قازاقستان رەسپۋبليكاسى پرەزيدەنتى قاسىم-جومارت توقاەۆ مىرزاعا
ازەربايجان رەسپۋبليكاسى جاليللاباد اۋدانى گۇلماممەدلي اۋىلىنىڭ تۇرعىنى، اسكەري قىزمەت مۇگەدەگى يبيشوۆ داشگىن مەحمەت وعلى العىس حاتىن ءبىزدىڭ رەداكتسيا ارقىلى جولداپتى. ءبىز اتالعان ءۇشبۋ حاتتى قازاق تىلىنە اۋدارىپ، وقىرمان تالقىسىنا ۇسىنىپ وتىرمىز...

قۇرمەتتى پرەزيدەنت مىرزا!

2024 جىلعى 25 جەلتوقساندا ازەربايجان رەسپۋبليكاسىنىڭ AZAL-گروزنىي باعىتىنداعى ۇشاعى قازاقستاننىڭ اقتاۋ قالاسىندا اپاتقا ۇشىرادى. سول كۇنى ءسىزدىڭ نۇسقاۋىڭىز بويىنشا اپاتتان زارداپ شەككەندەردى ۇشاقتان قۇتقارۋ، سونداي-اق دارىگەرلەر توبىنىڭ اپات ورنىنا جەدەل جەتىپ، جوعارى دەڭگەيدە كاسىبيلىك تانىتۋى ارقاسىندا كوپتەگەن ادامدارعا كومەك كورسەتىلدى. ۇشاقتان زارداپ شەككەندەر مەن قازا بولعانداردىڭ دەنەلەرىن قۇتقارۋ توپتارى، سونداي-اق مەديتسينا قىزمەتكەرلەرى ۇلكەن جانقيارلىقپەن جۇمىس اتقاردى.

ءسىزدىڭ ادامگەرشىلىككە تولى شەشىمدەرىڭىز ءۇشىن، سونداي-اق قازاقستاننىڭ بارلىق قۇتقارۋ قىزمەتتەرى مەن مەديتسينا ماماندارىنىڭ مۇسىلمان باۋىرلارىمىزعا كورسەتكەن كومەگى ءۇشىن شىنايى ريزاشىلىعىمدى بىلدىرەمىن. مەن ازەربايجان پرەزيدەنتى يلحام اليەۆكە جۇگىنىپ، ءسىزدى “ار-نامىس” وردەنىمەن ماراپاتتاۋ ۇسىنىسىن جاسايمىن، سەبەبى ءسىز ءوز ادامدىق بورىشىڭىزدى ءادىل جانە لايىقتى ورىندادىڭىز.

مەن قر توتەنشە جاعدايلار مينيسترلىگىنىڭ قۇتقارۋ توپتارىنىڭ جانە دەنساۋلىق ساقتاۋ مينيسترلىگى ماماندارىنىڭ ءوز مىندەتتەرىن ادال جانە ءادىل ورىنداعانىن ەرەكشە اتاپ وتكىم كەلەدى. ولار ۇشاقتا زارداپ شەككەندەرگە جوعارى دەڭگەيدە كومەك كورسەتتى. مۇسىلمان مەملەكەتى پرەزيدەنتى رەتىندە ءسىزدىڭ وسىنداي باتىل قادامدارىڭىز ماقتاۋعا لايىق. ءسىزدى قازاق حالقىنىڭ عانا ەمەس، مۇسىلمان قاۋىمىنىڭ ار-نامىسى مەن ابىرويىن اسقاقتاتقان تۇلعا دەپ ەسەپتەيمىن.

قازاقستان حالقىنىڭ بۇل قايعىلى وقيعاعا شىنايى جاناشىرلىق تانىتىپ، ازەربايجان ازاماتتارىنا كومەك قولىن سوزعانى ءۇشىن العىسىم شەكسىز. بۇل مۇسىلماندىق سەزىمنىڭ ايقىن كورىنىسى دەپ بىلەمىن. قازا بولعانداردىڭ وتباسىلارىنا سابىر، ال زارداپ شەككەندەرگە تەز ساۋىعىپ كەتۋىن اللادان تىلەيمىن.

قازاقستان حالقىنىڭ مۇسىلماندارعا قولداۋ كورسەتەتىنىن دالەلدەگەن بۇل ءىسى - بارىمىزگە ۇلگى. ەندىگى جەردە الەمدە مۇنداي قايعىلى وقيعالاردىڭ قايتالانباۋىن اللادان تىلەيمىن.

قۇرمەتپەن،
ازەربايجان رەسپۋبليكاسىنىڭ ازاماتى
يبيشوۆ داشگىن مەحمەت وعلى

Abai.kz