كەشە ۋكراينا استاناسى كيەۆتە قازاقستاندىق وپپوزيتسيالىق جۋرناليست، «باسە» كانالىنىڭ نەگىزىن قالاۋشى ايدوس سادىقوۆقا قاستاندىق جاسالدى. بۇل تۋرالى ونىڭ ايەلى، جۋرناليست ناتاليا سادىقوۆا Facebook-تەگى پاراقشاسىندا حابارلادى.

ۋكراينالىق باق-تىڭ دەرەگىنشە، وقيعا كيەۆتەگى شەۆچەنكو اۋدانىندا بولعان. كيەۆ پروكۋراتۋراسى سادىقوۆقا جاسالعان قاستاندىققا قاتىستى «قاساقانا ادام ولتىرۋگە وقتالۋ» فاكتىسى بويىنشا سوتقا دەيىنگى تەرگەۋدى باستاعان. پروكۋراتۋرانىڭ حابارلاۋىنشا، سادىقوۆ قازىر اۋرۋحانادا جاتىر، جاعدايى اۋىر.

اتالعان وقيعاعا قاتىستى قازاقستان پرەزيدەنتى قاسىم-جومارت توقاەۆ پىكىر ءبىلدىردى.

«ەلىمىزدە زاڭ ۇستەمدىگىن نىعايتىپ جاتىرمىز، ياعني بارلىق سالادا، ەڭ الدىمەن، زاڭ ۇستەمدىگىن قامتاماسىز ەتۋ – باستى مىندەت. بۇل ماسەلە بويىنشا مەنىڭ كوزقاراسىم – ايقىن. مۇنى وزدەرىڭىز دە جاقسى بىلەسىزدەر. قازاقستاندا زاڭ مەن ءتارتىپ بارىنەن بيىك تۇرۋعا ءتيىس. سوندىقتان قوعامداعى بارلىق قاراما-قايشىلىقتار مەن كەلىسپەۋشىلىكتەردى تەك قانا قۇقىقتىق تۇرعىدان، ياعني ءتيىستى زاڭناماعا جانە نەگىزگى حالىقارالىق نورمالارعا سايكەس شەشۋ قاجەت.

كەشە قازاقستان ازاماتى ايدوس سادىقوۆقا قاتىستى كيەۆتە بولعان قىلمىسقا دا ءدال وسى ۇستانىم تۇرعىسىنان قاراعان ءجون. مەن ديپلوماتيالىق ارنالار مەن قۇقىق قورعاۋ ورگاندارى ارقىلى وسى وقىس وقيعا بويىنشا ۋكراينا تاراپىنا رەسمي سۇراتۋلار جىبەرۋ تۋرالى ناقتى تاپسىرما بەردىم.

سونداي-اق قاجەت بولعان جاعدايدا قازاقستاننىڭ رەسمي ورگاندارى ءىستىڭ اقيقاتىنا جەتۋگە جاردەم بەرۋ ءۇشىن تەرگەۋ جۇمىسىنا قاتىسۋعا دايىن ەكەنىن ايتقىم كەلەدى»، – دەدى قاسىم-جومارت توقاەۆ.

قازاقستاندىق جۋرناليست ايدوس سادىقوۆقا جاسالعان قاستاندىقتان كەيىن قازاقستان بيلىگى ۋكرايناعا رەسمي نوتا جولدادى. بۇل تۋرالى قازاقستاننىڭ ۋكرايناداعى ەلشىسى دارحان قالەتاەۆ «ازاتتىققا» مالىمدەدى.

«ءبىز ۋكراينا سىرتقى ىستەر مينيسترلىگىنە وسى جاعدايعا بايلانىستى تۇسىنىكتەمە الۋ ءۇشىن رەسمي نوتا جولدادىق. ءالى جاۋاپ كەلمەدى. ۋكراينا تارابىنان بىزگە ەشكىم حابارلاسقان جوق»، - دەدى ەلشى قالەتاەۆ.

Abai.kz