ازەربايجان پرەزيدەنتى يلحام اليەۆ ۇشاق اپاتىنا قاتىستى سۇراقتارعا جاۋاپ بەردى. اليەۆ اپاتقا رەسەي تاراپىن ايىپتاي سويلەدى. بۇل تۋرالى Mezgil.kz اقپاراتتىق پورتالى جازدى. 

«ۇشاق اپاتىنا قاتىستى سوڭعى سەبەپ قارا جاشىكتى وقىعاننان كەيىن ايتىلاتىنى انىق. الايدا قازىر ايتىلىپ جاتقان نۇسقالار دا فاكتىلەرگە سۇيەنە وتىرىپ ايتىلۋدا.

ال فاكتىلەر نە دەيدى؟ فاكتىلەر ءبىزدىڭ ۇشاقتىڭ رەسەي اۋماعىندا، گروزنىي قالاسىنا جاقىن تۇستا سىرتتان زاقىم العانىن كورسەتۋدە. ۇشاق باسقارۋ قابىلەتىن جوعالتقان. ءبىزدىڭ ۇشاقتىڭ باسقارۋ جۇيەسىنە راديوەلەكتروندى كۇرەس جۇيەسىنىڭ (رەب) زيان كەلتىرگەنىن بىلەمىز», - دەدى.

ول رەسەيلىك تاراپ ءۇش كۇن بويى اقىلعا قونبايتىن نۇسقالاردى ايتىپ، قاشقاقتاعانىن مالىمدەدى. ءىستىڭ ءادىل شەشىلۋىنە سەنىم ءبىلدىردى.

«البەتتە، ءبىزدىڭ ۇشاقتى ابايسىزدا اتىپ الۋى مۇمكىن. ەشقانداي قاساقانا ويلاستىرىلعان شابۋىل ەمەس. سول سەبەپتى كىنانى مويىنداپ، ازەربايجاننان كەشىرىم سۇراپ، دوس ەل رەتىندە ءمان-جايدى قوعامعا ءتۇسىندىرۋ كەرەك ەدى. بۇل جاسالۋعا ءتيىس قادامدار ەدى. وكىنىشكە وراي العاشقى ءۇش كۇندە رەسەي تاراپى اقىلعا كەلمەيتىن ساندىراق نۇسقالاردى ايتۋدان باسقا ەشتەڭە ىستەمەدى»، - دەيدى اليەۆ.

ازەربايجان باسشىسى ۇشاق اپاتىنا قاتىستى ءىستى جان-جاقتى زەرتتەيتىنىن ايتتى.

«قارا جاشىكتى وقىعاننان كەيىن، قازىرگى تاڭدا كوكەيىمىزدە تۇرعان كوپ سۇراققا جاۋاپ الىپ، ناقتى جاعدايدى كورەمىز. مىسالى، ۇشاق نەگە گروزنىي قالاسىنا قونا المادى؟ ۇشاقتىڭ باسقارۋ جۇيەسىنە راديوەلەكتروندى كۇرەس جۇيەسى قالاي اسەر ەتتى؟ ۇشاقتىڭ جانىنداعى اۋەدە بولعان جارىلىستار ۇشاققا قالاي اسەر ەتتى؟ بۇل فاكتىلەردى اڭعارماعان كەيىپ تانىتۋ ناعىز ابسۋرد، اقىماقتىق»، - دەيدى ول.

ازەربايجان پرەزيدەنتى رەسەيگە ارنايى شارت قويعانىن ايتتى.

«27-جەلتوقسان كۇنى ءبىز رەسەي تاراپىنا ءوز تالاپتارىمىزدى جەتكىزدىك. ول قانداي تالاپ، شارتتار؟ بىرىنشىدەن، رەسەي ازەربايجاننان كەشىرىم سۇراۋى ءتيىس. ەكىنشىدەن، ول ءوز كىناسىن مويىنداۋى قاجەت. ۇشىنشىدەن، قىلمىستىق جاۋاپكەرشىلىك اياسىندا بارلىق كىنالىلەر جازالانۋى كەرەك. تورتىنشىدەن، ازەربايجان ەلىنە، جاپا شەككەن جولاۋشىلار مەن ەكيپاج قۇرامىنا ءتيىستى وتەماقى تولەنۋى قاجەت. بۇل ءبىزدىڭ شارتىمىز. بۇنىڭ العاشقىسى كەشە ورىندالدى. ءبىزدىڭ قالعان شارتتارىمىز دا ورىندالادى دەپ سەنەمىن.

بۇل شارتىمىز ادىلەتتى. بۇل جەردە ويدان شىعارىلعان، اسىرەلەگەن ەشتەڭە جوق، بارلىعى دا حالىقارالىق تاجىريبەگە جانە ادامي قاتىناسقا سۇيەنىپ جاسالۋدا. سولاي. تاعى قايتالاپ ايتامىن، ازەربايجان قوعامىنا بارلىق اقپاراتتى جەتكىزىپ وتىرامىز. مەن ءبىزدىڭ تالاپ، شارتتارىمىز ورىندالادى دەپ سەنەمىن»، - دەيدى ول.

اليەۆتىڭ پىكىرىنەن كەيىن پۋتين ازەربايجان پرەزيدەنتىنە حابارلاسىپ، ۇشاق اپاتىنا قاتىستى ماسەلەنى تاعى ءبىر مارتە تالقىلاعان.

Abai.kz