بۇل تۋرالى توتەنشە جاعدايلار ءمينيسترى شىڭعىس ءارىنوۆ سەناتتا وتكەن ۇكىمەت ساعاتىندا ايتتى.

«بۇگىنگى تاڭدا ەلىمىزدە سۋ باسۋ قاۋپى بار ايماقتاردا 1 223 ەلدى مەكەن بار. مينيسترلىك ۇيلەستىرۋشى ورگان رەتىندە ينفراقۇرىلىمدى ىقتيمال سۋ تاسقىنىنا دايىنداۋ ءۇشىن جەرگىلىكتى اتقارۋشى جانە مۇددەلى مەملەكەتتىك ورگاندارمەن تىعىز قارىم-قاتىناس جاسايدى. سونداي-اق توتەنشە جاعدايلاردىڭ الدىن الۋ جونىندەگى نەگىزگى ءىس-شارالار ورتالىق جانە جەرگىلىكتى اتقارۋشى ورگاندارعا جۇكتەلگەنىن اتاپ وتەمىن. سۋ تاسقىنىنا قارسى ءىس-شارالار رەسپۋبليكالىق جانە وڭىرلىك باعدارلامالىق قۇجاتتارمەن ىسكە اسىرىلادى. وسى ءىس-شارالاردى  ىسكە اسىرۋ سۋ باسۋ قاۋپىن بارىنشا ازايتۋعا جانە ەلدى مەكەندەردى سۋ تاسقىنى قاۋپىنەن قورعاۋدى قامتاماسىز ەتۋگە مۇمكىندىك بەرەدى», – دەدى ۆەدومستۆو باسشىسى.

شىڭعىس ءارىنوۆتىڭ ايتۋىنشا، سۋ تاسقىنى اياقتالعاننان كەيىن وڭىرلەر الدىن الۋ شارالارى مەن ينجەنەرلىك جۇمىستاردى باستادى.

«ولاردى ىسكە اسىرۋ بارىسىن جەرگىلىكتى جەرلەردە مينيسترلىكتىڭ بولىمشەلەرى جۇزەگە اسىرۋدا. سونداي-اق ۇكىمەت اپپاراتى ينسپەكتورلارىنىڭ قاتىسۋىمەن بىرنەشە رەت تەكسەرۋلەر جۇرگىزىلدى. جالپى وڭىرلەردە 1 400 سۋ تاسقىنىنا قارسى ءىس – شارالار ىسكە اسىرىلدى», – دەدى مينيستر.

Abai.kz