جەكسەنبى كۇنى رەسەيدەگى داعىستاننىڭ دەربەنت جانە ماحاچكالا قالالارىندا بولعان شابۋىلدان كەم دەگەندە 17 ادام، ونىڭ ىشىندە 15 پوليتسيا قىزمەتكەرى قازا تاپتى.

رەسپۋبليكادا لاڭكەستىككە قارسى وپەراتسيا رەجيمى ەنگىزىلدى، ەكى قالاداعى ۇرىستار كەشكە دەيىن جالعاستى. ساعات 23:00-دە ۇلتتىق انتيتەرروريستىك كوميتەت (ۇاك) دەربەنتتە ارنايى وپەراتسيانىڭ بەلسەندى فازاسى اياقتالعانىن حابارلادى.

ماحاچكالا مەن دەربەنتتەگى سويقان: انىق-قانىعى قانداي؟

تۇندە ۇاك وپەراتسيا بارىسىندا 5 شابۋىلشى قازا تاپقانىن حابارلادى.

«دەربەنتتە وتكىزىلگەن جاۋىنگەرلىك ءىس-شارا ناتيجەسىندە ەكى بانديت، ماحاچكالادا ءۇش بانديت بەيتاراپتاندىرىلدى»، - دەلىنگەن حابارلامادا.

داعىستاننىڭ باسشىسى سەرگەي مەليكوۆ: «15-تەن استام پوليتسيا قىزمەتكەرى قولىنا قارۋ الىپ، داعىستاننىڭ بەيبىتشىلىگى مەن تىنىشتىعىن قورعاپ، بۇگىنگى لاڭكەستىك ارەكەتتىڭ قۇربانى بولدى»، - دەگەن ەدى. ول سونىمەن قاتار، شابۋىل سالدارىنان بىرنەشە بەيبىت ادامنىڭ قازا تاپقانىن ايتتى.

شابۋىل جاساۋشىلاردىڭ ناقتى سانى ازىرگە بەلگىسىز. ۇاك سودىرلارعا كومەكتەسۋشىلەردى ىزدەۋدە. رەسپۋبليكا ءىىم مالىمەتىنشە، ماحاچكالا اۋرۋحاناسىنا 16 ادام جەتكىزىلگەن. قازا تاپقاندار تۋرالى اقپارات ناقتىلانۋدا.

رەسەيدىڭ تەرگەۋ كوميتەتى «تەراكت» بابى بويىنشا قىلمىستىق ءىس قوزعادى.

24-26 ماۋسىم كۇندەرى داعىستاندا ازا تۇتۋ كۇندەرى دەپ جاريالاندى.

ايماق باسشىسى داعىستانداعى جاعداي بيلىك پەن جەدەل ورگانداردىڭ باقىلاۋىندا ەكەنىن ايتتى.

«قازا تاپقانداردىڭ جانە زارداپ شەككەندەردىڭ وتباسىلارىنا ماتەريالدىق كومەك كورسەتىلەدى. داعىستاندا سودىرلاردىڭ ۇيىقتاپ جاتقان ۇياشىقتارىن انىقتاۋ جالعاسادى»، - دەپ مالىمدەدى مەليكوۆ.

بيلىكتىڭ ايتۋىنشا، سودىرلاردىڭ شابۋىلىنان كەيىن ورتەنىپ كەتكەن شىركەۋ مەن سيناگوگا قالپىنا كەلتىرىلەدى.

كۇش قۇرىلىمدارى ماحاچكالاداعى ۋسپەن سوبورى اۋماعىندا قارۋمەن جۇمىس ىستەۋدى جالعاستىرۋدا. ولار قوسالقى ءۇي-جايلاردى تىنتەدى. اۋماق ءالى دە قورشالعان. شىركەۋ اۋدانىندا تۇراتىن ادامداردى ءوز ۇيلەرىنە جىبەردى. قتو رەجيمى وڭىردە ارەكەت ەتۋىن جالعاستىرۋدا.

كرەمل داعىستانداعى وقيعا تۋرالى ازىرگە ءۇنسىز تۇر، شابۋىل جاساعانداردىڭ جەكە باسى مەن ولاردىڭ سانى تۋرالى رەسمي اقپارات ازىرگە ايتىلماعان.

سونداي-اق، سەرگوكالى اۋدانىنىڭ باسشىسى ماگومەد وماروۆتىڭ ۇلدارى مەن تۋىستارىنىڭ وقيعاعا قاتىسى بار ەكەندىگى تۋرالى رەسمي تۇسىنىكتەمە جوق.

قازىر ءبىرىنشى ماحاچكالا ىقشام اۋدانىنداعى شىركەۋ اۋدانىندا تۇراتىن ادامداردى ءوز ۇيلەرىنە كىرگىزگەنى بەلگىلى بولدى، بىراق اتىس ورنىنا ءوتۋ جولى ءالى دە جابىق.

ماگومەد وماروۆ پەن ونىڭ ۇلدارى: «ەدينايا روسسيا» نەدەن جالتاردى؟

رەسەيدىڭ «زاپاستاعى پرەزيدەنتى» مەدۆەدەۆ باستاپ، قادىروۆ قوشتاپ، بۇعان ۋكراينا مەن باتىستى، اقش-تى ايىپتاۋعا كىرىسىپ كەتكەن. قازىر رەسەيدەگى يدەولوگيا سول، بار پالەگە ايىپتى - ۋكراينا، اقش پەن باتىس. ال بۇل ءدىني الاۋىزدىق. كادىمگى راديكالدى ءدىني كوزقاراستاعى كۇشتەر مەن توپتاردىڭ تەررورلىق ارەكەتى.

رەسەي ساياساتشىلارى بۇل وقيعادان ۋكراينانىڭ قول ءىزىن ىزدەپ الەكتەنىپ جاتقاندا، قازا تاپقان 2 تەررورشىنىڭ كىم ەكەنى انىقتالىپتى. سويتسە، ولگەن ەكەۋ داعىستاننىڭ سەرگوكالينسكى اۋدانىنىڭ اكىمى ماگومەد وماروۆتىڭ ەكى ۇلى بولىپ شىققان.

سەرگوكالينسكى اۋدانىنىڭ اكىمى ماگومەد وماروۆ قىزمەتىنەن كەتۋ تۋرالى ءوتىنىش جازدى جانە رف تەرگەۋ كوميتەتى ونى تەرگەۋدى باستاپ كەتتى. ۇيىنە ءتىنتۋ جۇرگىزىلدى. ونىڭ ەكى ۇلى وسمان مەن ءادىل  تەررورلىق ارەكەت كەزىندە ءولتىرىلدى.

ماگومەد وماروۆ ءپۋتيننىڭ «ەدينايا روسسيا» پارتياسىنىڭ مۇشەسى بولعان. الايدا، وسى وقيعادان سوڭ پارتيا سايتىنان وماروۆ جايلى دەرەكتەر جويىلعان.

پرەزيدەنت توقاەۆ پۋتينگە كوڭىل ايتتى

مەملەكەت باسشىسى قاسىم-جومارت توقاەۆ داعىستانداعى پراۆوسلاۆيە شىركەۋى مەن سيناگوگاعا لاڭكەستىك ارەكەتتەر جاسالىپ، سونىڭ سالدارىنان ءدىن جانە قۇقىق قورعاۋ ورگاندارى قىزمەتكەرلەرىنىڭ قازا بولۋىنا بايلانىستى رەسەي پرەزيدەنتى ۆلاديمير پۋتينگە كوڭىل ايتتى.

قازاقستان پرەزيدەنتى قۇقىق قورعاۋ جۇيەسى ارقىلى جەدەل-ىزدەستىرۋ شارالارىن جۇرگىزۋدە كومەك كورسەتۋگە دايىن ەكەنىن جەتكىزدى. مەملەكەت باسشىسى ادامزاتقا قارسى جاسالعان مۇنداي ارەكەتتى ءۇزىلدى-كەسىلدى ايىپتايدى، سونداي-اق، بۇۇ، شىۇ جانە باسقا دا بەدەلدى حالىقارالىق ۇيىمدار اياسىندا لاڭكەستىكپەن كۇرەسۋ ءۇشىن كوپجاقتى ىنتىماقتاستىقتى دامىتۋدى قولدايدى.

Abai.kz