قازىرگى تاڭدا جاساندى ينتەللەكت تەحنولوگياسى قارقىندى دامۋدا. نەشە ءتۇرلى روبوتتاردان باستاپ، مۋزىكا، كينو، اقپاراتتىق قۇرالدار ءبارى دە جاساندى ينتەللەكت تەحنولوگياسىنا جۇگىنۋدە.

كەلەشەكتە قانشاما جاڭا تەحنولوگيالار شىعۋى مۇمكىن. بۇل نە سوندا؟ ادام جاراتۋشىعا اينالىپ بارادى دەيتىندەر دە بار قازىر. قۇداي ساقتاسىن! ولاي بولۋى مۇمكىن ەمەس. بۇل ادام بالاسىنىڭ ءوزىنىڭ لايىقتى ورنىنا وتىرۋعا ۇمتىلۋى. جاراتۋشى ادام بالاسىن وزىنەن كەيىنگى جەر بەتىنىڭ حاليفاسى (باسشىسى) ەتىپ جاراتقان. بارلىق پەرىشتەرەلەر ادامعا باس ءيدى. (لاعنەتى شايتاننان باسقا) قۇراندا (باقارا سۇرەسى 31 ايات) “ادامعا (ا.س) بارلىق ەسىمدەردى ۇيرەتتىك”، دەگەن ايات بار. ءتاپسىرشى عالىمدار “بارلىق ەسىمدەر” دەگەن ءسوزدى قالاي تۇسىنەمىز؟ دەگەن سۇراقتارعا ءار ءتۇرلى جاۋاپ بەرۋدە. بىرەۋلەر مىناۋ اسپان، مىناۋ جەر، مىناۋ اعاش، مىناۋ بۇلت دەگەن زاتتاردىڭ اتتارى ۇيرەتىلدى دەسە، ەكىنشىلەرى ءار ءتۇرلى تىلدەردىڭ شىعۋىنا يشارا دەيدى. ءۇشىنشىسى جاندى، جانسىز بارلىق نارسە دەيدى. ەندى ءبىرى ماتەريالىق قانا ەمەس، رۋحاني سەزىمدەر جايلى دا ۇيرەتىلگەندىگىن، قازىرگى تىلمەن ايتقاندا عىلىمنىڭ بارلىق سالاسىنىڭ ەڭ قۇپيا سىرلارى، ەڭ ۇساق بولشەكتەردىڭ بارلىق سىرلارى ۇيرەتىلگەندىگىن ايتادى. ءبىر سوزبەن ايتقاندا عالامدا ادامعا (ا.س) ۇيرەتىلمەي قالعان سىر جوق. ولاي بولسا ادامنان (ا.س) تاراعان ۇرپاقتىڭ دا سول سىرلاردى قايتا ەسىنە تۇسىرۋىنە بولادى. الايدا ادام بالاسىنىڭ بويىنا ورناتىلعان قارىم-قابىلەتتى پايدالانۋى كەرەك. اتامىز ادامعا (ا.س) تىكەلەي تۇسىندىرىلگەن بۇل سىرلاردى ءوز بويىنداعى قابىلەتتەردى پايدالانا وتىرىپ قايتا اشۋعا مۇمكىندىگى بار ادام بالاسىنىڭ. بۇل ادامنىڭ كوپتەن بەرى ۇمىتىپ قالعان نارسەسىن قايتا ەسىنە ءتۇسىرۋى سياقتى.

بۇل عىلىمدار ادامنان (ا.س) كەيىن دە كوپتەگەن پايعامبارلارعا وزىندىك مۇعجيزا رەتىندە بەرىلىپ وتىرعان. ماسەلەن كيىم تىگۋدىڭ سىرلارى ىدىرىسقا (ا.س) ۇيرەتىلدى. ساعات جاساۋ ءجۇسىپ پايعامبارعا (ا.س) مۇعجيزا رەتىندە ۇيرەتىلدى. بۇگىنگى تىلمەن ايتقاندا مەحانيكانىڭ اتاسى ءجۇسىپ (ا.س) پايعامدار. كەمە جاساۋ نۇح پايعامبارعا ۇيرەتىلدى (ا.س). سۋدا ءجۇزى قۇرالدارىنىڭ بارلىق ءتۇرىن جاساۋ مۇسىلمانداردىڭ بورىشى بولا تۇرا مۇسىلماندار عىلىمنىڭ بارلىق سالاسىندا ارتتا قالىپ وتىر. مۇنىڭ ەڭ نەگىزگى سەبەبى دىنىمىزدەن الشاقتاپ كەتۋىمىز. ءدىنىمىزدى دۇرىس تۇسىنبەۋىمىز. دۇرىس تۇسىنبەگەن سوڭ دۇرىس زەرتتەۋ جاساي الماي وتىرمىز. سۇلەيماننىڭ (ا.س) ايشىلىق الىس جەرلەرگە ءاپ ساتتە ۇشىپ بارۋى – ۇشۋ قۇرالدارىنىڭ ەڭ وزىق ۇلگىسى بولاتىن. بەلحيس پاتشايىمنىڭ تاعىن كوز ىلەسپەس جىلدامدىقپەن الدىرتۋى دا سۇلەيماننىڭ (ا.س) مۇعجيزاسى بولاتىن. ولاي بولسا، كەلەشەكتە كەز-كەلگەن زاتتى الەمنىڭ كەز-كەلگەن جەرىنە جىلدام تاسىمالداۋعا بولادى. 3د پرينتەر ارقىلى كوشىرمەسىن جاساۋ قازىر دە بار.

جاقىپ پايعامباردىڭ (ا.س) بالاسى ءجۇسىپتىڭ (ا.س) كويلەگىنىڭ ءيىسىن الىستان سەزۋى، كەلەشەكتە تەلەديداردان كورىپ وتىرعان زاتىڭنىڭ ءيىسىن دە سەزىپ وتىرۋىڭ مۇمكىن دەگەن ءسوز. پايعامبارلار سورسەتكەن مۇعجيزالار ەي ادام بالاسى، ءوز قارىم-قابىلەتىڭدى اللا جولىندا جۇمساي الساڭ سەن دە سول دارەجەلەرگە جەتە الاسىڭ دەگەن بەلگى، ۇلگى بولاتىن.

ال ەندى بۇگىنگە قايتا ورالايىق. جاساندى ينتەللەكت تەحنولوگياسىن دامىتىپ وتىرعاندار كوبىنە ءبىز كاپىر سانايتىن مۇسىلمان ەمەس قاۋىمدار. مۇنىڭ ەكى جاعى بار. بىرىنشىدەن، مۇسىلمان ەمەستەر دە ادام. ولار دا ادامنىڭ (ا.س) ۇرپاقتارى. ادامعا (ا.س) ۇيرەتىلگەن سىرلارعا ولار دا ورتاق. ادام اتانىڭ ۇرپاقتارى رەتىندە سول سىرلاردى اشۋعا ولاردىڭ دا مورالدىق قۇقى بار.

ەندى بيسميللاھتىڭ سىرىنا كەلەيىك. بيسميللاھ ءسوزىنىڭ ماعىناسى اللانىڭ اتىمەن باستاۋ، ءىس اتقارۋ دەگەندى بىلدىرەدى. ال ەڭ كىشكەنتاي ەلەمەنتتەن باستاپ سوناۋ شەكسىز گالاكتيكالارعا دەيىنگى بارلىق نارسە اللانىڭ امىرىنە باعىناتىنى بەلگىلى. ولاي بولسا اللانىڭ اتىمەن ءىس اتقارىپ، ماعان دا باعىن، مەنىڭ دە ايتقانىمدى ىستە، ويتكەنى مەن اللانىڭ بۇيرىعىن جەتكىزۋدەمىن دەپ تۇرعان ادام بالاسىنا باعىنبايتىن ەلەمەنت بولا ما؟ الايدا ادام بالاسىنىڭ ولاي ايتا الۋى ءۇشىن بەلگىلى ءبىر شارتتاردى ورىنداۋى كەرەك. اللا مەن ادام اراسىنداعى ايىرماشىلىق وسى. ادام شارتتارعا تاۋەلدى. ال سول شارتتاردى ورىنداعان ادامعا باعىنبايتىن ەلەمەنت جوق. بۇگىنگى كۇننىڭ مۇسىلماندارى بيسميللاھتى تەك اۋىزبەن عانا ايتىپ ءجۇر. شارتتارىن ورىنداسا ولارعا بايعىنبايتىن ەلەمەنت قالماس ەدى. ونىڭ شارتى عىلىممەن اينالىسۋ. قاي ەلەمەنتتىڭ قاي زاڭعا باعىنىپ قانداي جۇيەمەن جۇمىس جاسايتىندىعىن انىقتاۋ. ماسەلەن، مەملكەتتىك زاڭعا ارقا سۇيەگەن ءبىر ساقشى، اكىمنىڭ دە باسقانىڭ دا ماشيناسىن توقتاتىپ تەكسەرە الادى. ال ءدال سول ادام ءوز بەتىمەن ءدال سول ءىستىڭ وننان ءبىرىن دە اتقارا الماس ەدى. زاڭ اتىنان، مەملەكەت اتىنان دەگەندە جاعداي مۇلدەم وزگەرەدى. ءدال سول سياقتى اللانىڭ اتىمەن ارەكەت ەتكەن ادام كەز-كەلگەن ەلەمەنتتى باعىندىرا الادى. ويتكەنى الگى ەلەمەنت اللانىڭ زاڭىنا (امىرىنە) باعىنادى.

قورىتا ايتقاندا جاساندى ينتەللەكت دەگەنىمىز الەمدەگى ءيلاھي زاڭدىلىقتاردى ادام بالاسىنىڭ ءوز يگىلىگىنە پايدالانۋى. الايدا ادام بالاسىنا قالاۋ-ەرىك تە بەرىلگەن. سول زاڭدىلىقتاردى ادامزاتتىڭ يگىلىگىنە پايدالانسا باق، بۇرىس جولدا قولدانسا سور بولماق. مۇسىلمان مەن كاپىردىڭ ايىرماشىلىعى وسى جەردە بەلگىلى بولادى. ەكەۋى دە ءوز تاڭداۋى ءۇشىن جاۋاپكەر.

جاندوس قيانبەكوۆ، تۇركىتانۋشى

Abai.kz