جەزقازعان تۇرعىنى «ۆاگنەر» جاك قۇرامىندا شەتەلدە سوعىس قيمىلدارىنا قاتىسقانى ءۇشىن كىنالى دەپ تانىلىپ، 4 جىل التى 6 باس بوستاندىعىنان ايىرىلدى، دەپ حابارلايدى ۇلىتاۋ سوتىنىڭ ءباسپاسوز قىزمەتى.

«سوت ۇكىمىمەن «گ» قازاقستان رەسپۋبليكاسى قىلمىستىق كودەكسىنىڭ 172-بابى (شەتەلدەگى قارۋلى قاقتىعىستارعا قاتىسۋ) بويىنشا كىنالى دەپ تانىلىپ، وعان 4 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. جازاسى قاۋىپسىزدىگى ورتاشا قىلمىستىق-اتقارۋ جۇيەسى مەكەمەسىندە وتەلەدى»، - دەلىنگەن حابارلامادا.

تەرگەۋ انىقتاعانداي، سوتتالۋشى 2022 جىلدىڭ كۇزىندە جەزقازعاندا ۋكرايناعا قارسى سوعىس  تۋرالى اقپاراتتى ينتەرنەت ارقىلى الىپ، رەسەيگە كەتۋدى جوسپارلاعان. رەسەي ءۇشىن سوعىسۋعا باستى سەبەپ – يدەولوگيالىق نانىمدار بولعان. سوتتالۋشىنىڭ مارقۇم اكەسى حاركوۆ تۋماسى بولعان. سوتتالۋشى «ۋكراينا بيلىگى ورىس ۇلتىنىڭ قۇقىقتارىن بۇزۋدا» دەپ سەنەدى.

2022 جىلدىڭ قاراشا ايىندا ول جەزقازعاننان پەتروپاۆلعا بارعان. ول جەردەن قازاقستان شەكاراسىن «قورعان» باقىلاۋ-وتكىزۋ بەكەتى ارقىلى كەسىپ وتكەن. سودان كەيىن كراسنودار ولكەسىندەگى «ۆاگنەر» جاك-ءتىڭ وقۋ-جاتتىعۋ جيىنىنا كەلىپ، كەلىسىم-شارتقا قول قويعان. سوعان سايكەس ايىنا 240 مىڭ رەسەي ءرۋبلى مولشەرىندە تولەمگە كەپىلدىك بەرىلگەن. كەلىسىمشارتتا ەگەر ول قايتىس بولعان جاعدايدا 5 ميلليون رۋبل وتەماقى تولەۋ دە قاراستىرىلعان، اقشا ونىڭ دوسىنا اۋدارىلۋى كەرەك بولعان.

سونان سوڭ: سوتتالۋشى ارتيللەريالىق قارۋ-جاراق قويماسىنىڭ مەڭگەرۋشىسى بولىپ تاعايىندالعان. 2022 جىلدىڭ جەلتوقسانىنان 2023 جىلدىڭ شىلدەسىنە دەيىن قىزمەتتىك مىندەتتەرىن اتقارىپ كەلگەن. ول كەزەكشىلىك پۋنكتىنەن شىعىپ، اۋە كولىگىمەن قازاقستانعا ورالعانعا دەيىن قىزمەتتە بولعان.

سوتتالۋشى ءوز كىناسىن تولىق مويىندادى.

Abai.kz