كولىك ءمينيسترى مارات قاراباەۆ ۇكىمەت وتىرىسىنان كەيىن وتكەن بريفينگىدە «قازاۆتوجولدىڭ» بۇرىنعى باسشىسىنىڭ قىزمەتتتەن كەتۋىنە قاتىستى تۇسىنىك بەردى.

«تاياۋدا «قازاۆتوجولدىڭ» باسشىسى بولعان مەيىرحات قاسىمباەۆ قىزمەتىنەن كەتتى. باق ونىڭ جەمقورلىق داۋىنا ۇشىراعان قالباتاۋ - مايقاپشاعاي جولىن جوندەگەن «قازگەرستروي» كومپانياسىنا قاتىسى بار ەكەنىن جازدى. باس پروكۋراتۋرا وسى جولدىڭ قۇرىلىسىنا دەپ بولىنگەن 21 ملرد تەڭگەنىڭ ماقساتقا ساي جۇمسالماعانىن حابارلادى. ونىڭ قىزمەتىنەن كەتۋىنە سول جەمقورلىق داۋى سەبەپ بولدى ما؟»، – دەپ سۇرادى جۋرناليست.

«جوق. «قازاۆتوجولدىڭ» بۇرىنعى باسشىسىنىڭ قىزمەتىنەن كەتۋى ودان ەمەس. ول ءوز ەركىمەن جۇمىستان بوسادى»، – دەدى مارات قاراباەۆ.

سونداي-اق ءتىلشى اتالمىش جول قۇرىلىسىنا قىتايدىڭ «ەكسيمبانكىنەن» قانشا قارىز الىنعانىن سۇرادى.

«قالباتاۋ - مايقاپشاعاي جولىنا شەتەلدىك قارجى ينستيتۋتىنان كرەديت تارتىلعان. جولدىڭ جالپى قۇرىلىسى سول كوزدەن قارجىلاندىرىلىپ جاتىر. ءتۇرلى-ءتۇرلى كوزدەر قاراستىرىلعان. بىرنەشە ۋچاسكەگە، بىرنەشە لوتقا بولىنەدى. ەڭ باسىم باعىتتاعى اقشا قىتايلىق «ەكسيمبانككە» تيەسىلى. ونىڭ كولەمى – 156 ملرد تەڭگە»، – دەدى ۆەدومستۆو باسشىسى.

فوتو: اشىق دەرەككوزدەن

Abai.kz