تۇركيانىڭ قانداي ۋنيۆەرسيتەتتەرى جۋرناليستيكا جانە اقپارات ماماندارىن وقىتادى؟

اڭداتپا

پرەزيدەنتىمىز قاسىم-جومارت توقاەۆ عىلىم جانە جوعارى ءبىلىم مينيسترلىگىنە شەتەلدىك وزىق عىلىمي تەحنولوگيالاردى قازاقستانعا اكەلۋ ماقساتىندا جىل سايىن 500 عالىمنىڭ الەمنىڭ جەتەكشى عىلىمي ورتالىقتارىندا تاعىلىمدامادان ءوتۋىن قامتاماسىز ەتۋدى تاپسىرعان ەدى.

وتاندىق عالىمدارىمىزعا ارنالعان عىلىمي تاعىلىمداما جەتەكشى شەتەلدىك جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىندا، عىلىمي ورتالىقتار مەن سالالىق ۇيىمداردا عىلىمي، عىلىمي-تەحنيكالىق كادرلاردىڭ بىلىكتىلىگىن ارتتىرۋعا باعىتتالعان.

بىزگە شەتەلدە كادرلار دايارلاۋ جونىندەگى رەسپۋبليكالىق كوميسسيا وتىرىسىنىڭ 2023 جىلعى 20 جەلتوقسانداعى №23-32-7.5 حاتتاماسىنا سايكەس تۇركيا رەسپۋبليكاسىنداعى باشكەنت ۋنيۆەرسيتەتىنە «الەۋمەتتىك عىلىمدار سالاسىنداعى مەنەدجمەنت» باعدارلاماسى بويىنشا 12 (ون ەكى) اي عىلىمي تاعىلىمدامادان وتۋگە «بولاشاق» ستيپەندياسى تاعايىندالدى.

قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ جانە «حالىقارالىق باعدارلامالار ورتالىعى» اق-نىڭ قولداۋىمەن 2024 جىلعى قىركۇيەك ايىنىڭ العاشقى اپتاسىندا ءبىزدىڭ تۇركيا رەسپۋبليكاسىنىڭ استاناسى انكارا قالاسىنداعى باشكەنت ۋنيۆەرسيتەتىنىڭ كوممۋنيكاتسيا فاكۋلتەتىندەگى عىلىمي تاعىلىمدامامىز باستالدى.

بۇل ماقالادا «بولاشاق» حالىقارالىق باعدارلاماسىنىڭ «500 عالىم» جوباسى بويىنشا ءوتىپ جاتقان عىلىمي تاعىلىمدامامىزدىڭ العاشقى ايىندا جيناقتالعان تۇركيا رەسپۋبليكاسى ۋنيۆەرسيتەتتەرىنىڭ كوممۋنيكاتسيا فاكۋلتەتتەرىندەگى ءبىلىم بەرۋ باعدارلامالارىمەن، پروفەسسور-وقىتۋشى قۇرامىنىڭ جانە ستۋدەنتتەرىنىڭ ساندىق قۇرامى تۋرالى مالىمەتتەرمەن قىسقاشا تانىستىرۋدى ماقسات ەتىپ وتىرمىز.

كىلت سوزدەر: «بولاشاق» حالىقارالىق باعدارلاماسى، «500 عالىم» جوباسى، تۇركيا رەسپۋبليكاسى، باشكەنت ۋنيۆەرسيتەتى، كوممۋنيكاتسيا فاكۋلتەتتەرى، قوعاممەن بايلانىس، تانىتىم.

كىرىسپە

تۇركيا رەسپۋبليكاسى ۋنيۆەرسيتەتتەرىنىڭ كوممۋنيكاتسيا فاكۋلتەتتەرىندە جۋرناليستيكا جانە اقپارات، قوعاممەن بايلانىس، تەلەۆيزيا جانە راديو سالالارىندا كەڭ اۋقىمدى ءبىلىم بەرۋ باعدارلامالارى بار. تۇركيا ۋنيۆەرسيتەتتەرى كوممۋنيكاتسيا باعىتىندا جالپى ءبىلىم بەرۋدەن سالالىق ماماندىقتارعا دەيىن ۇسىناتىن ءبىلىم بەرۋ باعدارلامالارىنىڭ الۋان تۇرلىلىگىمەن، اكادەميالىق جەتىستىكتەرىمەن جانە جۇرگىزەتىن زەرتتەۋلەرىمەن تانىمال. تۇركيا ۋنيۆەرسيتەتتەرىنىڭ كوممۋنيكاتسيا فاكۋلتەتتەرى الەمدىك دەڭگەيدە ساپالى ءبىلىم بەرەدى، جۋرناليستيكا جانە اقپارات سالاسىندا بولاشاققا باعىتتالعان كاسىبي مامانداردى وقىتىپ، دايارلايدى.

سونىمەن قاتار، ىسكەرلىك كاسىبي سالامەن تىعىز بايلانىسى بار تۇركيا ۋنيۆەرسيتەتتەرىنىڭ كوممۋنيكاتسيا فاكۋلتەتتەرىندە مانساپقا ۇمتىلعان ستۋدەنتتەرگە تاعىلىمدامادان وتۋگە، الەمدىك دەڭگەيدەگى جەتەكشى پروفەسسور-وقىتۋشىلار قۇرامىنىڭ جەتەكشىلىگىمەن عىلىمي جوبالار بويىنشا جۇمىس ىستەۋگە، كاسىبي وقۋ باعدارلامالارى مەن ۋنيۆەرسيتەتتىك بىلىمنەن كەيىن كاسىپتىك باعدار الۋعا بارلىق جاعدايلار جاسالعان.

دەرەككوزدەر

ماقالادا تۇركيا رەسپۋبليكاسىنىڭ استاناسى انكاراعا قالاسىندا ءوتىپ جاتقان عىلىمي تاعىلىمدامانىڭ بارىسىندا جيناقتالعان ناقتى مالىمەتتەر جاريالانىپ وتىر. تۇركيا ۋنيۆەرسيتەتتەرىندەگى كوممۋنيكاتسيا فاكۋلتەتتەرىنىڭ قىزمەتى تۋرالى تىكەلەي تۇرىك تىلىندەگى دەرەكتەر توپتاستىرىلىپ، ساراپقا سالىندى.

ماقالانى جازۋ بارىسىندا تۇركيا رەسپۋبليكاسى جوعارى ءبىلىم كەڭەسىنىڭ (Türkiye Cumhuriyeti Yükseköğretim Kurulu – YÖK) [1]، تۇركيا قوعاممەن بايلانىستار قاۋىمداستىعى (Türkiye Halkla İlişkiler Derneği) [2]، كوممۋنيكاتسيالىق زەرتتەۋلەر قاۋىمداستىعى (İletişim Araştırmaları Derneği) [3] جانە باسقا دا مەملەكەتتىك جانە قوعامدىق مەكەمەلەر مەن ۇيىمداردىڭ رەسمي سايتتارىنداعى تۇرىك تىلىندە جارىق كورگەن ماعلۇماتتارعا تالداۋ جاسالدى.

ماقسات-مىندەتتەر

«تۇركيا رەسپۋبليكاسىندا كوممۋنيكاتسيا جانە مەديا سالالارىنداعى عىلىمي زەرتتەۋلەر جۇرگىزۋ تاجىريبەسى» تاقىرىبىنداعى عىلىمي تاعىلىمدامامىزدىڭ جوسپار-كەستەسى بويىنشا مىناداي عىلىمي ءىس-شارالاردى جۇزەگە اسىرۋدى جوسپارلاپ وتىرمىز:

- تۇركيا رەسپۋبليكاسى ۋنيۆەرسيتەتتەرىنىڭ كوممۋنيكاتسيا فاكۋلتەتتەرىندەگى جۋرناليستيكا، قوعاممەن بايلانىس، جارناما، تەلەراديو، ت.ب. بولىمدەرىنىڭ ءبىلىم بەرۋ باعدارلامالارىنىڭ مازمۇنىن زەرتتەۋ;

- تۇركيا رەسپۋبليكاسى ۋنيۆەرسيتەتتەرىنىڭ كوممۋنيكاتسيا فاكۋلتەتتەرىندەگى ستۋدەنتتەرمەن جۇرگىزىلەتىن وقۋ، وقۋ-ادىستەمەلىك، عىلىمي-زەرتتەۋ، قوعامدىق جانە تاربيە جۇمىستارىن زەرتتەۋ;

- تۇركيا رەسپۋبليكاسى ۋنيۆەرسيتەتتەرىنىڭ كوممۋنيكاتسيا فاكۋلتەتتەرىندەگى جۋرناليستيكا جانە قوعاممەن بايلانىس سالاسىندا ستۋدەنتتەرگە، ماگيسترانتتارعا جانە PhD دوكتورانتتارىنا ارنالعان وقۋلىقتاردى، وقۋ قۇرالدارىن، عىلىمي جانە وقۋ-ادىستەمەلىك ەڭبەكتەردى زەرتتەۋ;

- تۇركيا رەسپۋبليكاسى ۋنيۆەرسيتەتتەرىنىڭ كوممۋنيكاتسيا فاكۋلتەتتەرىندەگى ستۋدەنتتەرگە، ماگيسترانتتارعا جانە PhD دوكتورانتتارىنا ساباق بەرەتىن پروفەسسور-وقىتۋشىلاردىڭ عىلىمي جانە ءبىلىم بەرۋ سالالارىنداعى جۇمىس تاجىريبەلەرىن زەرتتەۋ;

- تۇركيا رەسپۋبليكاسىندا شىعارىلاتىن، الەۋمەتتىك-گۋمانيتارلىق سالالار بويىنشا Scopus جانە Web of Science حالىقارالىق مالىمەتتەر قورىنا ەنگىزىلگەن عىلىمي جۋرنالداردىڭ تاجىريبەلەرىن زەرتتەۋ;

- تۇركيا رەسپۋبليكاسىنىڭ QS World University Ranking: Top Global Universities-كە كىرەتىن ۇزدىك ۋنيۆەرسيتەتتەرىنىڭ عىلىمي-ءبىلىم بەرۋ سالاسىنداعى قىزمەتتەرىن زەرتتەۋ;

- تۇركيا رەسپۋبليكاسى مەن قازاقستان رەسپۋبليكاسى اراسىنداعى عىلىم جانە ءبىلىم بەرۋ سالاسىنداعى ىنتىماقتاستىقتى نىعايتۋدىڭ ءادىس-تاسىلدەرىن زەرتتەۋ.

بۇگىنگى تەحنولوگيانىڭ دامۋىمەن تۇركيا رەسپۋبليكاسىنداعى ۋنيۆەرسيتەتتەردىڭ كوممۋنيكاتسيا فاكۋلتەتتەرى وقۋ ۇدەرىسىنە كوپتەگەن ەرەكشە جاڭالىقتاردى ەنگىزۋدى ماقسات ەتىپ وتىر. جاستارعا اقپارات بەرىپ قانا قويماي، ستۋدەنتتەردى شابىتتاندىراتىن، قارىم-قاتىناس ەسىگىن كەڭ اشاتىن جانە ولاردىڭ مانساپ جولىندا داعدىلار مەن شىعارماشىلىق ويلاۋدى قامتاماسىز ەتەتىن ءبىلىم وردالارى – وسى كوممۋنيكاتسيا فاكۋلتەتتەرى دەپ ايتۋعا بولادى. مىڭداعان جاڭاشىل كوشباسشىلار دايارلانىپ، العاشقى ىرگەتاسى ءجۇز جىل بۇرىن قالانعان بۇل فاكۋلتەتتەردىڭ ءبىرىنشى ماقساتى – بۇگىنگى كوممۋنيكاتسيالىق الەمگە وزگەرىس ەنگىزۋ.

ماقالانى جازۋ بارىسىندا جۋرناليستيكا جانە اقپارات، قوعاممەن بايلانىس سالالارى بويىنشا عىلىمي-ىزدەنىس جۇمىستارىن جۇرگىزىپ كەلە جاتقان تۇركيا رەسپۋبليكاسى ۋنيۆەرسيتەتتەرىنىڭ كوممۋنيكاتسيا فاكۋلتەتتەرىندە قىزمەت ىستەيتىن Gilman Senem Gençtürk Hızal [4, 5]، Çiğdem Baskıcı، Yavuz Ercil, Yunus Gökmen [6]، Ebru Akçay [7] جانە باسقا دا عالىمدارىنىڭ زەرتتەۋ ادىستەرىنە ەرەكشە نازار اۋداردىق.

جيناقتالعان ناتيجەلەر

تۇرىك تىلىندە جارىق كورگەن اقپارات كوزدەرىنەن الىنعان مالىمەتتەرگە سۇيەنسەك، 2023-2024 وقۋ جىلىندا تۇركيا رەسپۋبليكاسىنداعى 41 مەملەكەتتىك جانە 21 ارنايى قورلاردىڭ قۇرىلتايشىلىعىنداعى، بارلىعى 62 ۋنيۆەرسيتەتتىڭ كوممۋنيكاتسيا فاكۋلتەتتەرى ستۋدەنتتەردى وقۋعا قابىلدادى. بۇعان سولتۇستىك كيپر تۇرىك رەسپۋبليكاسى ۋنيۆەرسيتەتتەرىندەگى 5 كوممۋنيكاتسيا فاكۋلتەتىن قوسساق، تۇرىك تىلىندە جۋرناليستيكا جانە اقپارات، قوعاممەن بايلانىس جانە تانىتىم سالالارىندا بولاشاق مامانداردى وقىتىپ-دايارلايتىن كوممۋنيكاتسيا فاكۋلتەتتەردىڭ سانى 67-گە جەتەدى. سونداي-اق جۇمىسىن ءالى باستاماعان 4 فاكۋلتەت پەن جاڭادان اشىلعان 5 فاكۋلتەتتى قوسساق، تۇركيادا 76 كوممۋنيكاتسيا فاكۋلتەتى بار دەپ ايتۋعا بولادى.

جالپى العاندا، تۇركيا رەسپۋبليكاسىنىڭ مەملەكەتتىك ۋنيۆەرسيتەتتەرىندەگى كوممۋنيكاتسيا فاكۋلتەتتەرىنىڭ 1992 جىلى بەلگىلەنگەن جۇيە ءتارتىبى بويىنشا بولىمدەرگە ءبولىنۋى ودان ءارى جالعاسىن تاۋىپ وتىر. 1992 جىلى تۇركياداعى ءباسپاسوز جانە حابار تاراتۋ مەكتەپتەرى كوممۋنيكاتسيا فاكۋلتەتتەرىنە اينالدىرىلعان كەزدە بۇل فاكۋلتەتتەردە 3 ءبولىم: جۋرناليستيكا، قوعاممەن بايلانىس جانە تانىتىم، راديو، تەلەۆيزيا جانە كينو بولىمدەرى بولۋى كەرەك دەپ بەلگىلەنگەن ەدى.

بۇل ماقالادا ەڭ الدىمەن مەملەكەتتىك ۋنيۆەرسيتەتتەردەگى، سودان كەيىن ارنايى قورلاردىڭ قۇرىلتايشىلىعىمەن قۇرىلعان ۋنيۆەرسيتەتتەردەگى كوممۋنيكاتسيا فاكۋلتەتتەرى تۋرالى مالىمەتتەردى ورتاعا سالامىز.

جوعارىدا ايتىلعانىنداي، تۇركياداعى مەملەكەتتىك ۋنيۆەرسيتەتتەردە 41 كوممۋنيكاتسيا فاكۋلتەتى بار. ەندى ولارعا جەكە-جەكە قىسقاشا توقتالايىق.

تۇركياداعى كوممۋنيكاتسيالىق ءبىلىم ىستانبۇل ۋنيۆەرسيتەتىندەگى جۋرناليستيكا بىلىمىنەن باستاۋ الادى. 1950 جىلى تۇركيا جۋرناليستەر قاۋىمداستىعىنىڭ تاپسىرىسى بويىنشا ىستانبۇل ۋنيۆەرسيتەتىنىڭ ەكونوميكا فاكۋلتەتى جانىنان جۋرناليستيكا ينستيتۋتى قۇرىلدى. بۇل ينستيتۋتتا اسىرەسە ارنايى بىلىك-ءبىلىمى جوق، تاجىريبە جۇزىندە قالىپتاسقان جۋرناليستەردى وقىتۋ قولعا الىندى. ينستيتۋت 1980 جىلى جۋرناليستيكا جانە قوعاممەن بايلانىس مەكتەبى دەپ اتالدى. 1982 جىلى ول ءباسپاسوز جانە حابار تاراتۋ مەكتەبى بولىپ وزگەرتىلدى جانە ىستانبۇل ۋنيۆەرسيتەتىمەن بىرىكتىرىلدى.

1992 جىلى ىستانبۇل ۋنيۆەرسيتەتىنىڭ كوممۋنيكاتسيا فاكۋلتەتى قۇرىلدى. بۇگىنگى تاڭدا فاكۋلتەت 3 بولىمدە: جۋرناليستيكا، قوعاممەن بايلانىس جانە پۋبليتسيستيكا، راديو، تەلەۆيدەنيە جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 308 ستۋدەنتكە ارنالعان. بارلىق ءبىلىم بەرۋ باعدارلامالارى كوممۋنيكاتسيالىق زەرتتەۋلەر قاۋىمداستىعى (İletişim Araştırmaları Derneği – ILAD) تاراپىنان اككرەديتتەۋدەن وتكەن. وسى ءۇش بولىمدە 71 وقىتۋشى قىزمەت ىستەيدى.

انكارا ۋنيۆەرسيتەتىنىڭ كوممۋنيكاتسيا فاكۋلتەتى 1965 جىلى يۋنەسكو-نىڭ قولداۋىمەن انكارا ۋنيۆەرسيتەتىنىڭ ءباسپاسوز جانە باسىلىم مەكتەبى دەگەن اتپەن قۇرىلعان. 1992 جىلى كوممۋنيكاتسيا فاكۋلتەتى بولىپ قايتا قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 207 ستۋدەنت. فاكۋلتەتتىڭ بارلىق 3 باعدارلاماسى ILAD اككرەديتتەۋىنەن ءوتتى. فاكۋلتەتتە 29 وقىتۋشى جۇمىس ىستەيدى.

مارمارا ۋنيۆەرسيتەتىنىڭ كوممۋنيكاتسيا فاكۋلتەتىنىڭ نەگىزى 1966 جىلى قۇرىلعان ىستانبۇل جەكە جۋرناليستيكا مەكتەبىنەن باستالادى. مەكتەپ 1971 جىلى مەملەكەت قاراماعىنا وتكىزىلىپ، ىستانبۇل جۋرناليستيكا مەكتەبى دەپ اتالدى. 1982 جىلى مارمارا ۋنيۆەرسيتەتىنە ءباسپاسوز جانە حابار تاراتۋ مەكتەبى دەگەن اتپەن قوسىلدى. كوممۋنيكاتسيا فاكۋلتەتى بولىپ 1992 جىلى قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 239 ستۋدەنت. فاكۋلتەتتە 97 پروفەسسور-وقىتۋشى قىزمەت ىستەيدى.

انكارا حاجى بايرام ۆەلي ۋنيۆەرسيتەتىندەگى كوممۋنيكاتسيا فاكۋلتەتىنىڭ نەگىزى 1967 جىلى اشىلعان جەكە باشكەنت جۋرناليستيكا مەكتەبىنەن باستالادى. مەكتەپ 1971 جىلى مەملەكەت قاراماعىنا وتكىزىلىپ، جۋرناليستيكا جانە قوعاممەن بايلانىس مەكتەبى دەپ اتالدى. 1981 جىلى گازي ۋنيۆەرسيتەتىنە ءباسپاسوز جانە حابار تاراتۋ مەكتەبى دەگەن اتپەن قوسىلدى. ول 1992 جىلى كوممۋنيكاتسيا فاكۋلتەتى بولىپ اتالدى. فاكۋلتەت 2018 جىلى گازي ۋنيۆەرسيتەتىنىڭ قۇرامىنان شىعارىلىپ، جاڭادان قۇرىلعان انكارا حاجى بايرام ۆەلي ۋنيۆەرسيتەتىنە قوسىلدى. ول 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 253 ستۋدەنت. فاكۋلتەتتە 49 پروفەسسور-وقىتۋشى قۇرامى بار.

ەگە ۋنيۆەرسيتەتىنىڭ كوممۋنيكاتسيا فاكۋلتەتىنىڭ نەگىزى 1968 جىلى اشىلعان يزمير كاراتاش جەكە جۋرناليستيكا مەكتەبىنەن باستالادى. مەكتەپ 1971 جىلى مەملەكەت قاراماعىنا وتكىزىلىپ، جۋرناليستيكا جانە قوعاممەن بايلانىس مەكتەبى دەگەن اتپەن ەگە ۋنيۆەرسيتەتىنە قوسىلدى. 1979 جىلى ول ءباسپاسوز جانە حابار تاراتۋ مەكتەبى دەپ اتالدى. 1992 جىلى كوممۋنيكاتسيا فاكۋلتەتى بولىپ قۇرىلدى. فاكۋلتەت 4 بولىمدە ءبىلىم بەرەدى: بولىمدەر جۋرناليستيكا، قوعاممەن بايلانىس جانە جارناما، راديو، تەلەديدار جانە كينو جانە جارناما دەپ اتالادى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 336 ستۋدەنت. فاكۋلتەتتىڭ بارلىق باعدارلامالارى ILAD اككرەديتتەۋىنەن وتكەن. فاكۋلتەتتە 50 وقىتۋشى جۇمىس ىستەيدى.

انادولۋ ۋنيۆەرسيتەتىنىڭ كوممۋنيكاتسيا عىلىمدارى فاكۋلتەتىنىڭ نەگىزى 1977 جىلى انادولۋ ۋنيۆەرسيتەتى جانىنان قۇرىلعان كينو جانە تەلەديدار مەكتەبىنەن باستالادى. 1980 جىلى ونىڭ اتاۋى كوممۋنيكاتسيالىق عىلىمدار فاكۋلتەتى بولىپ وزگەرتىلدى. فاكۋلتەت 4 بولىمدە: جۋرناليستيكا، قوعاممەن بايلانىس جانە جارناما، كوممۋنيكاتسيا ديزاينى جانە مەنەدجمەنت، كينو جانە تەلەديدار بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 331 ستۋدەنت. فاكۋلتەتتە 65 پروفەسسورلىق-وقىتۋشى قۇرامى بار.

سەلچۋك ۋنيۆەرسيتەتىنىڭ كوممۋنيكاتسيا فاكۋلتەتى 1992 جىلى قۇرىلىپ، 1993-1994 وقۋ جىلىنان باستاپ ستۋدەنتتەردى قابىلداي باستادى. فاكۋلتەت 4 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو جانە جارناما بولىمدەرىندە ءبىلىم بەرەدى. بارلىق 4 بولىمدە ەكىنشى ماماندىق الۋ ءۇشىن ءبىلىم بەرۋ باعدارلامالارى بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – ءبىرىنشى ءبىلىم بويىنشا 326 ستۋدەنت، ەكىنشى ءبىلىم بويىنشا 316 ستۋدەنت، بارلىعى 642 ستۋدەنت وقۋعا قابىلداندى. فاكۋلتەتتە 53 وقىتۋشى جۇمىس ىستەيدى.

گالاتاساراي ۋنيۆەرسيتەتىنىڭ كوممۋنيكاتسيا فاكۋلتەتى 1994 جىلى قۇرىلعان. ستۋدەنتتەردى كوممۋنيكاتسيا دەگەن جالپى اتپەن ءبىر ءبولىم رەتىندە وقۋعا قابىلدايدى، بىراق ونىڭ 3 سالاسى بار: ولار – راديوتەلەديدار جانە كينو، قوعاممەن بايلانىس جانە جارناما، جۋرناليستيكا جانە ينتەرنەت-حابار تاراتۋ. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 33 ستۋدەنت. فاكۋلتەت ILAD اككرەديتتەۋىنەن وتكەن. كوممۋنيكاتسيا فاكۋلتەتىندە 11 وقىتۋشى جۇمىس ىستەيدى.

اتاتۇرىك ۋنيۆەرسيتەتىنىڭ كوممۋنيكاتسيا فاكۋلتەتى 1997 جىلى قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. مۇندا ەكى جاقتى وقىتادى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – جالپى العاندا 540 ستۋدەنت، ونىڭ ىشىندە ءبىرىنشى ءبىلىم بويىنشا 288 ستۋدەنت جانە ەكىنشى ءبىلىم بويىنشا 252 ستۋدەنت. فاكۋلتەتتىڭ ءبىرىنشى ءبىلىم بەرۋ باعدارلامالارى ILAD اككرەديتتەۋىنەن وتكەن. فاكۋلتەتتە 32 وقىتۋشى جۇمىس ىستەيدى.

قوجاەلي ۋنيۆەرسيتەتىنىڭ كوممۋنيكاتسيا فاكۋلتەتى 1997 جىلى قۇرىلىپ، 1998-1999 وقۋ جىلىنان باستاپ ستۋدەنتتەردى قابىلداي باستادى. فاكۋلتەت 5 بولىمدە: جۋرناليستيكا، ۆيزۋالدى كوممۋنيكاتسيا ديزاينى، قوعاممەن بايلانىس جانە جارناما، راديو، تەلەديدار جانە كينو جانە جارناما بولىمدەرىندە ءبىلىم بەرەدى. جۋرناليستيكا بولىمىندە ەكىنشى ءبىلىم بەرەتىن ءبولىم دە بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – بارلىعى 344 ستۋدەنت، ونىڭ ىشىندە ءبىرىنشى ءبىلىم بەرۋ بويىنشا 260 ستۋدەنت، ەكىنشى ءبىلىم بەرۋ بويىنشا 84 ستۋدەنت وقيدى، فاكۋلتەتتە 33 وقىتۋشى جۇمىس ىستەيدى.

فىرات ۋنيۆەرسيتەتىنىڭ كوممۋنيكاتسيا فاكۋلتەتى 1997 جىلى قۇرىلىپ، 2001-2002 وقۋ جىلىنان باستاپ ستۋدەنتتەردى قابىلداي باستادى. فاكۋلتەت 4 بولىمدە: جۋرناليستيكا، ۆيزۋالدى كوممۋنيكاتسيا ديزاينى، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – بارلىعى 553 ستۋدەنت، ونىڭ ىشىندە ءبىرىنشى ءبىلىم بەرۋ بويىنشا 316 ستۋدەنت، ەكىنشى ءبىلىم بويىنشا 237 ستۋدەنت وقيدى. فاكۋلتەتتە 17 وقىتۋشى جۇمىس ىستەيدى.

اكدەنيز ۋنيۆەرسيتەتىنىڭ كوممۋنيكاتسيا فاكۋلتەتى 1998 جىلى قۇرىلعان. فاكۋلتەت 4 ءبولىم بويىنشا: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو جانە جارناما بولىمدەرىندە ءبىلىم بەرەدى. راديو، تەلەديدار جانە كينو باعدارلاماسى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 326 ستۋدەنت. فاكۋلتەتتە 29 پروفەسسور-وقىتۋشى جۇمىس ىستەيدى.

ەرجيەس ۋنيۆەرسيتەتىنىڭ كوممۋنيكاتسيا فاكۋلتەتى 2001 جىلى قۇرىلعان. فاكۋلتەت 3 بولىمدە ءبىلىم بەرەدى: ولار جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرى. ءۇش بولىمدە دە ەكىنشى ءبىلىم بەرەتىن جانە قاشىقتىقتان ءبىلىم بەرۋ باعدارلامالارى بار. فاكۋلتەتتىڭ ءبىرىنشى ءبىلىم بەرۋ باعدارلامالارى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – بارلىعى 708 ستۋدەنت، ونىڭ ىشىندە ءبىرىنشى ءبىلىم بويىنشا 273 ستۋدەنت، ەكىنشى ءبىلىم بەرۋ بويىنشا 273 ستۋدەنت، قاشىقتان وقىتۋ بويىنشا 162 ستۋدەنت وقيدى. فاكۋلتەتتە 30 پروفەسسورلىق-وقىتۋشى قۇرامى جۇمىس ىستەيدى.

مەرسين ۋنيۆەرسيتەتىنىڭ كوممۋنيكاتسيا فاكۋلتەتى 2001 جىلى قۇرىلعان. فاكۋلتەت ەكى بولىمدە: جۋرناليستيكا جانە راديو، تەلەۆيدەنيە جانە كينو بولىمدەرىندە ءبىلىم بەرەدى. فاكۋلتەتتىڭ «راديو، تەلەديدار جانە كينو» باعدارلاماسى ILAD اككرەديتتەۋىنەن ءوتتى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 148 ستۋدەنت. فاكۋلتەتتە 12 وقىتۋشى جۇمىس ىستەيدى.

ترابزون ۋنيۆەرسيتەتىنىڭ كوممۋنيكاتسيا فاكۋلتەتى 2003 جىلى قارادەڭىز تەحنيكالىق ۋنيۆەرسيتەتىنىڭ قۇرامىندا قۇرىلدى. فاكۋلتەت 2018 جىلى ترابزون ۋنيۆەرسيتەتىنىڭ قاراماعىنا وتكىزىلدى. فاكۋلتەت 2 بولىمدە: جۋرناليستيكا، قوعاممەن بايلانىس جانە جارناما بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 148 ستۋدەنت. فاكۋلتەتتە 13 وقىتۋشى جۇمىس ىستەيدى.

حاجەتتەپە ۋنيۆەرسيتەتىنىڭ كوممۋنيكاتسيا فاكۋلتەتى 2005 جىلى قۇرىلعان. فاكۋلتەتتە ستۋدەنتتەردى قابىلدايتىن «كوممۋنيكاتسيا عىلىمدارى» دەپ اتالاتىن ءبىر عانا باكالاۆريات باعدارلاماسى بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 75 ستۋدەنت. فاكۋلتەتتە 16 وقىتۋشى جۇمىس ىستەيدى.

چۋكۋروۆا ۋنيۆەرسيتەتىنىڭ كوممۋنيكاتسيا فاكۋلتەتى 2006 جىلى قۇرىلعان. فاكۋلتەت ءۇش ءبولىم بويىنشا: جۋرناليستيكا، كوممۋنيكاتسيا عىلىمدارى، راديو، تەلەۆيدەنيە جانە كينو بولىمدەرىندە ءبىلىم بەرەدى. راديو، تەلەديدار جانە كينو باعدارلاماسى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 237 ستۋدەنت. فاكۋلتەتتە 17 پروفەسسور-وقىتۋشى جۇمىس ىستەيدى.

سيۆاس جۋمحۋريەت ۋنيۆەرسيتەتىنىڭ كوممۋنيكاتسيا فاكۋلتەتى 2007 جىلى قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەۆيدەنيە جانە كينو ءبىلىم بەرەدى جانە بارلىق 3 بولىمدە دە ەكىنشى ءبىلىم بەرۋ باعدارلامالارى بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – جالپى العاندا 549 ستۋدەنت، ونىڭ ىشىندە ءبىرىنشى ءبىلىم بەرۋ بويىنشا 286 ستۋدەنت، ەكىنشى ءبىلىم بويىنشا 263 ستۋدەنت ستۋدەنت ءبىلىم الادى. فاكۋلتەتتە 20 وقىتۋشى جۇمىس ىستەيدى.

گيرەسۋن ۋنيۆەرسيتەتى تيرەبولۋ كوممۋنيكاتسيا فاكۋلتەتى 2008 جىلى قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 222 ستۋدەنت وقيدى. فاكۋلتەتتە 14 وقىتۋشى جۇمىس ىستەيدى.

گۇمۇشحانە ۋنيۆەرسيتەتىنىڭ كوممۋنيكاتسيا فاكۋلتەتى 2008 جىلى قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەۆيدەنيە جانە كينو بولىمدەرىندە ءبىلىم بەرەدى. بارلىق 3 بولىمدە ەكىنشى ءبىلىم بەرۋ باعدارلامالارى بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – جالپى العاندا 404 ستۋدەنت، ونىڭ ىشىندە ءبىرىنشى ءبىلىم بويىنشا 212 ستۋدەنت، ەكىنشى ءبىلىم بويىنشا 192 ستۋدەنت وقيدى. فاكۋلتەتتە 20 پروفەسسور-وقىتۋشى جۇمىس ىستەيدى.

يوزگات بوزوك ۋنيۆەرسيتەتىنىڭ كوممۋنيكاتسيا فاكۋلتەتى 2009 جىلى قۇرىلعان. فاكۋلتەت ءۇش بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 212 ستۋدەنت. فاكۋلتەتتە 12 وقىتۋشى جۇمىس ىستەيدى.

گازيانتەپ ۋنيۆەرسيتەتىنىڭ كوممۋنيكاتسيا فاكۋلتەتى 2010 جىلى قۇرىلعان. فاكۋلتەت ەكى بولىمدە: جۋرناليستيكا جانە قوعاممەن بايلانىس جانە جارناما بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 184 ستۋدەنت. وسى ەكى بولىمدە 7 وقىتۋشى جۇمىس ىستەيدى.

ديكلە ۋنيۆەرسيتەتىنىڭ كوممۋنيكاتسيا فاكۋلتەتى 2010 جىلى قۇرىلعان. فاكۋلتەت ەكى بولىمدە: جۋرناليستيكا جانە قوعاممەن بايلانىس جانە جارناما بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 159 ستۋدەنت. وسى ەكى بولىمدە 7 وقىتۋشى قىزمەتكەر جۇمىس ىستەيدى.

ءينونۇ ۋنيۆەرسيتەتىنىڭ كوممۋنيكاتسيا فاكۋلتەتى 2010 جىلى قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. ونىڭ ىشىندە قوعاممەن بايلانىس جانە تانىتىم بولىمىندە قاشىقتىقتان ءبىلىم بەرۋ باعدارلاماسى دا بار. فاكۋلتەتتىڭ «قوعاممەن بايلانىس جانە تانىتىم» باعدارلاماسى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – بارلىعى 394, ونىڭ ىشىندە ءبىرىنشى ءبىلىم بويىنشا 250 ستۋدەنت، قاشىقتىقتان وقىتۋ بويىنشا 144 ستۋدەنت وقيدى. فاكۋلتەتتە 21 وقىتۋشى جۇمىس ىستەيدى.

كاستامونۋ ۋنيۆەرسيتەتىنىڭ كوممۋنيكاتسيا فاكۋلتەتى 2010 جىلى قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. سونىمەن قاتار ءار بولىمدە ەكىنشى ءبىلىم بەرۋ باعدارلاماسى بار. فاكۋلتەتتىڭ «راديو، تەلەديدار جانە كينو» باعدارلاماسى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – جالپى العاندا 414 ستۋدەنت، ءبىرىنشى ءبىلىم بويىنشا 222 ستۋدەنت، ەكىنشى ءبىلىم بويىنشا 192 ستۋدەنت وقيدى. فاكۋلتەتتە 16 وقىتۋشى جۇمىس ىستەيدى.

مۋش الپارسلان ۋنيۆەرسيتەتىنىڭ كوممۋنيكاتسيا فاكۋلتەتى 2010 جىلى قۇرىلعان. فاكۋلتەتتە جۋرناليستيكا ءبولىمى بويىنشا عانا ءبىلىم بەرىلەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 54 ستۋدەنت. بولىمدە 4 وقىتۋشى جۇمىس ىستەيدى.

وندوكۋز مايىس ۋنيۆەرسيتەتىنىڭ كوممۋنيكاتسيا فاكۋلتەتى 2010 جىلى قۇرىلعان. فاكۋلتەت 4 بولىمدە: جۋرناليستيكا، قوعاممەن بايلانىس جانە جارناما، كوممۋنيكاتسيا جانە ديزاين، راديو، تەلەديدار جانە كينو بولىمدەرىندە ءبىلىم بەرەدى. قوعاممەن بايلانىس جانە تانىتىم ءبولىمىنىڭ ەكىنشى ءبىلىم بەرۋ باعدارلاماسى دا بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – بارلىعى 350 ستۋدەنت، ءبىرىنشى ءبىلىم بەرۋ بويىنشا 286 ستۋدەنت، ەكىنشى ءبىلىم بەرۋ بويىنشا 64 ستۋدەنت وقيدى. فاكۋلتەتتە 18 پروفەسسور-وقىتۋشى جۇمىس ىستەيدى.

حاتاي مۇستافا كەمال ۋنيۆەرسيتەتىنىڭ كوممۋنيكاتسيا فاكۋلتەتى 2010 جىلى قۇرىلعان. فاكۋلتەت 3 ءبولىم بويىنشا: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 120 ستۋدەنت. فاكۋلتەتتە 13 وقىتۋشى جۇمىس ىستەيدى.

زونگۋلداك بۇلەنت ەجەۆيت ۋنيۆەرسيتەتىنىڭ كوممۋنيكاتسيا فاكۋلتەتى 2010 جىلى قۇرىلعان. ستۋدەنتتەر فاكۋلتەتتەگى قوعاممەن بايلانىس جانە تانىتىم بولىمىنە عانا قابىلدانادى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 54 ستۋدەنت. فاكۋلتەتتە 6 وقىتۋشى جۇمىس ىستەيدى.

ايدىن ادنان مەندەرەس ۋنيۆەرسيتەتىنىڭ كوممۋنيكاتسيا فاكۋلتەتى 2011 جىلى اشىلدى. فاكۋلتەت 4 بولىمدە: جۋرناليستيكا، ۆيزۋالدى كوممۋنيكاتسيا ديزاينى، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. قوعاممەن بايلانىس جانە جارناما بولىمىندە ەكىنشى ءبىلىم بەرۋ باعدارلاماسى دا بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – جالپى العاندا 350 ستۋدەنت، ءبىرىنشى ءبىلىم بويىنشا 296 ستۋدەنت، ەكىنشى ءبىلىم بويىنشا 54 ستۋدەنت وقيدى. فاكۋلتەتتە 26 وقىتۋشى جۇمىس ىستەيدى.

پامۋككالە ۋنيۆەرسيتەتىنىڭ كوممۋنيكاتسيا فاكۋلتەتى 2011 جىلى قۇرىلعان. ستۋدەنتتەر فاكۋلتەتتەگى قوعاممەن بايلانىس جانە تانىتىم بولىمىنە عانا قابىلدانادى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 74 ستۋدەنت. فاكۋلتەتتە 5 وقىتۋشى جۇمىس ىستەيدى.

چاناككالە 18 مارت ۋنيۆەرسيتەتىنىڭ كوممۋنيكاتسيا فاكۋلتەتى 2011 جىلى قۇرىلعان. فاكۋلتەت ەكى بولىمدە: جۋرناليستيكا جانە راديو، تەلەۆيدەنيە جانە كينو بولىمدەرىندە ءبىلىم بەرەدى. راديو، تەلەۆيدەنيە جانە كينو ءبولىمى ەكىنشى ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – بارلىعى 222 ستۋدەنت، ءبىرىنشى ءبىلىم بويىنشا 148 ستۋدەنت، ەكىنشى ءبىلىم بويىنشا 74 ستۋدەنت وقيدى. فاكۋلتەتتە 23 وقىتۋشى جۇمىس ىستەيدى.

نيعدە ومەر حاليس دەمير ۋنيۆەرسيتەتىنىڭ كوممۋنيكاتسيا فاكۋلتەتى 2011 جىلى قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 212 ستۋدەنت. فاكۋلتەتتە 14 وقىتۋشى جۇمىس ىستەيدى.

سۇلەيمان دەميرەل ۋنيۆەرسيتەتىنىڭ كوممۋنيكاتسيا فاكۋلتەتى 2011 جىلى قۇرىلعان. فاكۋلتەت 4 بولىمدە: جۋرناليستيكا، كورنەكى كوممۋنيكاتسيا ديزاينى، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. كورنەكى كوممۋنيكاتسيا ديزاينى بولىمىنەن باسقا بولىمدەردە ەكىنشى ءبىلىم بەرۋ باعدارلامالارى بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – جالپى العاندا 750 ستۋدەنت، ءبىرىنشى ءبىلىم بەرۋ بويىنشا 402 ستۋدەنت، ەكىنشى ءبىلىم بويىنشا 348 ستۋدەنت وقيدى. فاكۋلتەتتە 24 وقىتۋشى جۇمىس ىستەيدى.

ۋشاك ۋنيۆەرسيتەتىنىڭ كوممۋنيكاتسيا فاكۋلتەتى 2011 جىلى قۇرىلعان. فاكۋلتەت 4 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو، جاڭا مەديا جانە كوممۋنيكاتسيا بولىمدەرىندە ءبىلىم بەرەدى. جۋرناليستيكا بولىمىنەن باسقا بولىمدەردە ەكىنشى ءبىلىم بەرۋ باعدارلامالارى بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – بارلىعى 509 ستۋدەنت، ءبىرىنشى ءبىلىم بويىنشا – 297 ستۋدەنت، ەكىنشى ءبىلىم بويىنشا – 212 ستۋدەنت وقيدى. فاكۋلتەتتە 13 وقىتۋشى جۇمىس ىستەيدى.

اقساراي ۋنيۆەرسيتەتىنىڭ كوممۋنيكاتسيا فاكۋلتەتى 2012 جىلى قۇرىلعان. فاكۋلتەت ەكى بولىمدە: جۋرناليستيكا، قوعاممەن بايلانىس جانە جارناما بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 128 ستۋدەنت. فاكۋلتەتتە 9 وقىتۋشى جۇمىس ىستەيدى.

بولۋ ابانت يززەت بايسال ۋنيۆەرسيتەتىنىڭ كوممۋنيكاتسيا فاكۋلتەتى 2012 جىلى قۇرىلعان. فاكۋلتەت 3 بولىمدە: جۋرناليستيكا، قوعاممەن بايلانىس جانە جارناما، راديو، تەلەديدار جانە كينو بولىمدەرىندە ءبىلىم بەرەدى. جۋرناليستيكا، قوعاممەن بايلانىس جانە تانىتىم بولىمدەرىندە ەكىنشى ءبىلىم بەرۋ باعدارلامالارى بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – جالپى العاندا 340 ستۋدەنت، ءبىرىنشى ءبىلىم بەرۋدە 222 ستۋدەنت، ەكىنشى ءبىلىم بويىنشا 118 ستۋدەنت وقيدى. فاكۋلتەتتە 23 وقىتۋشى جۇمىس ىستەيدى.

ساكاريا ۋنيۆەرسيتەتىنىڭ كوممۋنيكاتسيا فاكۋلتەتى 2012 جىلى قۇرىلعان. فاكۋلتەت 4 ءبولىم بويىنشا: جۋرناليستيكا، قوعاممەن بايلانىس جانە جارناما، كوممۋنيكاتسيا جانە ديزاين، راديو، تەلەديدار جانە كينو بولىمدەرىندە ءبىلىم بەرەدى. جۋرناليستيكا، قوعاممەن بايلانىس جانە جارناما، كوممۋنيكاتسيا جانە ديزاين بولىمدەرى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 274 ستۋدەنت. فاكۋلتەتتە 21 وقىتۋشى جۇمىس ىستەيدى.

مۋنزۋر ۋنيۆەرسيتەتىنىڭ كوممۋنيكاتسيا فاكۋلتەتى 2012 جىلى قۇرىلعان. فاكۋلتەت ەكى ءبولىم بويىنشا: قوعاممەن بايلانىس جانە تانىتىم، راديو، تەلەۆيدەنيە جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 108 ستۋدەنت. فاكۋلتەتتە 8 وقىتۋشى جۇمىس ىستەيدى.

كارابۇك ۋنيۆەرسيتەتى تۇركەر ينانوعلۋ كوممۋنيكاتسيا فاكۋلتەتى 2016 جىلى قۇرىلعان. فاكۋلتەت ەكى بولىمدە: جۋرناليستيكا جانە راديو، تەلەۆيدەنيە جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 96 ستۋدەنت. فاكۋلتەتتە 8 وقىتۋشى جۇمىس ىستەيدى.

مانيسا جەلال بايار ۋنيۆەرسيتەتىنىڭ كوممۋنيكاتسيا فاكۋلتەتى 2016 جىلى قۇرىلعان. فاكۋلتەت تەك قانا قوعاممەن بايلانىس جانە تانىتىم بولىمىنە ستۋدەنتتەر قابىلدايدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 54 ستۋدەنت. فاكۋلتەتتە 9 وقىتۋشى جۇمىس ىستەيدى.

تۇركيا رەسپۋبليكاسىندا ارنايى قورلاردىڭ قۇرىلتايشىلىعىنداعى 21 قۇرىلتاي ۋنيۆەرسيتەتىنىڭ كوممۋنيكاتسيا فاكۋلتەتتەرى ستۋدەنتتەردى وقۋعا قابىلدايدى. بۇل فاكۋلتەتتەردىڭ مەملەكەتتىك ۋنيۆەرسيتەتتەردەگى كوممۋنيكاتسيا فاكۋلتەتتەرىنەن باستى ايىرماشىلىعى – ولار ۇسىناتىن باكالاۆريات باعدارلامالارىنىڭ الۋان تۇرلىلىگىندە. ەڭ كوپ باعدارلاما ارتۇرلىلىگىمەن ىستانبۇل بيلگي ۋنيۆەرسيتەتى، ۇسكۇدار ۋنيۆەرسيتەتى، ىستانبۇل ايدىن ۋنيۆەرسيتەتى، ىستانبۇل بەيكەنت ۋنيۆەرسيتەتى، باحچەشەحير ۋنيۆەرسيتەتى جانە ىستانبۇل مەديپول ۋنيۆەرسيتەتى ەرەكشە ورىن الادى.

ىستانبۇل بيلگي ۋنيۆەرسيتەتىنىڭ كوممۋنيكاتسيا فاكۋلتەتى 1996 جىلى قۇرىلعان. فاكۋلتەت 8 باعدارلاما: تسيفرلىق ويىن ديزاينى، ۆيزۋالدى كوممۋنيكاتسيا ديزاينى، قوعاممەن بايلانىس جانە تانىتىم، كوممۋنيكاتسيالاردى جوبالاۋ جانە باسقارۋ، راديو، تەلەديدار جانە كينو، جارناما، ونەر جانە مادەنيەتتى باسقارۋ، جاڭا مەديا جانە كوممۋنيكاتسيا باعدارلامالارى بويىنشا ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا بويىنشا 623 ستۋدەنت وقيدى. فاكۋلتەتتە 34 وقىتۋشى جۇمىس ىستەيدى.

يەديتەپە ۋنيۆەرسيتەتىنىڭ كوممۋنيكاتسيا فاكۋلتەتى 1996 جىلى قۇرىلعان. فاكۋلتەت 5 ءبولىم بويىنشا: جۋرناليستيكا، ۆيزۋالدى كوممۋنيكاتسيا ديزاينى، قوعاممەن بايلانىس جانە تانىتىم، راديو، تەلەديدار جانە كينو، جارناما ديزاينى جانە كوممۋنيكاتسيا بولىمدەرىندە ءبىلىم بەرەدى. فاكۋلتەتتىڭ جۋرناليستيكا بولىمىنەن باسقا بارلىق 4 باعدارلاماسى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 284 ستۋدەنت وقيدى. فاكۋلتەتتە 23 وقىتۋشى جۇمىس ىستەيدى.

باشكەنت ۋنيۆەرسيتەتىنىڭ كوممۋنيكاتسيا فاكۋلتەتى 1997 جىلى قۇرىلعان. فاكۋلتەت ءۇش ءبولىم بويىنشا: قوعاممەن بايلانىس جانە تانىتىم، كوممۋنيكاتسيا جانە ديزاين، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 148 ستۋدەنت. فاكۋلتەتتىڭ بارلىق 3 باعدارلاماسى ILAD اككرەديتتەۋىنەن وتكەن. فاكۋلتەتتە 20 وقىتۋشى جۇمىس ىستەيدى.

مالتەپە ۋنيۆەرسيتەتىنىڭ كوممۋنيكاتسيا فاكۋلتەتى 1997 جىلى قۇرىلعان. فاكۋلتەت 5 ءبولىم بويىنشا: جۋرناليستيكا، كورنەكى كوممۋنيكاتسيا ديزاينى، قوعاممەن بايلانىس جانە تانىتىم، قوعاممەن بايلانىس جانە تانىتىم (اعىلشىن ءتىلى), راديو، تەلەديدار جانە كينو بولىمدەرىندە ءبىلىم بەرەدى. فاكۋلتەتتىڭ بارلىق باعدارلامالارى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 185 ستۋدەنت. فاكۋلتەتتە 26 پروفەسسورلىق-وقىتۋشى جۇمىس ىستەيدى.

باحچەشەحير ۋنيۆەرسيتەتىنىڭ كوممۋنيكاتسيا فاكۋلتەتى 1998 جىلى قۇرىلعان. فاكۋلتەت 6 ءبولىم بويىنشا: تسيفرلىق ويىن ديزاينى، قوعاممەن بايلانىس جانە تانىتىم، كوممۋنيكاتسيا جانە ديزاين، جارناما، كينو جانە تەلەديدار، جاڭا مەديا بولىمدەرىندە ءبىلىم بەرەدى. قوعاممەن بايلانىس جانە تانىتىم باعدارلاماسى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 318 ستۋدەنت. فاكۋلتەتتە 34 وقىتۋشى جۇمىس ىستەيدى.

كادير حاس ۋنيۆەرسيتەتىنىڭ كوممۋنيكاتسيا فاكۋلتەتى 2000 جىلى قۇرىلعان. فاكۋلتەت 5 ءبولىم بويىنشا: كورنەكى كوممۋنيكاتسيا ديزاينى، قوعاممەن بايلانىس جانە تانىتىم، راديو، تەلەديدار جانە كينو، جارناما جانە جاڭا مەديا بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 202 ستۋدەنت. فاكۋلتەتتە 19 وقىتۋشى جۇمىس ىستەيدى.

ىستانبۇل كوممەرتسيا ۋنيۆەرسيتەتىنىڭ كوممۋنيكاتسيا فاكۋلتەتى 2001 جىلى قۇرىلعان. فاكۋلتەت 3 بولىمدە: كورنەكى كوممۋنيكاتسيا ديزاينى، قوعاممەن بايلانىس جانە تانىتىم، مەديا جانە كوممۋنيكاتسيا بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 177 ستۋدەنت. فاكۋلتەتتە 22 پروفەسسور-وقىتۋشى جۇمىس ىستەيدى.

يزمير ەكونوميكا ۋنيۆەرسيتەتى كوممۋنيكاتسيا فاكۋلتەتى 2001 جىلى قۇرىلعان. فاكۋلتەت 3 بولىمدە: قوعاممەن بايلانىس جانە جارناما، كينو جانە تسيفرلىق مەديا، جاڭا مەديا جانە كوممۋنيكاتسيا بولىمدەرىندە ءبىلىم بەرەدى. فاكۋلتەتتەگى بارلىق 3 باعدارلاما ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 134 ستۋدەنت. فاكۋلتەتتە 14 پروفەسسور-وقىتۋشى جۇمىس ىستەيدى.

ياشار ۋنيۆەرسيتەتىنىڭ كوممۋنيكاتسيا فاكۋلتەتى 2001 جىلى قۇرىلعان. فاكۋلتەت 4 بولىمدە: كورنەكى كوممۋنيكاتسيا ديزاينى، قوعاممەن بايلانىس جانە جارناما، راديو، تەلەديدار جانە كينو، جاڭا مەديا جانە كوممۋنيكاتسيا بولىمدەرىندە ءبىلىم بەرەدى. قوعاممەن بايلانىس جانە جارناما، راديو، تەلەديدار جانە كينو باعدارلامالارى ILAD اككرەديتتەۋىنەن ءوتتى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 188 ستۋدەنت. فاكۋلتەتتە 25 پروفەسسور-وقىتۋشى جۇمىس ىستەيدى.

ىستانبۇل ارەل ۋنيۆەرسيتەتىنىڭ كوممۋنيكاتسيا فاكۋلتەتى 2007 جىلى قۇرىلعان. فاكۋلتەت 5 ءبولىم بويىنشا: جۋرناليستيكا، كورنەكى كوممۋنيكاتسيا ديزاينى، قوعاممەن بايلانىس جانە جارناما، كينو جانە تەلەديدار، جاڭا مەديا جانە كوممۋنيكاتسيا بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 185 ستۋدەنت. فاكۋلتەتتە 15 وقىتۋشى جۇمىس ىستەيدى.

ىستانبۇل ايدىن ۋنيۆەرسيتەتىنىڭ كوممۋنيكاتسيا فاكۋلتەتى 2007 جىلى قۇرىلعان. فاكۋلتەت 7 بولىمدە: جۋرناليستيكا، كورنەكى كوممۋنيكاتسيا ديزاينى، قوعاممەن بايلانىس جانە تانىتىم، راديو، تەلەديدار جانە كينو، جارناما، تەلەۆيزيا حابارلارىن دايارلاۋ جانە باعدارلامالاۋ، جاڭا مەديا جانە كوممۋنيكاتسيا بولىمدەرىندە ءبىلىم بەرەدى. ولاردىڭ ىشىندە جۋرناليستيكا، قوعاممەن بايلانىس جانە تانىتىم، راديو، تەلەديدار جانە كينو، جارناما، تەلەۆيزيا حابارلارىن دايارلاۋ جانە باعدارلامالاۋ باعدارلامالارى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 422 ستۋدەنت. فاكۋلتەتتە 31 پروفەسسور-وقىتۋشى جۇمىس ىستەيدى.

ىستانبۇل بەيكەنت ۋنيۆەرسيتەتىنىڭ كوممۋنيكاتسيا فاكۋلتەتى 2008 جىلى قۇرىلعان. فاكۋلتەت 7 ءبولىم بويىنشا: ساندىق ويىن ديزاينى، كورنەكى كوممۋنيكاتسيا ديزاينى، قوعاممەن بايلانىس جانە جارناما، مەديا جانە كوممۋنيكاتسيا، تەلەۆيزيا حابارلارىن دايارلاۋ جانە باعدارلامالاۋ، جاڭا مەديا، جاڭا مەديا (اعىلشىن ءتىلى) بولىمدەرى بويىنشا ءبىلىم بەرەدى. قوعاممەن بايلانىس جانە جارناما، تەلەۆيزيا حابارلارىن دايارلاۋ جانە باعدارلامالاۋ باعدارلامالارى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 466 ستۋدەنت. فاكۋلتەتتە 33 وقىتۋشى جۇمىس ىستەيدى.

ىستانبۇل يەني ءيۇزيىل ۋنيۆەرسيتەتىنىڭ كوممۋنيكاتسيا فاكۋلتەتى 2009 جىلى قۇرىلعان. فاكۋلتەت 4 بولىمدە: كورنەكى كوممۋنيكاتسيا ديزاينى، قوعاممەن بايلانىس جانە جارناما، راديو، تەلەديدار جانە كينو، جاڭا مەديا جانە كوممۋنيكاتسيا بولىمدەرىندە ءبىلىم بەرەدى. راديو، تەلەديدار جانە كينو باعدارلاماسى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 123 ستۋدەنت. فاكۋلتەتتە 19 وقىتۋشى جۇمىس ىستەيدى.

ىستانبۇل مەديپول ۋنيۆەرسيتەتىنىڭ كوممۋنيكاتسيا فاكۋلتەتى 2009 جىلى قۇرىلعان. فاكۋلتەت 6 ءبولىم بويىنشا: جۋرناليستيكا، قوعاممەن بايلانىس جانە جارناما، قوعاممەن بايلانىس جانە جارناما (اعىلشىن تىلىندە), مەديا جانە بەينەلەۋ ونەرى، راديو، تەلەديدار جانە كينو، جاڭا مەديا جانە كوممۋنيكاتسيا بولىمدەرىندە ءبىلىم بەرەدى. قوعاممەن بايلانىس جانە جارناما، مەديا جانە بەينەلەۋ ونەرى، راديو، تەلەديدار جانە كينو باعدارلامالارى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 414 ستۋدەنت. فاكۋلتەتتە 23 پروفەسسور-وقىتۋشى قۇرامى جۇمىس ىستەيدى.

ۇسكۇدار ۋنيۆەرسيتەتىنىڭ كوممۋنيكاتسيا فاكۋلتەتى 2011 جىلى قۇرىلىپ، 2013-2014 وقۋ جىلىندا العاشقى ستۋدەنتتەرىن قابىلداي باستادى. فاكۋلتەت 7 بولىمدە: مۋلتفيلم جانە انيماتسيا، جۋرناليستيكا، كورنەكى كوممۋنيكاتسيا ديزاينى، قوعاممەن بايلانىس جانە تانىتىم، راديو، تەلەديدار جانە كينو، جارناما، جاڭا مەديا جانە كوممۋنيكاتسيا بولىمدەرىندە ءبىلىم بەرەدى. فاكۋلتەتتىڭ جۋرناليستيكا، كورنەكى كوممۋنيكاتسيا ديزاينى جانە جارناما باعدارلامالارى ILAD اككرەديتتەۋىنەن وتكەن. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 407 ستۋدەنت. فاكۋلتەتتە 33 وقىتۋشى جۇمىس ىستەيدى.

يبن حالدۋن ۋنيۆەرسيتەتىنىڭ كوممۋنيكاتسيا فاكۋلتەتى 2015 جىلى قۇرىلعان. فاكۋلتەتتە ستۋدەنتتەردى تەك جاڭا مەديا جانە كوممۋنيكاتسيا ءبولىمى عانا قابىلدايدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 15 ستۋدەنت. فاكۋلتەتتە 7 وقىتۋشى جۇمىس ىستەيدى.

فەنەرباحچە ۋنيۆەرسيتەتىنىڭ كوممۋنيكاتسيا فاكۋلتەتى 2016 جىلى قۇرىلعان. فاكۋلتەت 3 ءبولىم بويىنشا: قوعاممەن بايلانىس جانە جارناما، راديو، تەلەديدار جانە كينو، جاڭا مەديا جانە كوممۋنيكاتسيا بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 83 ستۋدەنت. فاكۋلتەتتە 11 وقىتۋشى جۇمىس ىستەيدى.

حاسان كاليونجۋ ۋنيۆەرسيتەتىنىڭ كوممۋنيكاتسيا فاكۋلتەتى 2017 جىلى قۇرىلعان. فاكۋلتەت 3 بولىمدە: تسيفرلىق ويىن ديزاينى، كورنەكى كوممۋنيكاتسيا ديزاينى، راديو، تەلەديدار جانە كينو بولىمدەرىندە ءبىلىم بەرەدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 89 ستۋدەنت. فاكۋلتەتتە 9 وقىتۋشى جۇمىس ىستەيدى.

انكارا مەديپول ۋنيۆەرسيتەتىنىڭ كوممۋنيكاتسيا فاكۋلتەتى 2018 جىلى قۇرىلعان. فاكۋلتەتكە ستۋدەنتتەردى تەك قوعاممەن بايلانىس جانە جارناما ءبولىمى عانا قابىلدايدى. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 52 ستۋدەنت. فاكۋلتەتتە 4 وقىتۋشى جۇمىس ىستەيدى.

اۆراسيا ۋنيۆەرسيتەتىنىڭ كوممۋنيكاتسيا فاكۋلتەتى 2021 جىلى قۇرىلعان. فاكۋلتەتتىڭ كورنەكى كوممۋنيكاتسيا ديزاينى جانە جاڭا مەديا جانە كوممۋنيكاتسيا بولىمدەرى ستۋدەنتتەردى وقۋعا قابىلدايدى. 2023-2024 وقۋ جىلىنداعى كۆوتا سانى – 64 ستۋدەنت. الايدا فاكۋلتەت بەتىندە دە، ÖSYM (Ölçme, Seçme ve Yerleştirme Merkezi – تۇركيا ولشەۋ، تاڭداۋ جانە ورنالاستىرۋ ورتالىعى) كۆوتا نۇسقاۋلىعىندا دا وقىتۋشىلار تۋرالى اقپارات جوق. ستۋدەنتتىك كۆوتا وقىتۋشىسى جوق فاكۋلتەتتەرگە بەرىلگەن سياقتى.

يستينيە ۋنيۆەرسيتەتىنىڭ كوممۋنيكاتسيا فاكۋلتەتى 2021 جىلى قۇرىلعان. فاكۋلتەتتە 4 ءبولىم: كورنەكى كوممۋنيكاتسيا ديزاينى، قوعاممەن بايلانىس جانە جارناما، راديو، تەلەديدار جانە كينو، جاڭا مەديا جانە كوممۋنيكاتسيا بولىمدەرى بار. 2023-2024 وقۋ جىلىنداعى فاكۋلتەتكە بولىنگەن كۆوتا سانى – 144 ستۋدەنت. فاكۋلتەتتە 11 وقىتۋشى جۇمىس ىستەيدى [8, 9].

قورىتىندى

تۇركيا رەسپۋبليكاسىنىڭ ۋنيۆەرسيتەتتەرىندە جۋرناليستيكا جانە اقپارات، قوعاممەن بايلانىس جانە تانىتىم سالاسىندا جوعارى ءبىلىمدى ماماندار دايارلاۋ ماقساتىندا اشىلعان، بىراق بەلسەندى تۇردە جۇمىس جۇرگىزە قويماعان 4 كوممۋنيكاتسيا فاكۋلتەتى بار. تۇركيانىڭ مەملەكەتتىك ۋنيۆەرسيتەتتەرىندە قۇرىلعانىمەن، بۋرسا تەحنيكالىق ۋنيۆەرسيتەتىندە 2010 جىلى، انكارا الەۋمەتتىك عىلىمدار ۋنيۆەرسيتەتىندە 2018 جىلى، انكارا يىلدىرىم بەيازىت ۋنيۆەرسيتەتىندە 2018 جىلى، بوعازيچي ۋنيۆەرسيتەتىندە 2021 جىلى اشىلعان ءتورت كوممۋنيكاتسيا فاكۋلتەتى بۇگىنگە دەيىن ءوز قىزمەتكەرلەرىن ىرىكتەپ قالىپتاستىرماعان جانە ستۋدەنتتەردى قابىلداماعان.

بۇعان قوسا تۇركياداعى بەس ۋنيۆەرسيتەتتە كوممۋنيكاتسيا فاكۋلتەتتەرىن قۇرۋ جوسپارلانىپ وتىر. اتاپ ايتقاندا، «Resmi Gazete» باسىلىمىنىڭ 2023 جىلعى 3 تامىزداعى سانىندا تاعى دا 4 مەملەكەتتىك ۋنيۆەرسيتەتتە كوممۋنيكاتسيا فاكۋلتەتتەرىن اشۋ تۋرالى پرەزيدەنت جارلىعى جارىق كوردى. سوعان وراي كيليس 7 ارالىك ۋنيۆەرسيتەتىندە، باندىرما ونەدي ەيلۇل ۋنيۆەرسيتەتىندە، كاحرامانماراش يستيكلال ۋنيۆەرسيتەتىندە، ميمار سينان كوركەم ونەر ۋنيۆەرسيتەتىندە جانە ارنايى قوردىڭ قۇرىلتاي ۋنيۆەرسيتەتى التىنباش ۋنيۆەرسيتەتىندە كوممۋنيكاتسيا فاكۋلتەتىن اشۋ تۋرالى شەشىم قابىلداندى.

كوممۋنيكاتسيا فاكۋلتەتتەرىندە ستۋدەنتتەرگە ساباق بەرەتىن پروفەسسور-وقىتۋشىلار قۇرامىنىڭ سانىنا قاراساق، 97 وقىتۋشىسى بار جانە ءۇش ءبولىم بويىنشا ءبىلىم بەرەتىن مارمارا ۋنيۆەرسيتەتىنىڭ كوممۋنيكاتسيا فاكۋلتەتى الدىڭعى ورىندا ەكەنىن اتاپ كورسەتكىمىز كەلەدى. ودان كەيىنگى ورىندا كوممۋنيكاتسيا فاكۋلتەتىندە 71 پروفەسسور-وقىتۋشى قىزمەت ىستەيتىن ىستانبۇل ۋنيۆەرسيتەتى تۇر. وقىتۋشىلاردىڭ سانى جاعىنان ۇزدىك ۇشتىكتە كوممۋنيكاتسيا فاكۋلتەتتەرىندە 65 وقىتۋشى ساباق بەرەتىن انادولۋ ۋنيۆەرسيتەتى جانە 53 وقىتۋشى جۇمىس ىستەيتىن سەلچۋك ۋنيۆەرسيتەتى بار ەكەنىن ايتۋعا بولادى.

باسقا جاعىنان الىپ قاراساق، تۇركيانىڭ انادولى ايماعىنىڭ كوپتەگەن قالالارىنداعى ۋنيۆەرسيەتتەردە اشىلعان كوممۋنيكاتسيا فاكۋلتەتتەرى ستۋدەنتتەرگە ساپالى ءبىلىم بەرەتىن وقىتۋشىمەن قامتاماسىز ەتۋ بارىسىندا قيىندىقتارعا تاپ بولىپ وتىرعانى قۇپيا ەمەس. مىسالى، مۋش، زونگۋلداك، دەنيزلي، تۋنجەلي، كارابۇك، مانيسا، اكساراي، ديارباكىر جانە گازيانتەپ سياقتى قالالارداعى ۋنيۆەرسيتەتتەردە قۇرىلعان كوممۋنيكاتسيا فاكۋلتەتتەرىندە جۇمىس ىستەيتىن وقىتۋشىلاردىڭ سانى 10-عا دا جەتپەيدى.

بۇعان كەرىسىنشە، 2023-2024 وقۋ جىلىندا بولىنگەن كۆوتالاردى ەسكەرە وتىرىپ، ىسپارتاداعى سۇلەيمان دەميرەل ۋنيۆەرسيتەتىنىڭ كوممۋنيكاتسيا فاكۋلتەتى 750 ادامعا ارنالعان كۆوتامەن ەڭ كوپ ستۋدەنتتى قابىلداعان جوعارى وقۋ ورنى بولىپ وتىر. بۇل فاكۋلتەتتەن كەيىن 708 ستۋدەنتتىك كۆوتامەن ەرجيەس ۋنيۆەرسيتەتىنىڭ كوممۋنيكاتسيا فاكۋلتەتى، 642 كۆوتامەن سەلچۋك ۋنيۆەرسيتەتىنىڭ كوممۋنيكاتسيا فاكۋلتەتى، 553 كۆوتامەن فىرات ۋنيۆەرسيتەتىنىڭ كوممۋنيكاتسيا فاكۋلتەتى، 549 كۆوتامەن سيۆاس جۋمحۋريەت ۋنيۆەرسيتەتىنىڭ كوممۋنيكاتسيا فاكۋلتەتى، 540 كۆوتامەن اتاتۇرىك ۋنيۆەرسيتەتىنىڭ كوممۋنيكاتسيا فاكۋلتەتى جانە 509 كۆوتامەن ۋشاك ۋنيۆەرسيتەتىنىڭ كوممۋنيكاتسيا فاكۋلتەتى الدىڭعى ساپتاردان كورىنىپ وتىر. مەملەكەتتىك ۋنيۆەرسيتەتتەردەگى بۇل فاكۋلتەتتەردىڭ بارلىعى تەوريا مەن تاجىريبەنى ۇشتاستىرا وتىرىپ، جوعارى وقۋ ورنى مەن وندىرىستە ەكى جاقتى ءبىلىم بەرەدى.

ارنايى قورلار قارجىلاندىراتىن قۇرىلتاي ۋنيۆەرسيتەتتەرىنىڭ اراسىندا 623 كۆوتامەن ەڭ كوپ ستۋدەنتتى ىستانبۇل بيلگي ۋنيۆەرسيتەتى قابىلدادى. بۇل فاكۋلتەتتەن كەيىن 466 كۆوتامەن ىستانبۇل بەيكەنت ۋنيۆەرسيتەتىنىڭ كوممۋنيكاتسيا فاكۋلتەتى، 422 كۆوتامەن ىستانبۇل ايدىن ۋنيۆەرسيتەتىنىڭ كوممۋنيكاتسيا فاكۋلتەتى، 414 كۆوتامەن ىستانبۇل مەديپول ۋنيۆەرسيتەتىنىڭ كوممۋنيكاتسيا فاكۋلتەتى جانە 407 كۆوتامەن ۇسكۇدار ۋنيۆەرسيتەتىنىڭ كوممۋنيكاتسيا فاكۋلتەتى الدىڭعى ورىنداردا كەلەدى.

تۇركيا رەسپۋبليكاسى ۋنيۆەرسيتەتتەرىنىڭ كوممۋنيكاتسيا فاكۋلتەتتەرى كوممۋنيكاتسيالىق زەرتتەۋلەر قاۋىمداستىعى (İletişim Araştırmaları Derneği – ILAD) ارقىلى اككرەديتتەۋدەن وتكەن 57 باعدارلاما بويىنشا ستۋدەنتتەرگە جوعارى ءبىلىم بەرىپ كەلەدى.

كوممۋنيكاتسيالىق زەرتتەۋلەر قاۋىمداستىعى (İLAD) 2018 جىلدان باستاپ ءوتىنىش بەرگەن كوممۋنيكاتسيا فاكۋلتەتتەرىنىڭ ءبىلىم بەرۋ باعدارلامالارىن اككرەديتتەۋدى باستادى. جوعارىدا ايتىلعانىنداي، بۇگىنگى كۇنى ILAD تاراپىنان اككرەديتتەۋدەن وتكىزىلگەن جۋرناليستيكا جانە اقپارات، قوعاممەن بايلانىس جانە تانىتىم سالالارىنداعى 57 باعدارلانىڭ 25-ءى مەملەكەتتىك ۋنيۆەرسيتەتتەردىڭ كوممۋنيكاتسيا فاكۋلتەتتەرىنە، ال 32-ءسى قۇرىلتاي ۋنيۆەرسيتەتتەرىنىڭ كوممۋنيكاتسيا فاكۋلتەتتەرىنە تيەسىلى. بۇل مالىمەتتەر ارنايى قورلار قۇرىلتايشى بولىپ وتىرعان ۋنيۆەرسيتەتتەردىڭ كوممۋنيكاتسيا فاكۋلتەتتەرى وزدەرىنىڭ ءبىلىم بەرۋ باعدارلامالارىن اككرەديتتەۋدەن وتكىزۋدە الدەقايدا بەلسەندى ەكەنىن كورسەتەدى.

قورىتا كەلگەندە، 2023-2024 وقۋ جىلىندا تۇركيا رەسپۋبليكاسىنداعى مەملەكەتتىك ۋنيۆەرسيتەتتەردەگى كوممۋنيكاتسيا فاكۋلتەتتەرىنە 11 مىڭ 353 كۆوتا، ال قورلار قارجىلاندىراتىن قۇرىلتاي ۋنيۆەرسيتەتتەرىندەگى كوممۋنيكاتسيا فاكۋلتەتتەرىنە 4 مىڭ 723 كۆوتا بەرىلدى. ياعني كوممۋنيكاتسيا فاكۋلتەتتەرىندە بارلىعى 16 مىڭ 73 ستۋدەنت ءبىلىم الۋ مۇمكىندىگىنە يە بولدى [8, 9].

تۇركيادا جىل سايىن 3 ميلليونعا جۋىق جاس ۋنيۆەرسيتەتتەرگە ءتۇسۋ ءۇشىن ەمتيحان تاپسىراتىنىن ەسكەرسەك، كوممۋنيكاتسيا فاكۋلتەتتەرىنە بولىنگەن 16 مىڭ كۆوتا تىم كوپ بولماسا كەرەك. دەگەنمەن، ناقتى ماسەلە جوعارى وقۋ ورىندارىنا بولىنەتىن كۆوتاسىنىڭ از-كوپتىگىندە ەمەس، جۇمىسپەن قامتۋ سالاسىنىڭ وزەكتى ەكەندىگىندە. مىسالى، كوممۋنيكاتسيا سالاسىنداعى وزىندىك ەرەكشەلىكتەرگە شىنايىراق قارايتىن قۇرىلتاي ۋنيۆەرسيتەتتەرىندەگى جۋرناليستيكا باعدارلامالارىنا بولىنگەن كۆوتا نەبارى 207 بولسا، مەملەكەتتىك ۋنيۆەرسيتەتتەردەگى جۋرناليستيكا باعدارلامالارى ءۇشىن كۆوتا 3676-نى قۇرايدى. ولاردىڭ ماڭىزدى بولىگى – ەكىنشى ءبىلىم بەرۋ كۆوتاسى.

قورىتا ايتقاندا، تۇرىك تىلىندەگى اقپارات كوزدەرىنەن جيناقتالعان دەرەكتەر نەگىزىندە ماقالادا قىسقاشا شولۋ جاسالعان تۇركيا رەسپۋبليكاسى ۋنيۆەرسيتەتتەرىندەگى ساپالى ءبىلىم بەرۋى، مىقتى ماتەريالدىق-تەحنيكالىق بازاسى، ستۋدەنتتەرگە ىڭعايلى الەۋمەتتىك جاعداي جاساۋى ارقىلى جاستاردىڭ جۋرناليستيكا جانە اقپارات سالاسىندا بىلىكتى مانساپ يەلەرى بولۋىنا ۇلكەن ۇلەس قوسىپ جۇرگەن ەڭ جاقسى كوممۋنيكاتسيا فاكۋلتەتتەرى رەتىندە مارمارا ۋنيۆەرسيتەتىنىڭ، حاجەتتەپە ۋنيۆەرسيتەتىنىڭ، ىستانبۇل ۋنيۆەرسيتەتىنىڭ، ەگە ۋنيۆەرسيتەتىنىڭ، كادير حاس ۋنيۆەرسيتەتىنىڭ، انكارا ۋنيۆەرسيتەتىنىڭ، گالاتاساراي ۋنيۆەرسيتەتىنىڭ، ىستانبۇل بيلگي ۋنيۆەرسيتەتىنىڭ، يزمير ەكونوميكا ۋنيۆەرسيتەتىنىڭ جانە انادولۋ ۋنيۆەرسيتەتىنىڭ كوممۋنيكاتسيا فاكۋلتەتتەرىن ۇزدىك جوعارى وقۋ ورىندارى رەتىندە اتاپ كورسەتۋگە بولادى [10].

بۇگىندە ءبىزدىڭ ىلەسۋىمىز قيىنعا سوعىپ وتىرعان قازىرگى زامانىمىزدىڭ تەز وزگەرىپ جاتقان تەحنولوگيالىق الەمىنە قارقىندى ۇلەس قوسىپ وتىرعان تۇركيا ۋنيۆەرسيتەتتەرىنىڭ كوممۋنيكاتسيا فاكۋلتەتتەرى جاس ۇرپاققا جان-جاقتى تەرەڭ جوعارى ءبىلىم بەرۋ ءىسىن تەك سوزبەن عانا ەمەس، كوتەرىڭكى كوڭىل-كۇيمەن، كورنەكىلىكپەن جانە ەڭ باستىسى جۇيەلى تارتىپپەن ۇسىنىپ، ستۋدەنتتەرگە زاماناۋي قارىم-قاتىناستا كاسىبي قادامدار جاساۋعا كومەكتەسىپ، ولارعا بارلىق مۇمكىندىكتەردى بەرىپ وتىر.

ادەبيەتتەر ءتىزىمى:

1. https://www.yok.gov.tr/ana-sayfa
2. https://www.tuhid.org/
3. https://ilad.org.tr/
4. Gençtürk Hızal G.S. Public Relations History in Public Relations Education in Türkiye: Meeting the Past in the Present, Akdeniz Üniversitesi İletişim Fakültesi Dergisi, 20(42), 2023.
5. Gençtürk Hızal G.S. A Qualitative Study On The Communicative Needs, Expectations And Experiences During Covid-19 Pandemic: 65 Years And Over Ankara Sample, Connectist-Istanbul University Journal of Communication Sciences, 0(60), 2021.
6. Baskıcı Ç.، Ercil Y.، Gökmen Y. Evolutionary Development of Born Globals Literature During the Period of 2002?2020, Journal of the Knowledge Economy, 1(1), 2024.
7. Akçay E. Halkla İlişkilerin En Lezzetli Hali: "Gastro Halkla İlişkiler", Aydın Gastronomy, 8(1), 2024.
8. İrvan S. Türkiye’de iletişim fakülteleri: Listeye her yıl yenileri ekleniyor // https://www.newslabturkey.org/2023/08/07/turkiyede-iletisim-fakulteleri-listeye-her-yil-yenileri-ekleniyor/
9. https://dreambig.com.tr/ulke-universite-bolumleri/turkiye/iletisim-fakultesi
10. Türkiye’deki En İyi İletişim Fakülteleri (neoldu.com)

مىرزانتاي قوجابايۇلى جاقىپ،

ماناش قوزىباەۆ اتىنداعى سولتۇستىك قازاقستان ۋنيۆەرسيتەتى «جۋرناليستيكا» كافەدراسىنىڭ پروفەسسورى، انكارا قالاسى،

تۇركيا رەسپۋبليكاسى

Abai.kz