جۇما, 29 ناۋرىز 2024
جاڭالىقتار 15326 0 پىكىر 4 جەلتوقسان, 2013 ساعات 09:43

شۇعىلا ساپارعاليقىزى: بي دە ءبىر جۇمباق الەم

الەم جۇرتىن ءتانتى ەتكەن قازاقتىڭ ءبيشى قىزى شۇعىلا ساپارعاليقىزى. قىتاي ەلىنىڭ ەڭ شەبەر ءبيشىسى اتانعان شۇعىلا بىرنەشە حالىقارالىق بي بايقاۋلارىنىڭ لاۋرەاتى. ول ەلباسىنىڭ ارنايى شاقىرۋىمەن اتامەكەنى – قازاقستانعا كەلگەن سوڭ، قازاقستان پرەزيدەنتى وركەسترىنىڭ باس ءبيشىسى، استاناداعى كۇلاش بايسەيىتوۆا اتىنداعى وپەرا جانە بالەت تەاترىنىڭ بالەتمەيستەرى بولىپ، قازاق جاستارىنا بي ونەرىن دارىتۋعا ايتارلىقتاي ەڭبەك ءسىڭىردى. سونداي-اق گەرمانيا، كورەيا سەكىلدى بىرقاتار ەلدەردىڭ تەاترلارى قولقا سالىپ، ونى ارنايى  شاقىرتقان كەزدەرى دە از بولعان جوق. ءسويتىپ، ول شەت جۇرتتاردا دا قىزمەت ەتتى. قازىر ءوزىنىڭ دەربەس ونەر وتاۋىن اشۋمەن شۇعىلدانىپ جۇرگەن شۇعىلا ساپارعاليقىزىمەن اڭگىمەلەسۋدىڭ ءساتى ءتۇستى.

الەم جۇرتىن ءتانتى ەتكەن قازاقتىڭ ءبيشى قىزى شۇعىلا ساپارعاليقىزى. قىتاي ەلىنىڭ ەڭ شەبەر ءبيشىسى اتانعان شۇعىلا بىرنەشە حالىقارالىق بي بايقاۋلارىنىڭ لاۋرەاتى. ول ەلباسىنىڭ ارنايى شاقىرۋىمەن اتامەكەنى – قازاقستانعا كەلگەن سوڭ، قازاقستان پرەزيدەنتى وركەسترىنىڭ باس ءبيشىسى، استاناداعى كۇلاش بايسەيىتوۆا اتىنداعى وپەرا جانە بالەت تەاترىنىڭ بالەتمەيستەرى بولىپ، قازاق جاستارىنا بي ونەرىن دارىتۋعا ايتارلىقتاي ەڭبەك ءسىڭىردى. سونداي-اق گەرمانيا، كورەيا سەكىلدى بىرقاتار ەلدەردىڭ تەاترلارى قولقا سالىپ، ونى ارنايى  شاقىرتقان كەزدەرى دە از بولعان جوق. ءسويتىپ، ول شەت جۇرتتاردا دا قىزمەت ەتتى. قازىر ءوزىنىڭ دەربەس ونەر وتاۋىن اشۋمەن شۇعىلدانىپ جۇرگەن شۇعىلا ساپارعاليقىزىمەن اڭگىمەلەسۋدىڭ ءساتى ءتۇستى.

– شۇعىلا ساپارعاليقىزى، بۇل كۇندەرى ءسىزدى بىلمەيتىن قازاق كەمدە-كەم. ءسىزدىڭ ونەرىڭىز تۋرالى، ءسىزدىڭ بي ونەرىمەن قاشان، قالاي اۋەستەنگەنىڭىز جايلى جۇرتشىلىق كەڭىنەن بىلگىسى كەلەتىنىن اڭعارىپ ءجۇرمىز. سوندىقتان اڭگىمەمىزدى ءوزىڭىزدىڭ بي الەمىنە العاش قالاي قادام باسقانىڭىزدان باستاۋدى ءجون كورىپ وتىرمىز.
– مەن قحر ىلە قازاق اۆتونوميالى وبلىسىنىڭ ورتالىعى قۇلجا قالاسىندا دۇنيەگە كەلدىم. اكەم ساپارعالي قالاداعى قازاق مەكتەبىندە ءبىراز جىلدار ديرەكتور بولدى. انام تۇرسىنحان دا بار سانالى ءومىرىن شاكىرت تاربيەلەۋگە ارناعان ۇستاز. مەن ەكى ۇلدان كەيىن دۇنيەگە كەلگەن جالعىز قىزبىن ءارى ءۇيدىڭ كەنجەسىمىن. اعالارىم اتا-انامنىڭ جولىن قۋىپ ۇستازدىقتى تاڭداسا، مەن ءبيشى بولۋدى ارماندادىم. بيگە يكەمدىلىگىمدى بايقاعان اتا-انام توعىز جاسىمدا بي مەكتەبىنە بەرەدى. بيشىلىك قابىلەتىم تانىلا باستاعان كەزدە بەيجىڭدەگى ۇلتتار ۋنيۆەرسيتەتىنىڭ بي فاكۋلتەتىنە وقۋعا ءتۇستىم. بۇل الەمگە ايگىلى ەلدەگى ەڭ بەدەلدى، جوعارى ءبىلىمدى بيشىلەر دايارلايتىن ءبىلىم ورداسى بولاتىن. بىزدە جىل سايىن الىپ ەلدىڭ ءارتۇرلى قالالارىنان تالاپكەر بيشىلەر كەلىپ، ونەر بايگەسىندە باقتارىن سىنايتىن. مىنە، سونداي جارىستاردىڭ بىرىنەن جۇلدەلى ورىن العاندار عانا وسى وقۋ ورداسىنا قابىلداناتىن. مەن وسىنداي بايگەدە جۇلدەلى ورىن الدىم. مۇندا وقىپ جۇرگەنىمدە ءبيدىڭ قىر-سىرىن تەرەڭ ءارى شەبەر مەڭگەرگەن نەبىر بىلىكتى دە بىلگىر پروفەسسورلار، عىلىم دوكتورلارى مەن اكادەميكتەردەن ءتالىم الىپ، شىڭدالدىم. وقۋىمدى ۇزدىك اياقتاپ، دۇنيەجۇزىنە ءماشھۇر ورتالىق ۇلتتار ءان-بي انسامبلىنە ءبىراۋىزدان جۇمىسقا قابىلداندىم. بۇل ونەر ۇجىمىندا بەس ءجۇز ادام جۇمىس ىستەيتىن. 56 ۇلتتىڭ ءان-كۇيىن، بي ونەرىن الەمگە دارىپتەپ جۇرگەن وسىنداي بي ۇجىمىندا جۇمىس ىستەۋ مەن ءۇشىن ۇلكەن جەتىستىك بولدى. وسىندا ءجۇرىپ ءبيدىڭ تىلسىم سىرلارىن مەڭگەرىپ، اعا بۋىن بيشىلەردەن كوپ نارسەنى ۇيرەنىپ، تاجىريبە جيناقتاپ، بي ونەرىنە توسەلدىم دەسەم بولادى. شەتەلدەگى حالىقارالىق بي بايقاۋلارىنا قاتىسىپ، يتاليا، فرانتسيا، كورەيا مەملەكەتتەرىندە توپ جارىپ، لاۋرەات اتاندىم.
– اتامەكەنگە قالاي كەلدىڭىز؟
– ءالى ەسىمدە، 1996 جىلى «دوس­تىق» قوعامىنىڭ شاقىرۋىمەن الما­تىعا كەلىپ، ونەرىمدى كورسەتتىم. اتاجۇرتىممەن تۇڭعىش ديدارلاسقانىم سول كەزدە ەدى. بۇدان كەيىن دە استانا تويىنا ارنايى شاقىرۋمەن كەلىپ، ەلوردا تورىندە بي بيلەگەنىم ەسىمنەن كەتپەيدى. ال 2000 جىلدىڭ كۇزى مەنىڭ ءومىرىم ءۇشىن ەرەكشە. سەبەبى ەلباسىنىڭ شاقىرۋىمەن اتا-بابامنىڭ كىندىك قانى تامعان اتاجۇرتىما ورالدىم. «وزگە ەلدە سۇلتان بولعانشا، ءوز ەلىڭدە ۇلتان بول» دەگەن دانا ءسوز بار. بۇل ءسوزدىڭ ماعىناسىن سىرتتا ءجۇرىپ تۇسىنەدى ەكەنسىڭ. ەلگە ورالعاننان كەيىن ماعان ەرەكشە قامقورلىق كورسەتكەندەر از بولمادى. ولارعا شەكسىز ريزامىن. ەلباسىنىڭ ءوزى ونەرىمدى باعالاپ، ۇلكەن سەنىم بىلدىرگەنى مەن ءۇشىن زور باقىت دەپ بىلەمىن. قىتايدا اتاعىم شىعىپ تۇرسا دا، اتاجۇرتىمنىڭ ورنى بولەك.
– قاي ەلدىڭ ءبيىن بيلەگەندى ۇناتاسىز؟
– قاي ەلدىڭ ساحناسىندا ونەر كورسەتسەم دە، ەڭ الدىمەن قازاق ءبيىن بيلەيمىن. ءوزىمنىڭ قازاق ەكەنىمدى تانىتۋ باستى ماقساتىم. ال قازاق ءبيى – بويتۇمارىم، مەنىڭ جۇلدىزىمدى جارقىراتقان دا سول.
– قىتايدا بي ونەرى جاقسى دا­مىعانى بارشاعا ايان. ال قازاقتا بۇل ونەر ءتۇرى كەنجە قالعان سەكىلدى. ءتىپتى كەيبىرەۋلەر «قازاقتا بي ونەرى بول­ماعان» دەيدى…
– بۇلاي دەۋ ءبىز ءۇشىن ۇيات. بي–قازاقپەن بىرگە ءونىپ-وسكەن، الىمساقتان كەلە جاتقان ونەر. قازاقتىڭ ءبيى دە ۇلتتىق سالت-ءداستۇرىمىز بەن قازاقتىڭ تۇرمىس-تىرشىلىگىنەن تۋىنداعان. ومىردەن العان اسەرىڭىزدەن، قۋانىشىڭىزدان، قايعى-كۇيىنىشىڭىزدەن ءان نەمەسە ولەڭ-جىر تۋماي ما؟! بي دە سول سياقتى. قازاق ءبيى – ۇلتتىق ءداستۇردى، سالتتى تانىتاتىن ونەردىڭ تورەسى دەسەك ارتىق ايتقاندىعىمىز ەمەس. سايىپ كەلگەندە، قازاق ءبيىنىڭ ارقاۋى حالىقتىڭ جان دۇنيەسى. مىنە، وسىنىڭ ءبارى كەز كەلگەن ءبيدىڭ قۇرىلىمىنان، بولمىسىنان ۇلتتىق قاسيەت ايشىقتى كورىنىس تاۋىپ جاتاتىنىنا كۇمان جوق. بىراق بۇنداعى ىشكى سەزىمدەردى بەينەلەۋ قۇرالى – قيمىل-قوزعالىس. ارينە، ويدى تىلمەن ەمەس، قيمىلمەن جەتكىزۋ قيىن نارسە. بي ۇلكەن ويدان تۋادى، ال بيلەيتىن ادام ءومىردىڭ نازىك يىرىمدەرىن تەرەڭ تۇسىنەتىن ويشىل جان بولۋى كەرەك دەر ەدىم. ءبيشى حالىقتىڭ ارعى-بەرگى تاريحىن تەرەڭ بىلەتىن، قاجەت بولسا، سول تاريحتى بي تىلىمەن بەينەلەي الاتىن جان بولسا نۇر ۇستىنە نۇر. بيشىلەر سونىمەن بىرگە كەيىپكەردى بەينەلەيتىن اكتەر بولۋى دا قاجەت.
مەن بۇگىنگى كۇنى ءبىراز بيشىلەردىڭ قيمىلدارىنا قاراپ باعا بەرە الامىن. بۇرىنعى جىلدارمەن سالىستىرعاندا، بي سالاسىندا ءبىراز العا جىلجۋشىلىق بار ەكەنىن ايتار ەدىم. استاناداعى «ناز» ءانسامبلىنىڭ سوڭعى كەزدەرى قويىپ جۇرگەن بيلەرى ۇنايدى. ولاردىڭ قول يىرىمدەرىندە قازاقي قيمىل-قوزعالىس بار. بىراق بىزدە قازاقتىڭ ۇلتتىق ءبيىنىڭ قيمىل-قوزعالىستارى ورنىقپاعان. مەكتەپ الىپپەسى سەكىلدى قازاقتىڭ ۇلتتىق ءبيى سۋرەتتەلىپ جازىلماعان. مىنە، سول سەبەپتى ءار بي ءانسامبلىنىڭ حورەوگرافى وزدىگىنشە بي قويىلىمدارىن قويىپ جاتادى. اركىم بىلگەنىنشە ۇيرەتەدى. ەلىمىزدە كوپتەگەن بي مەكتەپتەرى مەن ۇيىرمەلەرى بار. قازاقتىڭ بيلەرىن باسقا حالىقتاردىڭ بيىمەن قاتار ۇيرەتەدى دە، قازاق بيىنە باسىمدىق بەرىلمەيتىنى قىنجىلارلىق جايت. ءسويتىپ، قازاق بيلەرىنە وزگە ۇلت بيلەرىنىڭ اسەرى كۇشتى بولىپ شىعادى. بۇل قازاق بيلەرىنە قيانات. مىسالعا، سەلەزنەۆ اتىنداعى حورەوگرافيالىق ۋچيليششەسىندە 8 جىل بويى تەك بالەت ۇيرەتىلەدى. سوڭىندا بيشىلەر ىرىك­تەلىپ، يكەمدىلەرى بالەتكە، ال قالعاندارى ۇلتتىق بيگە جىبەرىلەدى. وسىدان-اق ۇلتتىق بيگە دەگەن نەمقۇرايلى كوزقاراستى بايقاۋعا بولادى.

شۇعىلا ساپارعاليقىزى: بي دە ءبىر جۇمباق الەم
بىزدە ءالى كۇنگە دەيىن بيگە دەگەن دۇرىس كوزقاراس قالىپتاسپاعان. الدىمەن مۋزىكا جازىلادى. مىنە، ودان كەيىن وعان بي قويىلادى. كوبىنەسە ءان مەن بي قويىلىمدارى ۇيلەسپەي جاتاتاتىنى سوندىقتان دەپ ويلايمىن. ال نەگىزىندە اۋەن جازاتىن سازگەر، ءبيدى قويۋشى حورەوگراف، ءبيشى – ۇشەۋى بايلانىسا جۇمىس ىستەۋى كەرەك. ءتىپتى ءبيدىڭ اسەرلى بولىپ شىعۋىنا بيشىلەردىڭ كيىمدەرىنىڭ دە الاتىن ورنى بار. كەز كەلگەن بي قويىلىمىندا وزىندىك سىر، يدەيا بولۋى ءتيىس. ال دايىن مۋزىكاعا قويىلعان بي ەشقاشان كورەرمەن ەسىندە قالارلىقتاي اسەر قالدىرماسى انىق.
قىتايدا بي مەكتەبىنىڭ الدەقايدا ىلگەرى دامىپ كەتكەنى راس. مىسالعا، مەن ءبىلىم العان وقۋ ورداسىندا بارلىق ۇلتتاردىڭ ءبيىن وقىتتى. بۇندا ءبىر حالىقتىڭ ءبيىن ۇيرەتپەس بۇرىن سول ەلدىڭ تاريحى، سالت-ءداستۇرى، تابيعاتى، وزىندىك ەرەكشەلىگى مەن فيلوسوفياسى وقىتىلادى. سول حالىقتىڭ بولمىسىن ۇققاننان كەيىن ونىڭ ءبيىن ءتۇسىنۋ قيىن ەمەس. ايتالىق، تيبەت حالىقتارىنىڭ ءبيىنىڭ نەگىزگى ەلەمەنتى ولاردىڭ دەنەسىن تىك ۇستاماۋىندا. سەبەبى تاۋلى ايماقتاردى مەكەندەگەندىكتەن، بيىك جەرلەرگە شىعىپ ۇيرەنگەن ولار ءيىلىپ جۇرەدى. بۇل دا ولاردىڭ ۇلتتىق ەرەكشەلىگىن كورسەتسە كەرەك.قىتايدا ساحنالىق ءبيشى،بي قويۋشى، بي ۇيرەتۋشى دەپ جەكە-جەكە ماماندىقتارعا بولىنەدى. بۇعان قوسا، بيشىلىكتى ونەردىڭ بيىگى سانايتىن بۇل ەلدىڭ بي وقۋلىقتارى، جازىلعان تاسپاسى ءبىر مۇرا. وقۋلىقتاردا ءار قيمىل سۋرەتپەن كورسەتىلەدى. ال بىزدە قالاي؟ ۇلتتىق بيگە بايلانىستى ەشقانداي وقۋلىق جوق. قازاقتىڭ ۇلتتىق ءبيىن ناسيحاتتاپ، حالىققا تانىتۋ ءۇشىن، ءبيدىڭ نەگىزگى ەلەمەنتتەرى ايقىنداپ جازىلعان وقۋلىق، بۇعان قوسا تاسپاعا تۇسىرىلگەن بەينەبايانى بولۋى قاجەت. سوندا حالىقتا ۇلتتىق بيگە دەگەن قىزىعۋشىلىق تا پايدا بولارى انىق. حورەوگراف وقۋشىعا جاڭا قيمىل-قوزعالىس كورسەتە وتىرىپ، ونىڭ قاي بۇلشىق ەتى جۇمىس ىستەيتىنىن ايتىپ، ءبيدىڭ دەنساۋلىققا پايدالى تۇستارىن دا كورسەتسە، بۇل دا ءوز كەزەگىندە ءبيدىڭ تابيعاتىن تۇسىنۋگە كومەكتەسەدى.
– قازىر قازاقتار جاپپاي «قارا­جورعا» ءبيىن بيلەيتىن بولىپ الدى. بۇل بي ارقىلى جاستاردىڭ ۇلتىمىزعا دەگەن سۇيىسپەنشىلىگىن ارتتىرامىز دەيتىندەر دە بار. ءتىپتى بۇل ءبيدى قازاقتىڭ ۇلتتىق ءبيى ەمەس دەپ جالا جاۋىپ جۇرگەندەر دە ۇشىراسادى.
– ارينە، بۇل قازاقتىڭ ءبيى. توي-تومالاق بولعاندا قازاقتىڭ «قارا جورعا» كۇيى ورىندالىپ، سونىڭ نەگىزىندە بۇل بي دە پايدا بولعان. سوندىقتان بۇل ومىردەن الىنعان ونەر ەكەنى ءسوزسىز. بىرەۋلەر بۇل ءبيدىڭ يىق قوزعالىستارى قالماقتار مەن موڭعولداردىڭ بيلەرىنە ۇقسايدى دەپ جاتادى. قازاق تا، قالماق تا كوشپەلى حالىق بولىپ ارالاسىپ ءومىر سۇرگەن. سوندىقتان بۇنداعى بي قوزعالىستارى كوشپەلى حالىقتىڭ تابيعاتىنا بايلانىس­تى تۋعان. «قارا جورعادا» جىگىتتىڭ اتقا مىنگەندەگى شابىسى سول يىق قيمىلدارى ارقىلى ايقىن كورىنەدى. سول سياقتى كيىز باسۋ، ۇرشىقپەن ءجىپ ءيىرۋ دە قازاقتىڭ بي ونەرىنە نەگىز بولعان. قازاق اتامىز تۇرمىس-تىرشىلىگىن بي ارقىلى بەينەلەي بىلگەن. سوندىقتان ءبىز ءوزىمىزدىڭ ۇلتتىق ءبيىمىزدى قۇرمەتتەي ءبىلۋىمىز كەرەك. قازاق بيلەرىن جاڭعىرتىپ، بارىنشا دارىپتەۋ قاجەت.
– سوڭعى كەزدەرى باتىستىڭ داڭعازا، جەڭىلتەك اۋەندەرىنە ەلىكتەيتىن قازاق جاس­تارى كوبەيىپ كەتتى. سول سەكىلدى جاستار اراسىندا باتىستىڭ جۇلقىنعان اۋەندەرىنە عانا بيلەۋ داستۇرگە ءسىڭىپ بارادى. سوندا بۇل ءبىزدىڭ قازاقتىڭ ءداستۇرلى اۋەندەرىنەن، بيىنەن بەزىنۋىمىز بە؟ الدە، قازاق بيلەرى قازىرگى قازاق جاستارىنىڭ تالعامىنا تاتىمايتىن بولعانى ما؟
– ءيا، اتامەكەنگە العاش ورالعان كەزدە قازاق جاستارىنىڭ جاپپاي شەتەل اۋەنىن شىرقاپ، شەتەل بيلەرىن بيلەيتىنىنە تاڭدانىپ، قىنجىلعان ەدىم. شەت جۇرتتار، اسىرەسە، باتىستىڭ ەكسپانسياسى دەگەنىمىز وسى بولسا كەرەك. ءتىپتى جاستار عانا ەمەس، ونەر ادامدارى دا شەتەلگە ەلىكتەيتىنى، شەتەل ونەرىنە تابىناتىنى اڭعارىلادى. سونىڭ سالدارىنان قازاقتىڭ ۇلتتىق ونەرىنە وراسان نۇقسان كەلىپ جاتىر دەۋگە بولادى. قازاقتىڭ ءبيى اتالعانىمەن، اۋەنى دە قيمىل-قوزعالىسى دا قازاقتىكى ەمەس بيلەردى كورىپ ءجۇرمىز. باسقا ۇلتتان وزىمىزگە كەرەگىن الىپ، قيمىل-قوزعالىستاردى ۇلتتىق بيلەرىمىزگە نەگىزدەۋ قاجەت قوي. ال ءبىز بولساق، سىرتتان كەلگەن دۇنيەنى تاڭداپ، تالعاماي قابىلداي بەرەمىز. وسىنىڭ سالدارىنان قازاق ءوزىنىڭ ونەرىندەگى ۇلتتىق ناقىشىنان ايىرىلىپ قالا ما دەگەن دە قاۋىپ بار. قازاق ءبيىنىڭ وزىندىك ەرەكشەلىگى مول. مىسالعا، وزبەك ءبيى دەگەندە، يىق قوزعالىستارىنان-اق ءبىز ولاردى بىردەن اجىراتامىز. سول سياقتى ءۇندى ءبيى بولسا، ونى دا بىردەن تانيمىز. مىنە، سونداي ۇلتتىق ناقىشتى بەينەلەيتىن، باسقا ۇلتتارعا ءوزىن تانىس­تىراتىن بي ەلەمەنتتەرى بىزدە دە بار. بىراق، قازاقتىڭ بي مەكتەپتەرى مۇنى ەسكەرمەي كەلە جاتقاندىقتان، بيدەگى ەرەكشە قيمىل ەلەمەنتى كوزگە كورىنبەيدى. زامان اعىمىنا قاراي ءبىز ۇلتتىق بەينەنى ساقتاي وتىرىپ، قازاق ءبيىن دامىتۋىمىز كەرەك. بىزدەگى بيشىلەردىڭ باستى كەمشىلىگى، قازاق بيلەرىندەگى ۇلتتىق بوياۋدى تۇسىنە الماعانىندا دەر ەدىم. ءبيدىڭ بارلىق ەلەمەنتتەرى ءبىرتۇتاس ۇلتتىق دۇنيە بولۋى كەرەك. ءبىر سوزبەن ايتقاندا، بي دە ءبىر جۇمباق الەم.
– قازىرگى مىڭ بۇرالعان بيشىلەر اراسىندا ءۇمىت كۇتتىرەر ءبيشى جاستار بار ما؟
– بىزدە بيشىلەر اراسىندا باسە­كە­لەستىك جوق. ايتالىق، بەلگىلى بي قويىلىمىندا ءبىر ءبيشى عانا ونەر كورسەتەدى. ءسويتىپ، كوپشىلىك اراسىنداعى تالانتتى ءبيشىنى ەشكىم بايقامايدى. تالپىنعان تالانتتى جاستارعا قولداۋ كورسەتىلسە، باسەكەلەستىك تە بولادى. باسە­كەلەستىك بار جەردە عانا ءوسۋ بولاتىنىن ەسكەرۋ قاجەت. بۇگىنگى ءبىزدىڭ قازاق ءبيىن دامىتۋ ءۇشىن ءالى دە كوپ جۇمىس جاساۋ كەرەك. بىزدە بيشىلەر جوق ەمەس. ماسەلە ولاردى ۇلتتىق ونەرگە باۋلۋ جاعى كەمشىن ءتۇسىپ جاتىر.
– ءسىزدى سوڭعى كەزدەرى قازاق ساحناسىنان كورە الماي ءجۇرمىز. سونىڭ سەبەبىن ايتا كەتسەڭىز…
– سوڭعى جىلدارى مەن ەۋرو­پا ەل­دەرىندە، گەرمانيادا ءبىراز ونەر كورسەتتىم. ءتىپتى، ايلاپ، جىلداپ سونداعى كونتسەرتتەرگە قاتىساتىن بولدىم. ال سوڭعى ەكى جىلدا مەن ءوزىمنىڭ جەكە ونەر ورتالىعىمدى اشۋمەن شۇعىلدانىپ ءجۇرمىن. بۇل ورتالىقتا بي ونەرىنەن باسقا، ءان، سۋرەت ۇيىرمەلەرى دە بار. جۋىقتا بۇل ورتالىقتىڭ دا تۇساۋى كەسىلمەك.
– اڭگىمەڭىزگە راحمەت!

اڭگىمەلەسكەن
اقبوتا يسلامبەك

"انا ءتىلى" گازەتى

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3610