قازاقستاندا قازاق ءتىلى جونىندەگى ارانيى كوميسسيا قۇرىلادى. ءتيىستى قۇجات جوباسىن قر عىلىم جانە جوعارى ءبىلىم مينيسترلىگى دايىندادى.

ەملە كوميسسياسىن قۇرۋ جوباسىن عىلىم مينيسترلىگى اشىق قۇقىقتىق اكتىلەر سايتىندا ورنالاستىرعان. اتالعان كوميسسيا كونسۋلتاتيۆتىك-كەڭەسشى ورگانعا اينالادى دەپ جوسپارلانۋدا.

كوميسسيا قاجەتتىلىگىنە قاراي، جىلىنا كەمىندە ەكى رەت جينالاتىن بولادى. قۇجاتتا ەملە كوميسسياسى قانداي قاعيدالاردى ۇستاناتىنى جانە قانداي جۇمىس اتقاراتىنى كورسەتىلگەن. ول بويىنشا:

1) ءسوزجاسامدا، ونىڭ ىشىندە شەتەل سوزدەرىن قابىلداۋدا فونەتيكالىق، مورفولوگيالىق، ءداستۇرلى-تاريحي پرينتسيپتەردى ساقتاۋ;

2) قازىرگى كەزەڭگە دەيىن جازۋ تاجىريبەسىندە بەلگىلەنگەن نەگىزگى نورمالاردى ساقتاۋ;

3) قازاق ءتىلىنىڭ سينگارمونيزم زاڭىن ساقتاۋ;

4) سوزدەردىڭ جازىلۋىنداعى بىركەلكىلىكتى ساقتاۋ;

5) تىنىس بەلگىلەرىنىڭ بىركەلكىلىگىن ساقتاۋ;

6) سوزدەردىڭ جازىلۋىن جەڭىلدەتۋ;

7) سوزدىك قورىن كەڭەيتۋ، جاڭارتۋ جانە جەتىلدىرۋ;

8) ءجيى قولدانىلاتىن جانە كونەرگەن سوزدەردى اجىراتۋ ماسەلەلەرىمەن شۇعىلدانادى.

كوميسسيا ءسوزجاسامنىڭ ەملەسى مەن بىركەلكىلىگىنىڭ ەرەجەلەرىن ازىرلەيدى. سونىمەن قاتار، سوزدىكتەر مەن انىقتامالىقتارعا قويىلاتىن تالاپتاردى ازىرلەۋ، باسقا گرافيكالىق جۇيەنىڭ قۇرالدارىن پايدالانا وتىرىپ، ءبىر گرافيكالىق جۇيەنىڭ ماتىندەرى مەن جەكە سوزدەرىن ارىپكە كوشىرۋ بويىنشا ۇسىنىستار ازىرلەۋ كىرەدى.

اشىق تالقىلاۋ 17 قىركۇيەككە دەيىن جالعاسادى جانە وسى ۋاقىت ىشىندە جوباعا قاتىستى پىكىرلەردى اشىق قۇقىقتىق اكتىلەر پورتالىندا بىلدىرۋگە بولادى.

ماۋسىم ايىندا مينيستر جاسۇلان ماديەۆ «ChatGPT» قازاقشا نۇسقاسىن ازىرلەۋ تۋرالى ايتقان ەدى.

Abai.kz