قازاقستاننىڭ گەرمانياعا مۇناي ەكسپورتىنا كەدەرگى كەلتىرىپ وتىرعان بەلارۋستىڭ ارەكەتىنە ءتيىستى جاۋاپ ويلاستىرىلا باستادى. بۇل تۋرالى مينيسترلەر كابينەتىندەگى جاعدايمەن تانىس DALA INSIDE دەرەككوزى حابارلادى.

قازاقستان، گەرمانيا جانە رەسەي بيىل «درۋجبا» قۇبىر جۇيەسى ارقىلى گەرمانيانىڭ «شۆەدت» مۇناي ايىرۋ زاۋىتىنا جىلىنا 1,2 ميلليون توننا قازاق مۇنايىن جىبەرۋگە كەلىسكەن ەدى. قۇبىر رەسەي، بەلارۋس، پولشا ارقىلى گەرمانياعا بارادى. ەندى كۇتپەگەن جەردەن مينسك ءوزى ارقىلى وتەتىن ۋچاسكە تاريفىن تونناسىنا 455,94 رۋبلدەن 653,8 رۋبلگە دەيىن، ياعني 43,4 پايىزعا كوتەرەمىز دەپ قيعىلىق سالۋدا. ەگەر تاريفتەر كۇرت وسسە قازاقستان تاراپى قوسىمشا 1 ميلليارد تەڭگەدەن استام شىعىنعا ۇشىرايتىن بولادى.

بەلارۋس پرەزيدەنتى الەكساندر لۋكاشەنكونىڭ قازاقستانعا دەگەن كوزقاراسى سوڭعى كەزدەرى وڭدى بولىپ جۇرگەن جوق. بىراق باتكا نە ىستەسە دە، قازاقستاننىڭ ونى جازالايتىن قۋاتتى رىچاگى بولماي تۇر. مينسكتى تەك بەلارۋس ازىق-تۇلىك يمپورتىن شەكتەۋ ارقىلى ءسال رەنجىتۋگە بولادى.

ۇكىمەت ۇيىندەگىلەر ءتاريفتى ورنىندا قالدىرۋ ءۇشىن بارىن جاساپ كورمەك. گەرمانياعا مۇناي ەكسپورتىن ۇزۋگە بولمايدى. سەبەبى، كەلىسىمدەرگە قول قويىلعان.

Abai.kz