بۇگىن دۇنيەجۇزىلىك كوشپەندىلەر ويىندارىنداعى ەڭ تارتىستى، ەڭ دۋلى-شۋلى باسەكەنىڭ ءبىرى ءوتىپ جاتىر. ول – كوكپاردىڭ فينالى. فينالدا قازاقستان مەن قىرعىزستان كۇش سىناستى. بۇل ۇلتتىق سپورتتاعى ەل-كلاسسيكو!

جۇرت ءبىلدى. ەڭ تارتىستى فينالدى – بىرتۋعان قازاق پەن قىرعىز جاسايتىنىن ءبىلدى. باۋىرلاس قوس ەلدىڭ فينالدا جولىعاتىنى ەشبىر ينتريگاسىز ايتىلدى. ويتكەنى، قازاقتاعى - كوكپار، قىرعىزداعى - كوكبورى بۇل - ەكى حالىقتىڭ قانىنا سىڭگەن ۇلتتىق كود! سوندىقتان وزگەلەردەن ءباسى باسىم تۇرادى!

دەسە دە، بۇل فينال قازاق پەن قىرعىزدىڭ اراسىنا وت جاقپاۋى كەرەك! سپورت – ساياسي جانە وزگە دە قاقتىعىستارعا سەبەپشى بولمايدى! بۇل جاھاندىق قاعيدا!

«سپورت – ءوزارا قۇرمەت پەن سىيلاستىق سيمۆولى. سپورتتىڭ باستى ميسسياسى – حالىقتار دوستىعىن نىعايتۋ. قازاقستان بۇكىل الەمگە بەيبىتشىلىك پەن كەلىسىم مەكەنى رەتىندە تانىمال. ءبىز الىس-جاقىن شەتەلدىڭ بارىمەن تىعىز بايلانىس ورناتتىق. باسقا مەملەكەتتەر دە ءوزارا دوستىق قاتىناستا بولعانىن قالايمىز. سوندىقتان كوشپەندىلەر ويىندارى ىنتىماعىمىزدى بەكەمدەي تۇسپەك»، - دەدى عوي پرەزيدەنت توقاەۆ كوشپەندىلەر ويىندارىنىڭ اشىلۋىندا.

راس، قازاق پەن قىرعىزعا ءتان بۇل ويىنعا سوڭعى جىلدارى الەمنىڭ ءار تۇكپىرىنەن قىزىعۋشىلىق ارتىپ كەلە جاتقانى شىندىق. سونىڭ دالەلى – الىستا جاتقان اقش-تان كوكپارشىلاردىڭ ارنايى كەلىپ، كوك سەركىنى تاقىمعا باسۋعا تالپىنىپ جاتقانى!

پوپۋلياريزاتسيا – اسا ماڭىزدى! ۇلتتىق سپورت تۇرلەرىن الەمگە كەڭىنەن ناسيحاتتايىق دەسەك، جاپوننىڭ دزيۋدوسى مەن سۋموسى سەكىلدى الەم جۇرتى بىلەتىن دەڭگەيگە جەتكىزگىمىز كەلسە، ونى ناسيحاتتاۋ كەرەك. وسى جولى قازاقستانعا الەمنىڭ 89 مەملەكەتىنەن وكىلدەر كەلگەنىن ەستىدىك. ەندەشە ولار قازاقستاننان جۇلدە الىپ قايتۋى ءتيىس! ول دا پوپۋلياريزاتسيالاۋ ءتاسىلى!

تۇزدىق: «كوكپار تارتۋ – اسكەري جاتتىعۋلاردىڭ ءبىر ءتۇرى» دەگەن تۇجىرىم بار. بۇعان نە دەيسىز؟

Abai.kz