بۇرىن باق جاپونداردىڭ جان-تالاسا قارۋلانۋ دۇرمەگىنە ىلەسەتىندىگىن جازعان كەزدە قوس كورشىسى ونى شىبىن شاققان قۇرلى ەلەمەگەن-ءتىن.

رەسەيدىڭ ءبىراز جەرىن جانە قىتايدىڭ كوپ ايماعىن باۋىرىنا باسقان جاپونيا ءوز ءۇنىن ەستىرتە باستادى. قىتاي مەن رەسەي ءۇشىن توبەلەرىنەن جاي تۇسىرگەن جاڭالىق – يسيبانىڭ اقش يادرولىق اسكەرىن جاپون جەرىنە شاقىراعانى بولدى.

جاپونيانىڭ بيلەۋشى ليبەرال-دەموكراتيالىق پارتياسى (لدپ) بۇرىنعى قورعانىس ءمينيسترى سيگەرۋ يسيبانى ءوزىنىڭ جاڭا توراعاسى ەتىپ سايلاعان ەدى. بۇگىن جاپونيادا فۋميو كيسيدا باستاعان ۇكىمەتتىڭ دوعارىسقا كەتكەنى بەلگىلى بولدى. ەندى جاپونيانىڭ سۋ جاڭا پرەمەر-ءمينيسترى ءدال وسى يسيبا بولادى دەپ كۇتىلۋدە.

سيگەرۋ يسيبا قابىعىنان قار جاۋعان، ءوڭ-ءتۇسى تۇكسيگەن فوتوسۋرەتتەرىمەن باق-تا ءجيى كورىنەدى. بىراق ونىڭ الەمدىك ساياساتتا قالىپتاسقان سامۋرايلىق بەت-بەينەسىنەن بولەك، ءومىر بويعى ءحوببيى - ۇشاقتاردىڭ، كەمەلەردىڭ جانە تەمىرجول لوكوموتيۆتەرىنىڭ پلاستيكالىق ۇلگىلەرىن قۇراستىرۋى دا ءبىراز نارسەدەن حابار بەرەدى دەسەك ءجون شىعار.

جاپون ساياساتىنىڭ 67 جاستاعى قارت بۋراسى ءسىزدى وندا ءوز قولىمەن جينالعان مودەلدەرىمەن تانىستىرىپ قانا قويماي، پارتيا بويىنشا ارىپتەستەرىنىڭ كۇماندى كوزقاراستارىن العا تارتا وتىرىپ، حوببيلىك قىزىعۋشىلىعىنىڭ ساياسي سەبەپ استارىمەن تانىس ەتەدى.

ول ءوزىنىڭ جۋرناليستەرگە بەرگەن ءبىر سۇحباتىندا: «امەريكالىق ەلشى، مينيستر نەمەسە فلوت قولباسشىسى جاپونياعا كەلگەن سايىن مەن ونىڭ قانداي كەمەدە بولعانىن ءبىلىپ، تاپ سول كەمەنىڭ (پلاستيكالىق مودەلىن) ونىڭ قولىنا تابىس ەتەمىن. سودان كەيىن ول ءوز كەزەگىندە ءجۇزى بۇل-بۇل جانىپ: «بۇل مەن بولعان ەمەس»، - دەيدى»، - دەپ ءتۇسىندىردى.

بۇل ارينە «قوجاسىنىڭ كىم ەكەنىن بىلگەن سوڭ، يتىنە سۇيەك تاستا» دەيتىن شىعىستىق سىنان وتكەن ءتاسىل. بۇل ورايدا يسيبانىڭ ۇلتتىق رامەن كەسپەسىنىڭ تاريحى مەن رەتسەپتىنە قىزىعۋشىلىعىنىڭ ءھام ءدامى مەن اسپازدىق ارتىقشىلىقتارىن دارىپتەۋىنىڭ ارتى وعان ساياسي ءومىر سىيلاپ، جاپونيانىڭ جاڭا پرەمەرى پارلامەنتتە بيلەۋشى «پارلامەنتتىك رامەن توبىن» قۇرعىزىپ، ءوز وتىرىستارىندا ماڭىزدى جايتتاردى - جاپون ساۋدا ماركالارىن اقش-تا ىلگەرىلەتۋدى، سىرتقى نارىقتاردا ءىرى جاپون كورپوراتسيالارى مەن قارجى-ونەركاسىپ توپتارىنىڭ مۇددەلەرىن قورعاۋدى تالقىلايتىن داستۇرگە اينالدىردى.

يسيبا جاپونيادا زياتكەر تۇلعاسى بولىپ سانالادى. ول ۇزاق ۋاقىت لدپ ساياسي زەرتتەۋلەر جونىندەگى كەڭەستىڭ توراعاسى قىزمەتىن اتقاردى. وعان دەيىن قورعانىس ءمينيسترى، اۋىل، ورمان جانە بالىق شارۋاشىلىعى ءمينيسترى قىزمەتتەرىن اتقارعان. ودان بولەك، يسيبا حالىقتىڭ قىسقارۋىنا قارسى كۇرەسكە جانە پرەفەكتۋرالارداعى جاپون شاعىن بيزنەسىن جانداندىرۋعا جاۋاپتى پورتفەلسىز مينيستر بولىپ جۇمىس ىستەگەن.

جاپونيا بۇدان بىلاي ۇستانۋى ءتيىس سىرتقى ساياساتقا ونىڭ كوزقاراسى قانداي؟

بىردەن ايتپاعىمىز: يسيبا - سەنىمدى جانە دايەكتى ساياسي قىرعي. ول جاپونيانىڭ ءوزىن-ءوزى قورعاۋ كۇشتەرىن جاپون اۋماعىنان تىس جەرلەردە قولدانۋدى كوپتەگەن جىلدار بويى دايەكتى تۇردە قولداپ، العا تارتىپ كەلدى. وسى ءبىر ماسەلەدەگى ونىڭ تاستاي قاتقان ۇستانىمى ءتۇپ-تۇگەل قازىر جاپوندىق ساياسي جانە قارجى-ونەركاسىپتىك ورتالارىندا كەڭىنەن تارالعان كوزقاراستارعا تولىعىمەن سايكەس كەلەدى.

سونداي-اق، يسيبا سوعىستان كەيىنگى ەل كونستيتۋتسياسىنىڭ پاتسيفيستىك ەرەجەلەرىن الىپ تاستاۋدى تالاپ ەتىپ، ناتو-عا ۇقساس ازيالىق اسكەري بلوكتى قۇرۋدىڭ جاقتاۋشىسى بولىپ تابىلاتىندىعىن ايتا كەتپەكپىز. جانە ول وڭىردە اقش يادرولىق قارۋىن ورنالاستىرۋ كەرەك دەپ ەسەپتەيدى.

Abai.kz