الماتى قالاسى جاستار ساياساتى باسقارماسى مەن توتەنشە جاعدايلار دەپارتامەنتى بىرلەسىپ، قالا جاستارىن سەيسميكالىق قاۋىپسىزدىك تۋرالى اقپاراتتاندىرۋ جۇمىستارىن وتكىزۋدە. اتالمىش شارالار قالامىزدىڭ جوو-دا ءوتىپ جاتىر.

وسىنداي ءىس-شارالاردىڭ ءبىرى قازاق ۇلتتىق اگرارلىق زەرتتەۋ ۋنيۆەرسيتەتىندە ءوتتى. تجد ازاماتتىق قورعانىس باسقارماسىنىڭ  اعا وفيتسەرى پودپولكوۆنيك مەدەۋ شاكەنوۆ ستۋدەنتتەرگە جەر سىلكىنىسى جانە باسقا دا توتەنشە جاعدايلاردا ارەكەت ەتۋدىڭ نەگىزگى قاعيدالارىن ءتۇسىندىردى.

– اپات ايتىپ كەلمەيدى. سوعان وراي، ازاماتتارىمىز، سونىڭ ىشىندە جاستارىمىز ءوزىن-ءوزى قورعاي الاتىنداي، توتەنشە جاعداي كەزىندەگى العاشقى قادامدارعا دايىن بولۋىن قامتاماسىز ەتۋىمىز كەرەك. سوندىقتان ءبىز وسىنداي شارالار ارقىلى جاستاردى وقىتا وتىرىپ،  ولاردىڭ توتەنشە جاعداي كەزىندە بىرىنشىدەن وزدەرىن جانە باسقالاردى قورعاي الاتىن قابىلەتتەرىن دامىتامىز. جاستار ءۇشىن وسىنداي اقپاراتتاندىرۋ شارالارىنىڭ ءوتۋى وتە ماڭىزدى ، - دەيدى  تجد وكىلى مەدەۋ شاكەنوۆ.

سونداي-اق، ءىس-شارادا تابيعي اپات نەمەسە ادامداردىڭ قاتەلىگىنەن بولاتىن ءورتتىڭ بەتىن قايتارۋعا دايىندىق، العاشقى مەديتسينالىق جانە پسيحولوگيالىق كومەك كورسەتۋ بويىنشا ماسەلەلەر ءتۇسىندىرىلدى.

–  بۇگىنگى شارا ارقىلى مەن ءوزىم ءۇشىن كوپ جاڭا اقپارات الدىم. مەنىڭ ويىمشا، ءاربىر ازامات توتەنشە جاعداي كەزىندە «نە ىستەۋ كەرەك؟» دەگەن سۇراققا جاۋاپ بەرە الۋ كەرەك. الداعى ۋاقىتتا وسىنداي شارا وتسە، مىندەتتى تۇردە قاتىساتىن ەدىم، - دەدى ستۋدەنت ەربول باقىتبەكوۆ.

سونىمەن قاتار، الداعى ۋاقىتتا قالامىزداعى  بارلىق كوميۋنيتي ورتالىعىندا جاستارعا قاۋىپسىزدىك شارالارىن ءتۇسىندىرۋ جۇمىستارى بويىنشا بىرقاتار ءىس-شارالار  ۇيىمداستىرىلاتىن بولادى.

Abai.kz