەن دە ارداقتى اعامدى اياپ كەتەمىن.

اتالعان جوبا ىسكە اسپاي قالسا، وتىز جىل بويى ادىلەتسىزدىك پەن وسى جەمقورلىقتىڭ جولىن كەسۋ ءۇشىن كەسكەن ارىستاندى قايداعى ءبىر قۇرباقالاردىڭ تاباسىنا قالدىرام با دەگەندى ويلاسام، ودان بەتەر ابىرجىپ، وي ءتۇن ۇيقىم ءتورت بولىنە باستاعانى تاعى بار.

ونىڭ ۇستىنە، ءبىر-ەكى تىلگىم جەردى مەملەكەت مەنشىگىنە قايتارۋعا ىقپال ەتكەن كۇرەسكەر دەپۋتات باقىتجان بازاربەككە بىرەۋلەر قىسىم كورسەتە باستاپتى.

تاعى قايتالاپ ايتايىن، ءبىز ۇسىنىپ وتىرعان اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتە وتىرىپ، «الەۋمەتتىك-كاسىپكەرلىك كورپوراتسيالار تۋرالى» زاڭدى جويىپ، ونداعى الەۋمەتتىك-كاسىپكەرلىك كورپوراتسيالاردىڭ قىزمەتىن اۋىلدىق وكرۋگ اكىمدەرى مەن الدا حالىقتىق سايلاۋ ارقىلى قۇرىلاتىن «اۋىلدىق كەڭەستىڭ» قۇزارەتىنە بەرۋ – قازاقستاندى ناعىز تۇبەگەيلى جاڭعىرتۋعا، ترانسفورماتسيالاۋعا الىپ باراتىن بىرەگەي جوبا!

نە دە بولسا، بولار ءىس بولدى. جاسالار ۇسىنىس جاسالدى. ەراعام «قۇرمەتتى اۋىت مۇقيبەك! ءسىزدىڭ قر پارلامەنتى ماجىلىسىنە جولداعان حاتىڭىزداعى «14.04.2022ج. №جت-م-322,5) كوشى-قونعا بايلانىستى ماڭىزدى ماسەلەڭىز «اق جول» پراتياسىنىڭ فراكتسيا وتىرىسىندا قاراستىرىلاتىنىن حابارلايمىن»، - دەپ قايتاراتىن قازىبەك يسا مەن وزىنە جازعان حاتتى وزگە مينيسترلىككە باعىتتاي سالاتىن رۋسلان قوجاسباەۆ ەمەس، ارينە!

ەراعامنىڭ ەندى سول «دات» گازەتى ارقىلى بەرەمىن دەگەن جاۋابىن كۇتەيىك!

سوسىن، ۇسىنىسىمىزدى قولعا الىپ جاتسا، بۇكىل ەل بولىپ، جۇرت بولىپ ەرمۇرات باپيعا قولداۋ كورسەتەيىك!

اللا ەراعاما كۇش-قۋات بەرسىن!

اۋىت مۇقيبەك

Abai.kz