بۇدان بىلاي مەملەكەتتەن بولىنگەن قارجىمەن تۇسىرىلگەن بارلىق فيلمدەر تەك قازاق تىلىندە كورەرمەنگە جول تارتادى. بۇل تۋرالى پرەمەر-مينيستر ولجاس بەكتەنوۆتىڭ دەپۋتاتتارعا بەرگەن جاۋابىندا جازىلعان.

بەكتەنوۆ الداعى 10 جىلعا «قازاق كينوسىنىڭ دامۋ ستراتەگياسىن» دايىنداۋ بويىنشا بىرقىدىرۋ شارالار جوسپارلانعانىن، اتالعان سالاعا ايتارلىقتاي رەفورمالار كەرەكتىگىن العا تارتتى.

«مەملەكەت قولداۋىمەن تۇسىرىلەتىن بارلىق فيلمدەر قازاق تىلىندە تۇسىرىلەدى جانە پروكاتقا ەكى تىلدە شىعادى. ستاتيستيكالىق دەرەكتەر بويىنشا، 2024 جىلى پروكاتتاعى قازاق تىلىندەگى فيلمدەردىڭ ۇلەسى 19 %-عا جەتكەن (2023 جىلى 16 %). بۇل قازاق تىلىندەگى كونتەنتكە سۇرانىستىڭ ارتا تۇسكەنىن كورسەتەدى»، – دەلىنگەن جاۋاپتا.

ال مادەنيەت جانە اقپارات ءمينيسترى ايدا بالاەۆانىڭ ايتۋىنشا،  شاكەن ايمانوۆ اتىنداعى قازاقفيلمى الداعى ۋاقىتتا جاڭا دامۋ ساتىسىنا وتپەك.

دەرەكتەرگە نەگىزدەلسەك،  ەندى جىل سايىن فيلم تۇسىرۋگە بولىنەتىن جالپى قارجىنىڭ از دەگەندە 30 پايىزى تىكەلەي قازاقفيلمگە باعىتتالماق.

«ەندى مينيسترلىك بۇل سالا ءۇشىن قارجىلاي جانە قارجىلاي ەمەس قولداۋ شارالارىن ازىرلەيتىن بولادى. وسىنداي وكىلەتتىكتەر جەرگىلىكتى اتقارۋشى ورگاندارعا دا بەرىلدى. بۇل وڭىرلەردەگى شىعارماشىلىق حابتاردى قۇرۋدى جانە ولاردىڭ جۇمىسىن جەڭىلدەتىپ، ايماقتىق ەرەكشەلىكتەردى ەسكەرە وتىرىپ، ماقساتتى مەملەكەتتىك قولداۋ شارالارىن ەنگىزۋگە جول اشادىع»، – دەيدى ايدا بالاەۆا.

وسىعان دەيىن ايدا بالاەۆا اتالعان كينوكومپانياسىنىڭ جاعدايى وتە اۋىر ەكەنىن ايتقان بولاتىن.

Abai.kz