كەشە اقش پرەزيدەنتى دونالد ترامپ رەسەي پرەزيدەنتى ۆلاديمير پۋتينمەن تەلەفون ارقىلى سويلەستى.

«پرەزيدەنت پۋتين مەنى جانە اقش-تى تاياۋ شىعىستا بەيبىتشىلىكتىڭ ورناۋىمەن قۇتتىقتادى. ول ءبىز بۇل تۋرالى عاسىرلار بويى ارماندادىق دەدى. مەن تاياۋ شىعىستاعى جەتىستىك بىزگە رەسەي مەن ۋكراينا اراسىنداعى سوعىستى توقتاتۋ جونىندەگى كەلىسسوزدەرگە كومەكتەسەتىنىنە سەنەمىن»، - دەپ جازدى اق ءۇي باسشىسى Truth Social جەلىسىندە.

سوزىنشە، تاراپتار سوعىس اياقتالعاننان كەيىن رەسەي مەن اقش اراسىنداعى ساۋدا قالاي رەتتەلەتىنى تۋرالى دا كوپ سويلەسكەن. كەلەسى اپتادا جوعارى لاۋازىمدى امەريكالىق جانە رەسەيلىك شەنەۋنىكتەردىڭ كەزدەسۋى وتەدى. ۆاشينگتون تاراپىنان دەلەگاتسيانى مەملەكەتتىك حاتشى ماركو رۋبيو باسقارادى.

«سودان كەيىن مەن جانە پرەزيدەنت پۋتين بۋداپەشتتە كەزدەسىپ، رەسەي مەن ۋكراينا اراسىنداعى سوعىستى تالقىلايمىز»، - دەدى ترامپ.

ترامپ پۋتينمەن بولعان اڭگىمەلەسۋ تۋرالى بىلاي دەدى:

«مەن رەسەي پرەزيدەنتى ۆلاديمير پۋتينمەن تەلەفون ارقىلى سويلەسۋدى جاڭا عانا اياقتادىم. اڭگىمەمىز وتە جەمىستى بولدى دەۋگە نەگىز بار. پرەزيدەنت پۋتين مەنى جانە امەريكا قۇراما شتاتتارىن تاياۋ شىعىستا بەيبىتشىلىكتى ورناتۋداعى ۇلى جەتىستىگىمەن قۇتتىقتادى. مەن شىن مانىندە تاياۋ شىعىستاعى كەلىسىمنىڭ رەسەي مەن ۋكراينا اراسىنداعى سوعىستى توقتاتۋ جونىندەگى كەلىسسوزدەرگە كومەكتەسەتىنىنە سەنەمىن.

پرەزيدەنت پۋتين ءبىرىنشى حانىم مەلانياعا بالالارعا قاتىستى جوبالارعا قاتىسقانى ءۇشىن العىس ايتتى. ول ءوزىنىڭ ۇلكەن ريزاشىلىعىن ءبىلدىرىپ، بۇل ءىستىڭ جالعاساتىنىن جەتكىزدى.

ءبىز سونداي-اق، سوعىس اياقتالعاننان كەيىن رەسەي مەن اقش اراسىنداعى ساۋدا ماسەلەلەرىنە ايتارلىقتاي كوڭىل بولەتىنىمىزدى تالقىلادىق. اڭگىمە سوڭىندا ءبىز كەلەسى اپتادا جوعارى دەڭگەيدەگى كەڭەسشىلەرىمىزدىڭ كەزدەسۋىن وتكىزۋگە كەلىستىك. اقش تاراپىنان العاشقى كەزدەسۋگە مەملەكەتتىك حاتشى ماركو رۋبيو جانە وزگە دە وكىلدەر قاتىسادى. كەزدەسۋدىڭ وتەتىن ورنى ءالى انىقتالۋدا.

پرەزيدەنت پۋتين ەكەۋمىز رەسەي مەن ۋكراينا اراسىنداعى بۇل ماسقارا سوعىستى توقتاتۋ ءۇشىن ۆەنگريانىڭ بۋداپەشت قالاسىندا كەزدەسەمىز.

مەن پرەزيدەنت زەلەنسكيمەن اق ۇيدە كەزدەسەمىن. وندا مەن پرەزيدەنت پۋتينمەن بولعان اڭگىمەنى جانە باسقا ماسەلەلەردى تالقىلايمىز. مەن بۇگىنگى تەلەفون اڭگىمەسىن العا جىلجۋدىڭ ۇلكەن كورىنىسى دەپ سانايمىن»، - دەيدى.

Abai.kz