پرەمەر-مينيستر ولجاس بەكتەنوۆتىڭ توراعالىعىمەن «سامۇرىق-قازىنا» ۇلتتىق ءال-اۋقات قورى» اق ديرەكتورلار كەڭەسىنىڭ وتىرىسى ءوتتى. پرەزيدەنت قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا العا قويعان مىندەتتەردى ەسكەرە وتىرىپ، قوردىڭ 2024 جىلعى جۇمىسىنىڭ قورىتىندىلارى جانە ونى ودان ءارى دامىتۋ ماسەلەلەرى قارالدى.

«سامۇرىق-قازىنا» ۇاق» اق باسقارما توراعاسى نۇرلان جاقىپوۆ ينۆەستيتسيالىق جوبالاردى ىسكە اسىرۋ تۋرالى باياندادى. ۇزدىكسىز ەلەكترمەن جابدىقتاۋ ماقساتىندا ەكىباستۇز گرەس-1 №1 ەنەرگيا بلوگى توقتاپ، قۋاتى 4000 مۆت-قا دەيىن ۇلعايتىلدى. ەكولوگيانى جاقسارتۋ جۇمىستارى اياسىندا الماتى جەو-2 جانە جەو-3 ءۇشىن گاز ينفراقۇرىلىمىن قۇرۋ جوباسى ىسكە اسىرىلدى. قاراشىعاناق كەن ورنى جۇمىسىنىڭ تيىمدىلىگىن ارتتىرۋ ءۇشىن بەسىنشى كەرى ايداۋ كومپرەسسورى ەنگىزىلدى. كولىك-لوگيستيكالىق باعىتتا سيان قالاسىندا جۇك تەرمينالى سالىندى، ول جۇكتەردى جەتكىزۋ مەرزىمىن قىسقارتۋعا جانە قازاقستاندىق باعىتتاردىڭ تارتىمدىلىعىن ارتتىرۋعا مۇمكىندىك بەردى. سونىمەن قاتار 250 شاقىرىمنان استام گاز قۇبىرى مەن 500 شاقىرىم تەمىرجول جەلىسى تارتىلىپ، ەكىنشى «دوستىق – مويىنتى» جولىنىڭ 132 شاقىرىمىندا پويىز قوزعالىسى ىسكە قوسىلدى. سونداي-اق ەسەپتى كەزەڭدە قازاقستان ءۇشىن بىرەگەي جوبالار: گيدرواككۋمۋلياتسيالىق ستانسا مەن استانا قالاسىنداعى العاشقى تسيفرلىق قوسالقى ستانسانىڭ قۇرىلىسى باستالدى.

جالپى تىزىمگە قازىرگى ۋاقىتتا مۇناي-گاز، مۇناي-حيميا، ەنەرگەتيكا، كولىك-لوگيستيكا جانە باسقا دا سالالار بويىنشا قۇنى 33,3 ترلن تەڭگەنى قۇرايتىن ينۆەستيتسيالىق 46 جوبا ەنگىزىلگەن.

بيىل «تالدىقورعان – ءۇشارال» ماگيسترالدى گاز قۇبىرىن پايدالانۋعا بەرۋدىڭ ارقاسىندا جەتىسۋ وڭىرىندەگى 66 ەلدى مەكەندى گازبەن قامتۋ جۇمىستارىن اياقتاۋ جوسپارلانعان. كەندىرلىدە قۋاتتىلىعى تاۋلىگىنە 50 مىڭ م3 تەڭىز سۋىن تۇششىتۋ زاۋىتىن ىسكە قوسۋ ارقىلى جاڭاوزەن قالاسى مەن ماڭعىستاۋ وبلىسىنداعى سۋ تاپشىلىعى ماسەلەسىن شەشۋ جوسپارلانۋدا. ترانسكاسپي حالىقارالىق كولىك باعىتىنىڭ (تحكب) جانە «دوستىق – مويىنتى» تەمىرجول جەلىسى ۋچاسكەسىنىڭ وتكىزۋ قابىلەتىن ارتتىرۋ ءترانزيتتى دامىتۋعا ەلەۋلى سەرپىن بەرەدى. ىشكى نارىقتىڭ قاجەتتىلىكتەرىن قاناعاتتاندىرۋ ءۇشىن پمحز-دا ديزەل وتىنىن گيدروتازارتۋ ورناتىلادى جانە CASPI BITUM-دا بيتۋم ءوندىرىسى كەڭەيتىلەدى. «بەينەۋ – بوزوي – شىمكەنت» ماگيسترالدى گاز قۇبىرىنىڭ وتكىزۋ قابىلەتىن جىلىنا 15 ملرد م3 دەيىن ارتتىرۋعا مۇمكىندىك بەرەتىن ەكىنشى ۋچاسكەسىنىڭ قۇرىلىس بارىسىنا ەرەكشە نازار اۋدارىلىپ، بىرلەسكەن ينۆەستيتسيالاۋ قۇرالدارى تالقىلاندى.

جوبالار بويىنشا جەرگىلىكتى قامتۋدىڭ بولجامدى ۇلەسى سەكتورعا بايلانىستى وزگەرىپ وتىرادى. مىسالى، كولىك-لوگيستيكا سەكتورىنداعى جوبالار بويىنشا بۇل كورسەتكىش 85%-دى، ەنەرگەتيكالىق جوبالار بويىنشا – 60%-دى، سۋ تۇششىتۋ زاۋىتىن، «ۇيمت» اەا ينفراقۇرىلىمىن، جايلى مەكتەپتەر مەن 5G جەلىسىن سالۋ جانە توبج توسەۋدى قوسا العاندا، باسقا دا جوبالار بويىنشا – 80%-دى قۇرايدى.

سونداي-اق 2024 جىلى وتاندىق تاۋار وندىرۋشىلەردى قولداۋ بويىنشا قوسىمشا شارالار قاراستىرىلعان. وسىنىڭ ارقاسىندا 1,1 ترلن تەڭگەگە ءوتو-مەن شارتتار جاسالىپ، ءوسىم 2023 جىلمەن سالىستىرعاندا 76%-دى قۇرادى. 191 ملرد تەڭگەگە وفتەيك-كەلىسىمشارتتار جاسالدى، بۇل 2023 جىلمەن سالىستىرعاندا 10 ەسەگە كوپ. سونىمەن قاتار قوردىڭ ساتىپ الۋ جۇيەسى العاش رەت ەقدب، ادب جانە ەىدۇ ۇزدىك ستاندارتتارىنا سايكەس دەپ تانىلدى.

پرەمەر-مينيستر ەلىمىز ءۇشىن ماڭىزدى جوبالاردى ىسكە اسىرۋعا جەكە ينۆەستيتسيالار تارتۋ جونىندەگى جۇمىستى كۇشەيتۋ قاجەتتىگىنە توقتالدى.

«مەملەكەت باسشىسى ءبىزدىڭ جۇمىسىمىزدىڭ باسىم باعىتى ءىرى ينفراقۇرىلىمدىق جانە ونەركاسىپتىك جوبالاردى، كولىك پەن لوگيستيكانى دامىتۋ، سونداي-اق تسيفرلاندىرۋ جانە جاساندى ينتەللەكت بولۋى ءتيىس ەكەنىن اتاپ وتكەن بولاتىن. ۇكىمەت ەلىمىز ءۇشىن ماڭىزدى جوبالاردىڭ ىسكە اسىرىلۋ جاعدايىن باقىلاۋدا ۇستايدى. مەملەكەتتىڭ ەكونوميكاداعى ۇلەسىن بىرتىندەپ ازايتا وتىرىپ، بىرلەسكەن ينۆەستورلاردى بەلسەندى تارتۋ قاجەت»، — دەپ اتاپ ءوتتى ولجاس بەكتەنوۆ.

سونىمەن قاتار پرەمەر-مينيستر ۇدەرىستەردى وڭتايلاندىرۋ جانە كەشىكتىرۋگە ءارى نەگىزسىز قىمباتتاۋعا جول بەرمەۋ ءۇشىن جوبالاردى ىسكە اسىرۋ مەرزىمدەرىنىڭ ساقتالۋىن قاتاڭ باقىلاۋ قاجەتتىلىگىنە اۋداردى.

Abai.kz