«جايدارمان – كورەرمەن اراسىندا كەڭىنەن تارالعان قىزىققا تولى ويىن. ول جاستاردى بىلىكتىلىككە، ەڭبەككە، ادىلدىككە باۋليدى. جاس ۇرپاق – ەلىمىزدىڭ ەرتەڭى. سوندىقتان ولاردى تاربيەلەۋ جولىندا ەشكىم ايانىپ قالماۋ كەرەك. مەملەكەت باسشىسى جاستاردى ءاردايىم قولداۋعا شاقىرادى.

«شىن مانىندە، كەز كەلگەن مەملەكەتتى تۇرعىندارىنا قاراپ باعالايدى. ياعني، ءبىزدىڭ قانداي ەل بولارىمىز وسكەلەڭ ۇرپاققا بايلانىستى. سوندىقتان جاستارىمىز وتانشىل، ءبىلىمپاز، ەڭبەكقور، ۇنەمشىل، ءادىل ءارى جاناشىر بولۋى قاجەت. مەن مۇنى ۇنەمى ايتىپ ءجۇرمىن. وسى قۇندىلىقتاردى بارىنشا ناسيحاتتاپ، تاراتۋ قاجەت. سوندا جەكە ادامنىڭ قاسيەتى تۇتاس ۇلتتىڭ قاسيەتىنە اينالادى»، - دەپ اتاپ ءوتتى ەل پرەزيدەنتى.

28 قاراشا جەتىسۋ وبلىسىنىڭ جاستارى اراسىندا تالدىقورعان قالالىق
I. جانسۇگىروۆ اتىنداعى مادەنيەت سارايىندا جايدارمان اشىق ليگاسىنىڭ فينالدىق ويىنى ءوتتى. اتالعان شارانى جەتىسۋ وبلىسىنىڭ قوعامدىق دامۋ باسقارماسىنىڭ قولداۋىمەن «الماتى ستۋدەنتتەر اليانسى» كق ۇيىمداستىردى. جۇلدە قورى –  650 000 تەڭگە.

اقتىق كەزەڭگە ماۋسىم بويى قارسىلاستارىنان وزىق بولعان «فاۆوريت»، «Maximum»، «كرەاتيۆ»، «يننوۆاتسيا»، «فورما» كوماندالارى جولداما العان ەدى. فينالعا شىققان بارلىق كوماندا وزدەرىنىڭ جوعارى دارەجەدەگى دايىندىقتارىن كورسەتە الدى. ويىنشىلاردىڭ تاۋىپ ايتقان ازىلدەرىنىڭ استارىنان شىنايى ءومىر شىندىعىن اڭعارۋعا بولادى. قاعىتپا قالجىڭمەن كورەرمەندەردى ءبىر كۇلدىرتسە، تارتىمدى اڭگىمەلەرىمەن ويلاندىرىپ تا قويدى.

سونىمەن قازىلار القاسىنىڭ ءادىل شەشىمىمەن وبلىس كولەمىندە وتكەن جايدارمان ويىندارىنىڭ فينالىندا ادەمى ازىلىمەن، ارتىستىك شەبەرلىكتەرىمەن ەرەكشەلەنگەن «فاۆوريت» كومانداسى جەڭىمپاز اتاندى. ال II ورىنعا  «يننوۆاتسيا» كومانداسى لايىقتى بولدى. ۇشتىكتى  «فورما» مەن «ماكسيمۋم» كوماندالارى قورىتىندىلادى. سونداي-اق «ەڭ ۇزدىك ويىنشى» نوميناتسياسىن «فاۆوريت» كومانداسىنىڭ مۇشەسى ءانۋار اياسىل جەڭىپ الدى.

جەڭىمپاز جانە جۇلدەگەر كوماندالارعا كۋبوك، ديپلوم جانە اقشالاي سەرتيفيكاتتار تابىس ەتىلدى.

جايدارمان – جاستاردى بىرىكتىرەتىن، ۇيىمشىلدىققا، كوشباسشىلىققا، بايقامپازدىققا جەتەلەيتىن قايتالانباس وردا. مۇنداي جوبالار جاسوسپىرىمدەرگە كەرەك ەكەنى ءسوزسىز. سوندىقتان ۇيىمداستىرۋشىلار الداعى ۋاقىتتا دا بۇل جوبا جالعاساتىنىن باسا ايتتى.

Abai.kz