قالامگەرلەر قيىن كەزەڭدە حالىقپەن بىرگە

9 ءساۋىر كۇنى قازاقستان جازۋشىلار وداعىندا باسقارما حاتشىلىعىنىڭ جيىنى بولىپ ءوتتى. جيىندا مەملەكەت باسشىسى قاسىم-جومارت توقاەۆتىڭ سۋ تاسقىنى سالدارىنان قالىپتاسقان اۋىر جاعدايعا بايلانىستى قابىلداعان ۇندەۋىنە وراي قازاقستان جازۋشىلار وداعىنىڭ ەلىمىزدەگى بارلىق شىعارماشىلىق وداقتارعا ارنالعان ۇندەۋىن قابىلداۋ ماسەلەسى قارالدى.

ءماجىلىستى اشىپ، جۇرگىزىپ وتىرعان قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆ الدىمەن ەلىمىزدىڭ 10 وڭىرىندە تاسقىن سۋدىڭ سالدارىنان قالىپتاسقان كۇردەلى جاعدايدى ايتا كەلىپ، جۇرتشىلىقتىڭ تابيعات اپاتىمەن كۇرەستە كورسەتىپ وتىرعان بىرلىك-بەرەكەسىنە ەرەكشە توقتالىپ ءوتتى.

– بۇل ۇردىستەن ءبىزدىڭ قالامگەرلەرىمىز دە شەت قالماي كەلەدى، – دەدى توراعا ءوز سوزىندە. – جەر-جەردەگى وداق فيليالدارىنىڭ مۇشەلەرى اپاتتىڭ الدىن الۋعا ءوز ۇلەستەرىن قوسىپ كەلەدى. كۇنى كەشە قارىمدى قالامگەر، ساڭلاق سازگەر ءىليا جاقانوۆتىڭ جايىق جاعاسىنداعى تاسقىنمەن ارپالىسىپ جۇرگەنىن جۇرتشىلىق تۇگەل كوردى. سۆەتقالي نۇرجاننىڭ دا وسى قاتاردا جۇرگەنىن ەستىپ-ءبىلىپ وتىرمىز. وزگە اقىن-جازۋشىلارىمىز دا رۋحتى جىرلارىمەن، ناقتىلى ءىس-ارەكەتتەرىمەن قينالعان حالىققا دەمەۋ بولۋدا.

بۇگىندەرى قوعامدا وسى اپات ءۇشىن تەك بيلىكتى كىنالاۋ بەلەڭ الىپ كەلەدى. ارينە، ولاردىڭ جىبەرگەن ولقىلىقتارى بار ەكەنىن جوققا شىعارۋعا بولمايدى. الايدا، اسا دامىعان اقش، ۇلىبريتانيا، گەرمانيا، چەحيا، فرانتسيا، جاپونيا سياقتى مەملەكەتتەردىڭ ءوزى  سۋ تاسقىنىنىڭ ازابىن تارتىپ جاتقاندا، ءبىزدىڭ ەلدە نەگە الدىن الا قويمادى دەۋ، جۇمسارتا ايتقاندا ارتىقتاۋ ما دەيمىن.

وسى تابيعي اپاتقا بايلانىستى ەل پرەزيدەنتى قاسىم-جومارت توقاەۆتىڭ سۋ تاسقىنى سالدارىنان قالىپتاسقان اۋىر جاعدايعا بايلانىستى ۇندەۋ جاريالاعانىن بىلەسىزدەر. ءوز كەزەگىندە قازاقستان جازۋشىلار وداعى مەملەكەت باسشىسىنىڭ ۇندەۋىنە تولىق قولداۋ بىلدىرە وتىرىپ، قالامگەر قاۋىمنىڭ اتىنان ەلىمىزدەگى بارلىق شىعارماشىلىق وداقتارىنا ۇندەۋ جاريالاۋدى ءجون كورىپ وتىرمىز. سىزدەردەن وسى باستاماعا قولداۋ كورسەتىپ، وي-پىكىرلەرىڭىزدى ورتاعا سالۋلارىڭىزدى سۇرايمىن.

قازاقستان جازۋشىلار وداعى باسقارما توراعاسىنىڭ ورىنباسارى عالىم قاليبەك جيىلعان جۇرتشىلىقتى ۇندەۋدىڭ ماتىنىمەن تانىستىرعاننان كەيىن، قازاقستان جازۋشىلار وداعى باسقارما توراعاسىنىڭ ورىنباسارلارى مەن حاتشىلارى ماسەلەگە قاتىستى پىكىرلەرىمەن ءبولىسىپ، ۇسىنىستارىن ورتاعا سالعان.

– بيىلعى كوكتەم الابوتەن بولدى، – دەدى توراعانىڭ ورىنباسارى، اقىن باۋىرجان جاقىپ. – قار مولشەردەن تىس كوپ تۇسكەندىكتەن شىعار، ەلىمىزدىڭ ون ايماعىندا سۋ تاسقىنى بولىپ، توتەنشە جاعداي جاريالاندى. مەملەكەت باسشىسى قاسىم-جومارت كەمەلۇلى كولەمى جاعىنان 80 جىلدان بەرگى ەڭ ءىرى تابيعي اپات تۋرالى ايتا كەلىپ، قالىپتاسقان اۋىر جاعدايعا بايلانىستى حالقىمىزعا ۇندەۋ جاريالادى. وندا قۇزىرلى مەملەكەتتىك ورگاندارعا شۇعىل تۇردە تاپسىرمالار بەرىلىپ، تاسقىن سۋدان زارداپ شەككەن بارشا ازاماتتارعا قارجىلىق جانە باسقا دا كومەكتەر كورسەتىلەتىنىن، ماتەريالدىق شىعىندار تولىق وتەلەتىنىن ايتتى. بۇل تابيعي اپاتتان جاپا شەككەن قاراپايىم حالىق ءۇشىن ۇلكەن دەمەۋ بولدى. اپاتتىڭ الدىن الۋ جۇمىستارىنداعى كەمشىلىكتەر، سۋ شارۋاشىلىعى ماماندارىنىڭ تاپشىلىعى، تاعى باسقا پروبلەمالاردىڭ بار ەكەنىنە نازار اۋدارعان. پرەزيدەنتتىڭ ۇندەۋىن تالقىلاي كەلە، قازاقستان جازۋشىلار وداعىنىڭ حاتشىلىق ماجىلىسىندە ەلىمىزدەگى بارشا شىعارماشىلىق وداقتارعا ۇندەۋ جاريالاۋدى ءجون كورىپ وتىرمىز. ەلىمىزدەگى باسقا دا شىعارماشىلىق وداقتارعا توراعانىڭ قولىمەن حات جولدانىپ، جالپى زيالى قاۋىمنىڭ بۇل ىستەن شەت قالماۋىنا باستاما جاسالدى.

قازىرگى كۇندەرى تاسقىن سۋ قاۋپى ارتقان باتىس قازاقستان، اتىراۋ، قوستاناي، سولتۇستىك قازاقستان، شىعىس قازاقستان وبلىستارىنداعى  قيىن-قىستاۋ كۇندەر تەزىرەك ءوتىپ، ەلىمىز امان، جۇرتىمىز تىنىش بولۋىن تىلەيمىز.

وداق توراعاسىنىڭ ورىنباسارلارى نۇرجان قۋانتايۇلى مەن بەيبىت سارىباي دا تاقىرىپقا قاتىستى ويلارىن ورتاعا سالىپ، اتالعان جۇمىستاردى اتقارۋدىڭ ناقتىلى قيمىلدارى تۋراسىندا ۇسىنىستارىن جەتكىزگەن.

قر مەملەكەتتىك سىيلىعىنىڭ لاۋرەاتى، اقىن باقىتجان قاناپيانوۆ بۇل شەتىن وقيعادان بارشا قازاقستاندىقتار شەت قالمايتىنىن ايتا كەلىپ، شاما-شارقىنشا وزدەرىنىڭ دە ۇلەس قوساتىنىن جەتكىزگەن. ادەبيەت سىنشىسى ءاليا بوپەجان جالپى ەلىمىزدەگى تابيعي اپاتتار مەن توسىن وقيعالاردىڭ شىعۋ تابيعاتىن زەرتتەپ، زەردەلەۋ ءۇشىن پۋبليتسيستەردىڭ قالام كۇشىن جەتە پايدالانۋ كەرەكتىگىنە توقتالسا، كورنەكتى جازۋشى، جازۋشىلار وداعىنىڭ حاتشىسى جۇسىپبەك قورعاسبەك مۇنداي سۋ تاسقىندارىنىڭ بۇرىننان ورىن الىپ كەلە جاتقانىن تىلگە تيەك ەتتى. وسىدان ءبىر عاسىر بۇرىن ىبىراي التىنسارين تورعاي ولكەسىندەگى قارعىن سۋ اپاتى جايلى جازباسىندا وزەن جاعالاپ، ارنا قۋىپ قۇرىلىس سالۋعا بولمايتىنىن سول كەزدە-اق ايتىپ كەتكەن ەكەن.

جازۋشىلار وداعى باسقارما توراعاسىنىڭ ورىنباسارى، اقىن قاسىمحان بەگمانوۆ مۇنداي شەتىن جاعدايلاردىڭ ورىن الۋى ەڭ الدىمەن سۋ شارۋاشىلىعى ماماندارىنىڭ جوقتىعىنان ەكەنىن ەسكەرتىپ، تاراز قالاسىنداعى مەليوراتيۆتىك ينستيتۋتتى قالپىنا كەلتىرۋ قاجەتتىگىن باسا ايتتى.

فيلولوگيا عىلىمدارىنىڭ دوكتورى، پروفەسسور قانسەيىت ابدەزۇلى پرەزيدەنتتىڭ جانە بۇگىنگى جازۋشىلار وداعىنىڭ ۇندەۋىن تولىق قولدايتىنىن ايتا كەلىپ، بۇل باستامانى ەلىمىزدەگى بارلىق شىعارماشىلىق وداقتار – كومپوزيتورلار، سۋرەتشىلەر، كينوگەرلەردىڭ باسىن بىرىكتىرەتىن ۇيىمدار قولداسا دەگەن تىلەگىن جەتكىزگەن. قازاقستان جازۋشىلار وداعى باسقارما توراعاسىنىڭ كەڭەسشىسى، جازۋشى اۆۋت ماسيموۆ ۇندەۋدى تولىق قولدايتىنىن، ۇيعىر قالامگەرلەرىنىڭ ارنايى ادەبيەت قورىنان اپاتقا 50 مىڭ تەڭگە اقشا اۋداراتىنىن مالىمدەگەن. «انا ءتىلى» گازەتىنىڭ باس رەداكتورى، اقىن ەرلان ءجۇنىس، قازاقستان جازۋشىلار وداعىنا قاراستى «جۇلدىز» جۋرنالىنىڭ باس رەداكتورى، مەملەكەتتىك سىيلىقتىڭ يەگەرى، جازۋشى تۇرىسبەك ساۋكەتاي ەلدىڭ باسىنا ءتۇسىپ وتىرعان ناۋبەتكە حالىق بولىپ كومەك كورسەتىپ جاتقانىن، وسى ورايدا قالامگەرلەردىڭ دە بۇل باستاماسىن قولدايتىنىندارىن جەتكىزدى. دەگەنمەن، بولاشاقتا ۇيلەر مەن شارۋاشىلىق قۇرىلىستارىن سالۋدىڭ شارتتارى مۇقيات قارالىپ، جوبالاۋ ماسەلەسى جولعا قويىلسا دەگەن ۇسىنىستارىن قوسا جەتكىزدى. «قازاق ادەبيەتى» گازەتىنىڭ ادەبي قىزمەتكەرى، اقىن قۋات قايرانباەۆ قارعىن سۋ قايتقاننان كەيىن ەلىمىزدى تاعى ءبىرشاما قاۋىپتەر كۇتىپ تۇرعانىن، اتاپ ايتقاندا – جەردىڭ قۇنارلى قاباتىن سۋ شايىپ كەتكەندىكتەن استىق شىعىمدىلىعى تومەندەپ، ناتيجەسىندە قىمباتشىلىق باستالۋى مۇمكىندىگىن جانە كارىزدەر مەن دارەتحانا سۋلارىنىڭ كوتەرىلىپ كەتۋىنە بايلانىستى ەپيدەميا قاۋىپى تۋىنداۋى مۇمكىن ەكەندىگىنەن قۇلاققاعىس ەتتى. دەمەك، بۇگىننەن باستاپ وسى قاۋىپتىڭ الدىن الۋ شارالارىن ويلاستىرعان ءجون. «پروستور» جۋرنالىنىڭ باس رەداكتورى، اقىن فارحات تامەنداروۆ جانە قازاقستان جازۋشىلار وداعىنىڭ باس ەسەپشىسى گاۋھار جۇماعۇلوۆا دا ءوز پىكىرلەرىن اشىق ايتىپ، ويلارىن ورتاعا سالدى. جيىنعا قاتىسۋشىلار قازاقستان جازۋشىلار وداعى ۇندەۋىن قولداپ، ءماتىنىن بەكىتتى.

قازاقستان جازۋشىلار وداعىنىڭ
ەلىمىزدەگى بارشا شىعارماشىلىق وداقتارعا

ءۇ ن د ە ۋ ءى

حالقىمىزدا «اپات ايتىپ كەلمەيدى» دەگەن ءسوز بار، ەلىمىزدىڭ كوپتەگەن ايماقتارىنا بيىلعى كوكتەم اۋىرتپالىعىن الا كەلدى. اسىرەسە ەرىگەن قار سۋى مەن وزەندەر ارناسىنىڭ اسۋىنان بىرقاتار وبلىستار زارداپ شەگۋدە. وسىعان وراي مەملەكەت باسشىسى ق.ك. توقاەۆ حالىققا ارنايى ۇندەۋ جولدادى. قازاقستان جازۋشىلارى بۇل ۇندەۋدى تولىقتاي قولدايدى.

قارعىن سۋدىڭ ەكپىنىنە جەرگىلىكتى تۇرعىندار دا ءوز كۇشتەرىمەن قارسى تۇرىپ، وكىمەت ورىندارىنىڭ كومەگىن كۇتپەستەن بوگەت سوعىپ، تاسقىنعا توسقاۋىل قويۋعا بار كۇشتەرىن سالۋدا. اتقارۋشى بيلىك وكىلدەرى مەن ارنايى قۇرىلعان مەملەكەتتىك كوميسسيانىڭ مۇشەلەرى حالىققا كومەك كورسەتۋدى جان-جاقتى قولعا الۋدا.

«جۇمىلا كوتەرگەن جۇك جەڭىل» دەگەندەي، تابيعاتتىڭ توسىن مىنەزىنە بۇكىل حالىق بولىپ قارسى تۇرىپ، بىرلەسە قيمىلداپ جاتىر. وسى ورايدا قازاقستان جازۋشىلار وداعىنىڭ مۇشەلەرى مەملەكەت باسشىسىنىڭ ۇندەۋىنە قولداۋ كورسەتىپ، تاسقىن سۋعا قارسى كۇرەسكە ءوز ۇلەستەرىن قوسۋعا شەشىم قابىلداي وتىرىپ، بارشا شىعارماشىلىق وداقتاردى، زيالى قاۋىم وكىلدەرىن وسى ىسكە اتسالىسۋعا شاقىرادى.

جازۋشىلار وداعىنىڭ جانىنان ارنايى قور قۇرىلىپ، ەسەپ-شوت اشىلدى (رەسپۋبليكانسكوە وبششەستۆەننوە وبەدينەنيە سويۋز پيساتەلەي كازاحستانا. كود 18, بين/ين 920140000976. او «بانك تسەنرتكرەديت». KZ758562203122544351). وداق مۇشەلەرى مەن اپپارات قىزمەتكەرلەرى وزدەرىنىڭ ءبىر كۇندىك جالاقىسىن وسى شوتقا اۋدارۋعا ۇيعاردى. سىزدەر دە وسى ەسەپشوتقا ءبىر كۇندىك ەڭبەكاقىلارىڭىزدى اۋدارۋلارىڭىزدى سۇرايمىز.

تالاي قيىندىقتاردى باسىنان وتكەرگەن قازاق حالقى بۇل تابيعي اپاتتى دا اۋىزدىقتايتىنىنا سەنەمىز. قيىن-قىستاۋ شاقتا بىرگە بولايىق، اعايىن

قازاقستان جازۋشىلار وداعى

9 ءساۋىر، 2024 جىل.

Abai.kz