يزرايل، يران، ليۆاندا قازا تاپقان نەمەسە زارداپ شەككەن قازاقستان ازاماتتارى تۋرالى اقپارات تۇسكەن جوق. بۇل تۋرالى ازاتتىق راديوسى جازدى. 

بۇل تۋرالى قازاقستان سىرتقى ىستەر مينيسترلىگى رەسمي وكىلى ايبەك سمادياروۆ تاياۋ شىعىستاعى احۋالعا بايلانىستى وتكەن بريفينگىدە ايتتى.

سمادياروۆ قازاقستاننىڭ يزرايل، يران، ليۆانداعى ەلشىلىكتەرى سول ەلدەردىڭ ۋاكىلەتتى ورگاندارىمەن تۇراقتى بايلانىستا وتىرعانىن مالىمدەدى. ونىڭ سوزىنشە، اسكەري-ساياسي جاعدايعا بايلانىستى مينيسترلىك ورتالىق رەفەرەندۋم كوميسسياسىمەن بىرگە وسى ەلدەردەگى رەفەرەندۋم ۋچاسكەلەرىنىڭ قىزمەتىن ۋاقىتشا توقتاتۋدى ءجون كورگەن.

سمادياروۆ مينيسترلىك ۋاكىلەتتى ورگاندارمەن رەپاترياتسيا رەيستەرى بويىنشا احۋالدى قاداعالاپ وتىر دەدى.

"1 قازانعا دەيىن ليۆانداعى جۇزدەن استام شەتەلدىك ەلشىلىكتىڭ ەشقايسى ءوز ازاماتتارىن ەۆاكۋاتسيالاعان جوق. ليۆان بيلىگى دە نۇسقاۋ بەرگەن جوق. سوندىقتان قازاقستان ازاماتتارىن ەۆاكۋاتسيالاۋ ماسەلەسى تالقىلانىپ جاتىر. بۇل ماسەلە مينيسترلىكتىڭ ەرەكشە باقىلاۋىندا", - دەدى سىرتقى ىستەر مينيسترلىگىنىڭ وكىلى ايبەك سمادياروۆ.

كونسۋلدىق ەسەپكە سايكەس، يزرايلدە – 120, يراندا – 102, ليۆاندا 139 قازاقستان ازاماتى تۇرادى. ونىڭ اراسىندا ديپلوماتتار مەن ولاردىڭ ءۇي ءىشى دە بار.

قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ كوپ ازامات كونسۋلدىق ەسەپكە تۇرمايدى، سوندىقتان ولارمەن بايلانىسۋعا، ءتىزىم دايىنداۋعا ۋاقىت كەتەدى دەدى. ول باسقا ەلدەگى ازاماتتاردى دا ەسەپكە تۇرۋعا شاقىردى.

تاياۋ شىعىستاعى جاعدايدىڭ شيەلەنىسۋىنە الاڭدايتىنىن مالىمدەگەن مينيسترلىك بەيبىت تۇرعىنداردىڭ قازاسى مەن جاعدايدىڭ ودان ءارى ناشارلاۋىنا جول بەرمەۋ ءۇشىن تاراپتاردى سابىر تانىتىپ، كۇش قولدانباۋعا شاقىردى.

Abai.kz