بىزدە كەيدە وپ-وڭاي شەشىلەتىن دۇنيەنى ۇلكەن داۋعا اينالدىرىپ جاتامىز. اناۋ ءبىر رەسەيدە اتى تانىمال سايقىمازاق ازامات مۇساعاليەۆ دەگەنگە «قازاقستانعا كەلمەسىن، كونتسەرتىن قويماسىن» دەپ الەۋمەتتىك جەلىدە ۇلارداي شۋلار جاتىر.

سونداعىسى، ول ۋكراينانىڭ رەسەي وككۋپاتسيالاپ العان دونەتسك دەگەن جەرىنە بارىپ كونتسەرت قويىپ، باسقىنشىلاردى قولداپتى. ارينە، مۇنى ەشكىم دە دۇرىس دەي الماس. وندايلاردىڭ ءبىزدىڭ ەلدەن اۋلاق جۇرگەندەرى دە ماقۇل. اقىرى ونىڭ كونتسەرتى وتپەيتىن بولىپ، كوڭىلدى ءبىر دەمدەدىك.

الايدا، ءبىر نارسەنى انىق تۇسىنگەن ماقۇل. ول رەسەيدە تۋىپ-وسكەن، سولاردىڭ استامشىلىق يدەولوگياسى ساناسىنا مىقتاپ ءسىڭىپ، ابدەن زومبيلانعان ادام. رەسەيدىڭ تولىق قاندى ازاماتى. ونى قازاق ەكەن دەپ بوسقا ارامتەر بولۋ اداسقاندىق. ول قازاق تىلىنەن مۇلدەم ماقۇرىم. ونى ايتاسىز، ءبىر جولى قازاق ءتىلىن «كۋرلى-مۋرلى» دەپ، اشىقتان-اشىق مازاق ەتكەنى بار. ەندى بىردە: «ماعان قازاقستان مەن بەلورۋستىڭ ەش ايىرماشىلىعى جوق»، - سوققانىن دا ەستىگەنبىز. ەندى ونىڭ رەسەيدىڭ باسقىنشىلىعىنا بۇيرەگى بۇرىپ، ءپۋتيننىڭ تاراتقان شۇلەنىنەن دامەتىپ جۇرگەندىگىنە نەسىنە تاڭ قالامىز؟..

ونىڭ ۇستىنە مۇنداي تەك اقشاعا قۇنىققان، ەل مەن جەر دەگەن قاسيەتتى ۇعىمنان مۇلدەم حابارسىز «رەسەي پاتريوتتارىن» قولدايتىندار ءوز ىشىمىزدەن دە تابىلادى. وزگەسى-وزگە، كلاسسيك-اقىن حاميت ەرعاليەۆتىڭ قىزى، ءوزىن كەرەمەت وپپوزيتسيونەر ءارى اتاقتى جۋرناليست سانايتىن گۇلجان ەرعاليەۆا: «وندا تۇرعان نە بار؟ كەلىپ، كونتسەرتىن قويا بەرسىن»، - دەپ قاراپ تۇر. ءسىرا، ورىسشا وقىپ، ءتالىم-تاربيە العانداردى ماڭگۇرتتىك ورتاقتاستىندىراتىندىعى راس شىعار. «سكرەپتونيت» دەگەن لاقاپ اتپەن بۇكىل رەسەيگە تانىمال ءانشى، قازاق جىگىتى ءادىل جالەلوۆ رەسەيدىڭ اگرەسسياسى باستالعان بويدا ءوزىنىڭ تاۋەلسىز ەل -ۋكراينانى قولدايتىندىعىن اشىق ايتىپ، قازاقستانعا قاراي ءبىرجولاتا ات باسىن بۇرعان ەرلىگىن ايتساڭشى. ول سونداعى مول اقشادان ايىرىلسا دا، قىڭق ەتپەدى. ال ءوزىمىزدىڭ سابۋروۆ ءالى سوندا ءجۇر. مول دۇنيەنى قيمايتىن شىعار. مىنەكەي، جاقسى مەن جامان قاتار تۇسكەندە كىمنىڭ كىم ەكەندىگى بايقالىپ قالادى.

جايبەرگەن بولاتوۆ

Abai.kz