وزبەكستان دەپۋتاتى كەڭەس يدەولوگياسىن ناسيحاتتاۋعا تىيىم سالۋدى ۇسىندى.

وسى ورايدا ەكىباستۇزدىق قارت جۋرناليست جاسسەرىك اعامىزدىڭ جەرگىلىكتى «وتارقا» گازەتىندە «لەنيندى باۋىرجان الاماستىراتىن بولدى» دەپ جازعان شاعىندا اۋدان اكىمىنە كوممۋنيستەر بارىپ، دىكىڭ قاعىپ، اقىرى گازەت رەداكتورى اينۇر قارىنداسىمىز قاتاڭ سوگىس الىپ، ءسوز ەستىگەن وقيعا ويعا ورالادى.

ءيا، ەلىمىزدىڭ شىعىسى مەن سولتۇستىگىندە كسرو ەسكەرتكىشتەرىنىڭ مۇرتى بۇزىلماي تۇر.

سونىمەن وزاعاڭدارعا اياڭداپ كەلەيىك: «وزبەكستان زاڭناماسىندا كەڭەستىك يدەولوگيانى، ءداۋىر مەن رامىزدەردى ناسيحاتتاۋعا تىيىم سالۋ قاجەت. ارينە، ءبىزدىڭ تاريحىمىزدىڭ وسى قايعىلى كەزەڭى زەردەلەنىپ، تالقىلانۋى ءتيىس!

بىراق ونىڭ ماقۇلدانۋى نەمەسە ناسيحاتتالۋى كونستيتۋتسيالىق قۇرىلىسقا قارسى قىلمىس رەتىندە عانا ەمەس، سونىمەن قاتار حالقىمىزدىڭ ساتقىندىعى رەتىندە دە قاراستىرىلۋى ءتيىس»، - دەپ مالىمدەدى «ميللي تيكلانيش» ۇلتشىل پارتياسىنىڭ باسشىسى، وزبەكستان پارلامەنتىنىڭ دەپۋتاتى الىشەر قادىروۆ.

3 قىركۇيەكتە سامارقاندا كسرو-نى قالپىنا كەلتىرۋ ءۇشىن ۇگىت جۇرگىزىپ، وزبەكستاننىڭ كونستيتۋتسيالىق قۇرىلىسىنا قول سۇعۋدا ايىپتالعان 74 جاستاعى ەر ادام قىلمىستىق جاۋاپكەرشىلىككە تارتىلدى.

بىزدە كسرو كەلمەسكە كەتسە دە، ونىڭ مۇرالارىنا قارسى كۇرەسۋشى جاسسەرىك اعالارىمىزدىڭ جازعاندارى دالاعا كەتىپ، اينۇرداي قارىنداستارىمىز سوگىس ارقالاۋدا.

Abai.kz