سونىمەن ەلدە ەكى جىل بويى اەس-ءتى سالۋ-سالماۋ تۋرالى ەلەس بولىپ كەزگەن، دۋ-دۋ اڭگىمەنىڭ باسى انىقتالدى. كەشەگى رەفەرەندۋمدا داۋىس بەرۋشىنىڭ 71,12% قولدادى.

الدىنا الا قورىتىندىنىڭ ناتيجەسى وسى. ءوزىمنىڭ بولجامىم بۇدان ون پايىزعا تومەنىرەك دەپ ويلاعام. بىراق، پرەزيدەنتتىڭ ءاربىر كەلەلى حالىقتىق جيىندا، جولداۋلاردا، كەزدەسۋلەردەگى ءدوپ سوزدەرى، ودان قالدى قوعامدىق ناسيحاتتىق باعىت جۇمىستارى ءبىر جارىم جىلدا اناعۇرلىم كورسەتكىشكە اكەلدى. كەشە عانا ءبىر تاكسي جۇرگىزۋشىنىڭ ابدەن يۋتۋب پەن تيك-توكتان نەبىر ينفوسىعاننىڭ بىرجاقتى سوزدەرىنەن دالەلسىز تۇيگەن ويلارىن، اەس-ڭ سالىنۋى وتە ماڭىزدى دەپ كوندىرگەن ەدىم. اقىرى مەنى تاستاپ سايلاۋ ۋچاسكەسىنە ءبىر-اق تارتىپ كەتكەنى بار. بۇدان بىلايشا ايتقاندا، كوپ جۇرتقا دۇرىس قاراپايىم تۇسىندىرمەنىڭ قاجەتتىگى كورىنەدى.

نەگىزى اەس-ءتى سالۋعا ءوز ورتامدا ءبىراز قولداۋ بار، بالكىم، وقىپ، تالداي الاتىن ورتا بولعاندىقتان شىعار.

اەس-كە دەگەن كۇدىك پەن ۇرەيدىڭ سەيىلگەنى بار. مامانداردىڭ الدىڭعى قاتارعا شىققانىن كورۋگە بولادى. ايتپەسە، كىم كورىنگەنى اەستانۋشى بولىپ بارا جاتقان ەدى...

رەفەرەندۋمعا دەيىن ەلدە ءتۇرلى قوعامدىق تالداۋلار، عىلىمي ورتالاردا قىزۋ تالقىلار ءوتتى. ارينە، قارسى شىعۋشى تاراپ تا بولدى. ولار چەرنوبىلدى، سەمەيدى ايتتى، بىراق بالىق پەن تاۋىقتى سالىستىرعانداي مىسالدارى اقىلعا قونبادى. شاماسى اتوم بومباسى مەن اتوم ەنەرگەتيكاسىن سوعان قارعاندا ءالى دە بىلمەگەنى عوي.

سوڭعى وتىز جىلدا تەحنولوگيا مەن عىلىم كوز جەتكىزبەستەي جىلجۋدا. قازىرگى اەس-تەر تابيعات اپاتتارى بولسىن، بولماسىن، بارىنە دايىن. ءبىر جاپوننىڭ قالاسىندا 19 اەس بار. ال ەندى كۇندە جەرسىلكىنىسى وتەتىن جاپونيا، اەس-ءتى سالۋدان باس تارتپاي سالۋىن كۇشەيتۋدە. ويتكەنى، زاماناۋي اەس ءبىر ەمەس بىرنەشە ساقتاندىرۋ جۇيەسىمەن جابدىقتالادى. كەشەگى پرەزيدەنتتىڭ سوزدەرى دە وسىعان دالەل. وتاندىق اەس حالىقارالىق كونسورتسيۋم ارقىلى بىرنەشە دامىعان ەلدىڭ تەحنولوگياسىمەن سالىنباق.

سونىمەن، اەس سالىپ جاتقان 20 ەلدىڭ ىشىنە بىزدە كىرەتىن بولدىق. ايتقانداي، مەملەكەت جاڭا عاسىردىڭ ءىرى امبيتسيالىق جوباسىن باستايدى. بۇل كەلەشەك ۇرپاقتىڭ يگىلىگى.

قارا كومىردىڭ تۇتىنىنە ۋلانباي، ەنەرگيانى قىرۋار قارجىعا شەتەلدەن ساتىپ الماي، قالاي بولعاندا دا ءوزىمىزدىڭ اەس-مىزگە قول جەتكىزەمىز، بۇيىرسا.

قازاقستان حالقىنىڭ 71,12% وسى دامۋدى قولدادى. قۇتتى بولسىن!

ماقسات جاقاۋ

Abai.kz