ەڭسەلى ەلوردادا ءبىر اكتەر بار. ونىڭ ويناۋى، ساحناداعى ءسوز تاپتاۋى، داۋىس ءۇنى، ءبارى ەرەكشە. كورگەن كورەرمەن ول كىسىنىڭ ونەرىنە قاتتى ءتانتى بولادى. بۇل قازىبەك ەسقاراعا بەرىلگەن باعا ەدى.

مۋزىكالىق جاس كورەرمەن تەاترىنىڭ جەتەكشى اكتەرلەرىنىڭ ءبىرى قازىبەك مەكتەپتى تامامداعانان كەيىن ارايلى الماتىعا تالاي ونەر تارلاندارىن باپتاعان ت.جۇرگەنوۆ اتىنداعى قازاق ۇلتتىق ونەر اكادەمياسىنا تالاپكەر بولىپ كەلەدى. اكادەميانى كورگەنىمەن، قاي ماماندىققا وقۋعا ءتۇسۋ كەرەكتىگىن، قاي اۋديتورياعا بارۋ كەرەك ەكەنىن اۋەلدە  بوزبالا قازىبەك بىلمەدى. وسىنداي كۇردەلى ساتتە بەيبىت اتتى تالدىقورعانان كەلگەن جاس جىگىت «مۋزىكالىق تەاتر اكتەرى» ماماندىعى، بولات اتاباەۆ شەبەرحاناسىنا جازىلۋ ءجۇرىپ جاتقانىن ايتادى. كوڭىلى الىپ ۇشىپ، وقۋ بولمەسىنىڭ تابالدىرىعىن يمەنە اتتايدى. كەلسە، بولات اتاباەۆ پەن اسحات ماەميروۆ جۇرەگى «ونەر» دەپ سوققان ۇل-قىزداردى قابىلداپ جاتادى. ەمتيحانعا قازىبەك «گاۋحارتاس» ءانىڭ ورىندايدى. بىراق، سول كەزدە ورىنداعان «گاۋحارتاس» ءانى ونىڭ ونەرىنە ۇلكەن سەرپىلىس سىيلايتىنىن ارينە، بىلگەن جوق ەدى. سىنان سۇرىنبەي وتكەن قازىبەك ءۇشىن مۇنارلى الاتاۋدا «ستۋدەنتتىك» اتتى جاڭا ءومىردىڭ پاراعى اشىلدى. ستۋدەنتتىك جىلدار قازىبەك ءۇشىن ەستەن كەتپەيتىن قىزىقتى، شۋاقتى ءارى جاۋاپ كۇندەرىمەن ءوتتى. ۇستازى اسحات ماەميروۆتىڭ ءتالىمى، قامقورلىعى جالعىز قازىبەككە عانا ەمەس، توپتاعى وزگە جاندارعا دا، شابىت سىيلايتىن.

ونەر اكادەمياسىن ۇزدىك تامامداعانان كەيىن قازىبەك اۋەلدە راديوعا ديكتور، كەيىن «قازاق اۋەندەرى» اق مەنەدجەر سىندى قىزمەتتەردى اتقارادى. وسى جىلدار ىشىندە ساحنانى قاتتى ساعىنادى. ساحناعا دەگەن ماحاببات، تەاترعا دەگەن ساعىنىش قازىبەكتى استانا مۋزىكالىق جاس كورەرمەن تەاترىنا الىپ كەلدى. دەبيۋتتىك ءرولى «عاشىق جۇرەك» پوەتيكالىق دراماسىنداعى-مۇقاعالي ماقاتاەۆ بەينەسى بولدى. ال ع.ءمۇسىرىپوۆتىڭ «قىز جىبەك» ەتنو-فولكلورلىق ميۋزيكلىندە قازىبەك ورىنداۋىنداعى بازارباي تەرەڭ ماعىناعا يە. ەل اماندىعى ءۇشىن، ۇرپاق كەلەشەگى ءۇشىن تولەگەندى قۇرباندىققا شالىپ، جۇرتىن امان الىپ قالعىسى كەلگەن كورەگەن تۇلعا رەتىندە كورىنەدى. ويتكەنى، بالاسىن قۇربان ەتپەسە، اعايىنعا قاۋىپ ءتونىپ تۇر. وسىنى بازارباي سەزەدى. ول بالاسىنا جانى اشىمايتىن قاتىگەز اكە ەمەس، كەرىسىنشە، پەرزەنتىن قيماستىقپەن قيعان، مەيرىمدى اكە، اكتەر ويىنىندا وسىنى بايقايمىز.  جوعارىدا، «گاۋحارتاس» ءانى قازىبەكتىڭ تالاپكەر كەزىندە جولىنىڭ اشقانىن ايتىپ وتتىك. ال تەاتر ساحناسىندا «گاۋحارتاس» سپەكتاكلىندەگى تۇرىمبەت-قازىبەك ەسقارانىڭ شىعارماشىلىعىنا قانات سىيلادى. 55 جاستاعى اكەنى 29 جاسىنان باستاپ نۇسقالاپ كەلە جاتقان قازىبەككە كورەرمەننىڭ قوشەمەتى ەرەكشە. وزىنە ءتان مەيىرىمدىلىگى مەن قاتالدىعى قاتار جۇرەتىن تۇرىمبەت-قازىبەك ساحنا الاڭىندا قاباق پەن كوزى جاراسىمدى ويناتادى. اتالعان ەكى دەتالدان كەيىپكەردىڭ شىنايى بەت-بەينەسىن بايقايمىز. سول بەت-بەينەدە، ىشكى جان دۇنيەدە اۋىزى دۋالى اسقار تاۋ مەن كەلىنىنە مەيرىمدى اتا تۇر. قازىبەك قاھارماننىڭ مىنەز-قۇلقىن وسىلاي اشادى. وسى ارقىلى جانە قويىلىم سوڭىنداعى تاستانعا ايتار ءسوزى ارقىلى تەاتر سۇيەر قاۋىمعا وي سالادى. تولعانادى.

اريستوتەل: «تەاتر – ادام جانىن تازارتادى»، - دەيدى. ال قازىبەك - تۇرىمبەت بەينەسىمەن كورۋشى جۇرەگىڭ تازارتادى. بۇل اكتەر شەبەرلىگىنىڭ ەرەكشەلىگى. وسى تۇستا ەسىمە بەلگىلى  تەاتر سىنشىسى ءا.سىعايدىڭ: «ناعىز اكتەر – ەشقاشان شىققان بيىگىنە قاناعاتتانىپ، توقمەيىلسىمەيتىنى بەلگىلى. ءوزىن، وزگەنى سىيلايتىن اكتەردىڭ ۇزدىكسىز ىزدەنىس ۇستىندە جۇرەتىنى حاق»، - دەيدى. قازىبەك تە، سولاي ءبىر داندايسىپ، ماقتانۋ، تاكاپپارلانۋ دەگەندى بىلمەيتىن، ادامدىق قاسيەتىن ساقتاي بىلەتىن جان. بۇل ونەر ءۇشىن ماڭىزدى دۇنيە. دارىندى اكتەردىڭ شىعارماشىلىعىنا تولاعاي تابىس تىلەيمىز.

باحتيار تۇرسىن،

تەاترتانۋشى

Abai.kz